¶Comment certains gouverneurs de Picrochole par conseil precipite le mirent on dernier peril. Chap. xxxi.

Les fouaces destroussees comparurent davant Picrochole , les duc deMenuail, comte Spadassin, et capitaine Merdaille, et

luy dirent, Sire aujourdhuy nous vous rendons le plus heureux et plus chevaleureux prince qui oncques feut depuis la mort de Alexandre Macedon. Le moyen en est tel, vous laisserez icy quelque capitaine en garnison avec petite bande de gens, pour garder la place, laquelle nous semble assez forte: tant par nature, que par les rampars faictz a vostre invention. Vostre armee partirez en deux, comme trop mieulx l’entendez. L’une partie yra ruer sur ce Grandgozier, et ses gens. Par icelle sera de prime abordee facillement deconfit. La recouvrerez argent a tas. L’aultre partie en ce pendent tirera vers Onys, Sanctonge, Angomoys, et Gascoigne : ensemble Perigot, Medoc, et Elanes. Sans resistence prandront villes, chasteaulx, et forteresses. A Bayonne, a sainct Jehan de Luc, et Fontarabie saysirez toutes les naufz, et coustoyant vers Gallice, et Portugal, pillerez tous les lieux maritimes, jusques a Ulisbone ou aurez renfort de tout equipage requis a un conquerent. Par le corbieu Hespaigne se rendra, car ce ne sont que madourrez. Passerez par l’estroict de Sybille, et la erigerez deux colunnes plus magnificques que celles de Hercules, a perpetuelle memoire de vostre nom. Et sera nomme cestuy destroict la mer Picrocholine. Passee la mer Picrocholine, voicy Barberous

Page [115]

se qui se rend vostre esclave. Je (dist Picrochole) le prandray a mercy. Voyre (dirent ilz) pourveu qu’il se face baptizer. Et oppugnerez les royaulmes deTunic, de Hippes, hardiment toute Barbarie. En passant oultre retiendrez en vostre main Majorque, Minorque, Sardaine, Corsicque, et aultres isles de la mer Ligusticque et Baleare. Coustoyant a gausche, dominerez toute la gaule Narbonicque, Provence. et Allobroges, Genes, Florence, Lucques, et a dieu seas Rome. Le pouvre monsieur du pape meurt desja de peur. (Par ma foy dist Picrochole, je ne luy baiseray ja sa pantoufle) Prinze Italie voyla Naples, Calabre, Apoulle et Sicile toutes a sac. et Malthe avecq. Je vouldrois bien que les plaisans chevaliers jadicts Rhodiens vous resistassent, pour veoir de leur urine. Je yroys (dist Picrochole) voluntiers a Laurette. Rien, rien, dirent ilz, ce sera au retour. De la prendrons Candie, Cypre, Rhodes, et les isles Cyclades. et donnerons sus la Moree. Nous la tenons. Sainct Treignan dieu gard Hierusalem. car le Soubdan n’est pas comparable a vostre puissance. Je (dist il) feray doncques bastir le temple de Salomontemple de SalomonSalomon. Non dirent ilz, encores. attendez un peu: ne soyez jamais tant soubdain a vos entreprises, Scavez vous que disoit Octa vien

Page [116]

