Comment Epistemon qui avoit la couppe testee, feut guery habillement par Panurge. Et des nouvelles des diables, et des damnez. Chapitre. xxx.

Page Fu.118.

Ceste desconfite gigantale parachevee, Pantagruel se retira au lieu des flaccons et appella Panurge, et les aultres, lesquelz se rendirent a luy sains et saulves, excepté Eusthenes lequel un des Geans avoit egraphiné quelque peu au visaige: ainsi qu'il l'esgorgetoit Et Epistemon qui ne se comparoit poinct. Dont Pantagruel fut si dolent qu'il se voulut tuer soymesmes, mais Panurge luy dict, Dea seigneur attendez un peu, et nous le chercherons entre les mors, et voirons la verite du tout.Ainsi doncques comme ilz cherchoyent, ilz le trouverent tout roidde mort et sa teste entre ses bras toute sanglante.

Lors Eusthenes s'escria Ha male mort, nous as tu tollu le plus parfaict des hommes?A laquelle voix se leva Pantagruel au plus grand dueil qu'on veit jamais au monde. Et dist a Panurge. Ha mon amy l'auspice de vos deux verres et du fust de javeline estoyt

Page [118v]
bien par trop fallace. Mais Panurge dist. Enfans ne pleurez goutte, il est encores tout chault, Je vous le gueriray aussi sain qu'il fut jamais.Ce disant print la teste et la tint sus sa braguette chauldement affin qu'elle ne print vent. Eusthenes et Carpalim porterent le corps au lieu ou ilz avoient bancquette, non par espoir que jamais guerist, mais affin que Pantagruel le veist.Toutesfoys, Panurge le reconfortoit, disant. Si je ne le guery je veulx perdre la teste (qui est le gaige d'un fol) laissez ces pleurs et me aydez.Adonc nectoya tresbien de beau vin blanc le col, et puis la teste: et y synapiza de pouldre de diamerdis qu'il portoit tousjours en une de ses fasques, apres les oignit de je ne scay quel oingnement: et les afusta justement veine contre veine, nerf contre nerf, spondyle contre spondyle, affin qu'il ne feust tortycolly (car telles gens il haissoit de mort) ce faict luy fist a l'entour quinze ou seize poincts de agueille, affin qu'elle ne tumbast
Page Fu 119.
de rechief: puis mist a l'entour un peu d'un unguent, qu'il appelloit resuscitatif. Soubdain Epistemon commenca respirer, puis ouvrir les yeulx, puis baisler, puis esternuer, puis fist un gros pet de mesnage.Dont dist Panurge, a ceste heure est il guery asseurement, et luy bailla a boire un voirre d'un grand villain vin blanc avecques une roustie succree.En ceste faczon feut Epistemon guery habillement, excepté qu'il feut enroué plus de troys sepmaines et eut une toux seiche, dont il ne peut oncques guerir, sinon a force de boire.

Et la commencza a parler, disant. Qu'il avoit veu les diables, avoit parlé a Lucifer familierement, et faict grand chere en enfer. Et par les champs Elisees. Et asseuroit d'avant tous que les diables estoyent bons compaignons. Au regard des damnez, il dist, qu'il estoit bien marry de ce que Panurge l'avoit si tost revocqué en vie. Car je prenois (dist il) un singulier passetemps a les veoir.

Page [119v]

Comment? dist Pantagruel, l'On ne les traicte (dist Epistemon) si mal que vous penseriez: mais leur estat est changé en estrange facon.Car je veis Alexandre le grand qui repetassoit de vieilles chausses, et ainsi gaignoit sa pauvre vie, Xerces crioit la moustarde. Romule estoit saulnier. Numa clouatier. Tarquin tacquin. Piso paisant. Sylla riveran. Cyre estoit vachier. Themistocles verrier. Epaminondas myrallier. Brute et Cassie agrimenseurs. Demosthenes vigneron. Ciceron atizefeu. Fabie enfileur de patenostres. Artaxerces cordier. Eneas meusnier. Achilles teigneux. Agamemnon lichecasse. Ulysses fauscheur.