Auguste ? Festina lente. Il vous convient premierement avoir L’asie minour, Carie, Lycie, Pamphilie, Cilicie, Lydie, Phrygie, Mysie, Betune, Charazie, Satalie, Samagari, Castamena, Luga, Savasta : jusques a Euphrates. Voyrons nous, dist Picrochole, Babylone, et le mont Sinay ? Il n’est, dirent ilz, ja besoing pour ceste heure. N’est ce pas assez tracasse de avoir oultre passe les monts Caspies, avoir transfrete la mer Hircane, et chevauche les deux Armenies, et les troys Arabies ? Par ma foy, dist il, nous sommes affolez. Ha pauvres gens (Quoy? dirent ilz) Que boyrons nous par ces desers? Nous dirent ilz, avons ja donne ordre a tout. Par la mer Siriace vous avez neuf mille quatorze grands naufz chargees des meilleurs vins du monde, elles arriverent a Japhes. La se sont trouvez vingt et deux cent mille chameaux, et seize cens Elephans, lesquelz avez prins a une chasse environ Sigeilmes, lors que entrastes en Lybie : et d’abondant eustes toute la Caravane de Lamecha. Ne vous fournirent ilz pas de vin a suffisance? Voyre mais, dist il, nous ne beumez poinct frais. Ha, dirent ilz, par la vertus non pas d’un petit poisson un preux, un conquerent, un pretendent et aspirant a l’empire univers, ne peut pas tousjours avoir ses aizes. Dieu soit loue que estez venu vous et voz gens saufz et entiers jusques au fleuve du Tigre. Mais dist il, que faict ce pendent la part de nostre armee qui desconfit ce villain humeux Grandgousier ? Ilz ne chomment pas dirent ilz, nous les rencontrerons tantost/ Ilz vous ont pris Bretaigne, Normandie, Flandres, Haynault, Barband, Artoys, Hollande, Selande, ilz ont passe le Rhein par sus le ventre des Sueves et Lancquenetz, et part d’entre eulx ont dompte Luxembourg : Lorraine, la Champaigne, Savoye, jusques a Lyon, auquel lieu ont trouve voz garnisons retournans des conquestes navales de la mer Mediterranee. Et se sont reassemblez en Boheme, apres avoir mys a sac Soueve, Vuitemberg, Bavieres, Austriche, Moravie et Stirie. Puis ont donne fierement ensemble sus Lubek, Norvverge, Svveden, Richz, Dace, Gotthic, Engroneland, les Estrelins, jusques a la Mer Glaciale. Et ce faict conquesterent les Isles Orchades, et subjuguerent Escosse, Angleterre, et Irlande. De la navigans par la Mer sabuleuse, et par les Sarmates, ont vaincu et domine Prussie, Polonie, Lithvanie, Russie, Valache, la Transsylvane, et Hongrie, Bulgarie, Turquie, et sont a Constantinople. Allons nous, dist Picrochole, rendre a eulx, le plus toust. car je veulx estre aussi empereur de Thebizonde. Ne tuerons nous pas tous ces chiens Turcs et Mahumetistes? Que diable, dirent ilz, ferons nous doncques? Et donnerez leurs biens et terres, a ceulx qui vous auront servy honnestement. La raison, dist il, le veult. c’est equite. Je vous donne la Carmaigne, Surie, et toute Palestine. Ha, dirent ilz, Cyre, c’est du bien de vous: grand mercy. Dieu vous face bien tousjours prosperer. La present estoit un vieux gentil homme esprove en divers hazars, et vray routier de guerre, nomme Echephron, lequel oyant ces propous dist. J’ay grand peur que toute ceste entreprinse sera semblable a la farce du pot au laict, duquel un cordouannier se faisoit riche par resverie: puis le pot casse n’eut de quoy disner. Que pretendez vous par ces belles conquestes? Quelle sera la fin de tant de travaulx et traverses? Ce sera, dist Picrochole, que nous repouserons a noz aises. dont dist Echephron. Ne vault il pas mieulx que des maintenant nous repousons, sans nous mettre en ces hazars? O dist Spadassin, par dieu voicy un bon resveux, mais allons nous cacher ou coing de la cheminee: et la passons avec les dames nostre vie, et nostre temps, a emphiller des perles, ou a filler comme Sardanapalus. Baste, dist Picrochole. passons oultre. Je ne crains que ces diables de legions de Grandgouzier. ce pendent que nous sommes en Mesopotamie, s’ilz nous donnoient sus la queue quel remede? Tresbon, dist Merdaille, une belle petite commission, laquelle vous envoirez es Moscovites, vous mettra en champ, pour un moment cinquante mille combatans d’eslite. O si vous me y faictes vostre lieutenant, je renye la chair, la mort, et le sang. je tueroys un pigne pour un mercier. Je mors, je rue, je frape, je tue. Suz, suz, dist Picrochole, qu’on depesche tout: et qui me ayme si me suyve.