Page Fu.120.
Nestor harpailleur. Darie cureur de retraictz. Ancus Martius gallefretier. Camillus gallochier. Marcellus esgousseur de febves. Drusus trinquamolle. Scipion Africain cryoit la lye en un sabot. Asdrubal estoit lanternier. Hannibal cocquassier. Priam vendoit les vieulx drapeaulx. Lancelot du lac estoit escorcheur de chevaulx mors.

Tous les chevaliers de la table ronde estoyent pauvres gaingnedeniers tirans la rame pour passer les rivieres de Coccyte, Phlegeton, Styx, Acheron, et Lethe, quand messieurs les diables se voulent esbatre sur l'eau comme font les bastelieres de Lyon et gomdoliers de Venise. Mais pour chascune passade ilz ne ont que une nazarde, et sus le soir quelque morceau de pain chaumeny. Trajan estoit pescheur de Grenoilles, Antonin lacquays.

Page [120v]
Commode gaeytier. Pertinax eschalleur de noys. Luculle grillotier. Justinian bimbelotier. Hector estoit fripesaulce. Paris estoit pauvre loqueteux. Achilles boteleur de foin. Cambyses mulletier. Artaxerces escumeur de potz. Neron estoit vielleux, et Fierabras son varlet: mais il luy faisoit mille maulx, et luy faisoit manger le pain bis, et boire vin poulsé, luy mangeoit et beuvoit du meilleur. Julles Cesar et Pompee estoient guoildronneurs de navires. Valentin et Orson servoient aux estuves d'enfer, et estoient ragletorelz. Giglan et Gauvain estoient pauvres porchiers. Geoffroy a la grand den estoit allumetier Godeffroy de Billon dominotier. Jason estoit manillier. Don Pietre de Castille porteur de rogatons.
Page Fu.121.
Morgant brasseur de byere. Huon de BordeaulxHuon de BordeaulxBordeaulx estoit relieur de tonneaulx. Pirrhus souillart de cuysine Antioché estoit rammoneur de cheminees. Romule estoit rataconneur de bobelins. Octavian ratisseur de papier. Nerva houssepaillier. Le pape Jules crieur de petitz pastez, mais il ne portoit plus sa grande et bougrisque barbe. Jan de ParisJan de ParisParis estoit gresseur de bottes. Artus de BretaigneArtus de BretaigneBretaigne degresseur de bonnetz Perceforest porteur de coustretz. Boniface pape huytiesme estoit escumeur des marmites. Nicolas pape tiers estoit papetier. Le pape alexandre estoit preneur de ratz. Le pape Sixte gresseur de verolle.

Comment? dist Pantagruel, y a il des verollez de par dela? certes dist Epistemon, Je n'en veiz oncques tant, il en y a plus de cent milions. Car croyez que ceulx qui n'ont eu la verolle en ce monde cy, l'ont en l'aultre.

Page [121v]

Cor dieu, dist Panurge, j'en suis doncques quite, Car je y ai este jusques au trou de Gylbathartrou de GylbatharGylbathar, et remply les bondes de Hercules, et ay abatu des plus meures. Ogier le Dannoys estoit frobisseur de harnoys. Le roy Tigranes estoit recouvreur. Galien Restauré preneur de taulpes. Les quatre filz Aymon arracheurs de dentz Le pape Calixte estoit barbier de mau(joinct. Le pape Urbain crocquelardon. Melusine estoit souillarde de cuysine. Matabrune lavandiere de buees. Cleopatra revenderesse d'oignons. Helene courratiere de chamberieres. Semyramis espouilleresse de belistres. Dido vendoit des mousserons. Panthasilee estoit cressonniere. Lucresse hospitaliere. Hortensia filandiere. Livie racleresse de verdet.

En ceste facon ceulx qui avoient este gros Seigneurs en ce monde icy, guain

Page Fu.122.
gnoyent leur pauvre meschante et paillarde vie la bas. Au contraire les philosophes, et ceulx qui avoient este indigens en ce monde, de par dela estoient gros seigneurs en leur tour.Je veiz Diogenes qui se prelassoit en magnificence avec une grand robbe de poulpre, et un sceptre en sa dextre, et faisoit enrager Alexandre le grand, quand il n'avoit bien repetassé ses chausses, et le payoit en grands coups de baston.Je veiz Epictete vestu gualentement a la Francoyse soubz une belle ramee avecques force Damoizelles se rigolant, beuvant, dansant, faisant en tous cas grande chere, et aupres de luy force escuz au soleil. Au dessus de la treille estoient pour sa devise ces vers escriptz.



Saulter, dancer, faire les tours,
Et boyre vin blanc et vermeil:
Et ne faire rien tous les jours
Que compter escuz au soleil.

Lors quand me veit il me invita a

Page [122v]
boire avecques luy courtoisement, ce que je feiz voluntiers, et chopinasmes theologalement. Ce pendent vint Cyre luy demander un denier en l'honneur de Mercure pour achapter un peu d'oignons pour son souper. Rien, rien, dict Epictete, je ne donne poinct deniers. Tien marault, voy la un escu, soys homme de bien. Cyre feut bien aisé d'avoir rancontré tel butin, Mais les aultres coquins de Royx qui sont la bas, comme Alexandre, Daire et aultres le desroberent la nuyct.Je veiz Pathelin thesaurier de Rhadamanthe qui marchandoit des petitz pastez que cryoit le pape Jules, et luy demanda combien la douzaine? troys blancs, dist le pape. Mais dist Pathelin, troys coups de barre, baille icy villain baille, et en va querir d'aultres.Le pauvre pape alloit pleurant, quand il feut devant son maistre patissier, luy dict, qu'on luy avoit osté ses pastez. Adonc le patissier luy bailla l'anguillade si bien que sa peau
Page Fu.123.
n'eust rien vallu a faire cornemuses.

Je veiz maistre Jean le maire qui contrefaisoit du pape, et a tous ces pauvres roys et papes de ce monde faisoit baiser ses piedz, et en faisant du grobis leur donnoit sa benediction, disant, Gaignez les pardons coquins, guaignez, ilz sont a bon marché, Je vous absoulz de pain et de souppe, et vous dispense de ne valoir jamais rien, et appella Caillette et Triboulet, disant. Messieurs les Cardinaulx depeschez leurs bulles, a chascun un coup de pau sus les reins, ce que fut faict incontinent.Je veiz maistre Francoys Villon qui demanda a Xerces, Combien la denree de moustarde? un denier, dist Xerces, a quoy dict ledict de Villon, Tes fievres quartaines villain, la blanchee n'en vault q'un pinard, et tu nous surfaictz icy les vivres. Adonc pissa dedans son bacquet comme font les moustardiers a Paris.

Je veiz le franc archier de Baignolet qui estoit inquisiteur des heretiques.

Page [123v]
Il rencontra Perseforest pissant contre une muraille en laquelle estoit painct le feu de sainct Antoine. Il le declaira heretique, et le eust faict brusler tout vif, n'eust esté Morgant qui pour son proficiat et aultres menuz droictz luy donna neuf muys de biere.Or dist Pantagruel, reserve nous ces beaulx comptes a une aultre foys. Seullement dis nous comment y sont traictez les usuriers?

Je les veis dist Epistemon tous occupez a chercher les espingles rouillees et vieulx cloux parmy les ruisseaulx des rues, comme vous voyez que font les coquins en ce monde. Mais le quintal de ses quinqualleries ne vault que un boussin de pain, encores y en a il maulvaise depesche, ainsi les pauvres malautruz sont aulcunesfoys plus de troys sepmaines sans manger morceau ny miette, et travaillent jour et nuict attendant la foyre a venir: mais de ce travail et de malheurté y ne leur souvient tant ilz sont actifz et mauldictz, pourveu

Page Fu.124.
que au bout de lan ilz gaignent quelque meschant denier.Or dict Pantagruel, faisons un transon de bonne chere, et beuvons je vous en prie enfans: car il faict beau boire tout ce moys.Lors degainerent flaccons a tas, et des munitions du camp feirent grande chere. Mais le pauvre roy Anarche ne se povoit esjouyr. Dont dist Panurge, De quel mestier ferons nous monsieur du roy icy? affin qu'il soit ja tout expert en l'art quand il sera de par dela a tous les diables. Vrayement, dist Pantagruel, c'est bien advisé a toy, or fais en a ton plaisir: je le te donne. Grand mercy, dist Panurge, le present n'est de refus et l'ayme de vous.

Réel    Hypothétique    Fictif    Mythique   
Région, contrée    Ville, village    Bâtiment    Étendue, cours d'eau    Montagne, île, ...    Autre