Comment Pantagruel deffit les troys cens Geans armez de pierre de taille. Et Loupgarou leur capitaine. Chap. xxviiij.

Les Geans voyans que tout leur camp estoit noyé emporterent leur Roy Anarche a leur col le mieulx qu'ilz peurent hors du fort, comme fist Eneas son pere Anchises de la conflagration de Troye.Lesquelz quand Panurge apperceut, dist a Pantagruel. Seigneur voyez la les Geans qui sont yssuz, donnez dessus a vostre mast gualantement a la ville escrime. Car c'est a ceste heure qu'il se fault monstrer homme de bien. Et de nostre cousté nous ne vous fauldrons. Et hardiment que je vous en tueray beaucoup, Car quoy? David

tua bien Goliath facillement, Et puis ce gros paillard Eusthenes qui est fort comme quatre beufz, ne si espargnera. Prenez couraige, chocquez a travers d'estoc et de taille.Or dist Pantagruel, de couraige j'en ay pour plus de cinquante francs. Mais quoy? Hercules ne ausa jamais entreprendre contre deux.

C'est dist Panurge, bien chié en mon nez, vous comparez vous a Hercules ? vous avez par dieu plus de force aux dentz, et plus de sens au cul, que n'eut jamais Hercules en tout son corps et ame. Autant vault l'homme comme il sestime. Eulx disans ces parolles, voicy arriver Loupgarou avecques tous ses Geans, Lequel voyant Pantagruel seul, feut esprins de temerite et oultrecuidance, par espoir qu'il avoit de occire le pauvre bon hommet.Dont dict a ses compaignons Geans. Paillars de plat pays, par Mahon si aulcun de vous entreprent combatre contre ceulx cy, je vous feray mourir cruellement. Je veulx

que me laissiez combatre seul: ce pendent vous aurez vostre passetemps a nous regarder.Adonc se retirerent tous les Geans avecques leur Roy la aupres ou estoient les flaccons, et Panurge et ses compaignons avecques eulx, qui contrefaisoit ceulx qui ont eu la verolle, car il tordoit la geule et retiroit les doigts, et en parolle enrouee leur dist, Je renie bieu compaignons, nous ne faisons poinct la guerre donnez nous a repaistre avecques vous ce pendent que noz maistres s'entrebatent.A quoy voluntiers le Roy et les Geans consentirent, et les firent bancqueter avecques eulxCe pendent Panurge leur contoit les fables de Turpin, les exemples de sainct Nicolas, et le conte de la Ciguoingne.

Loupgarou doncques s'adressa a Pantagruel avec une masse toute d'acier pesante neuf mille sept cens quintaulx deux quarterons d'acier de Calibes, au bout de laquelle estoient treze poinctes de dyamans, dont la moindre estoit

aussi grosse comme la plus grande cloche de nostre dame de Parisdame de ParisParis, (il s'en failloit par adventure l'espesseur d'un ongle, ou au plus que je ne mente, d'un doz de ces cousteaulx qu'on appelle couppeaureille: mais pour un petit, ne avant ne arriere) Et estoit pheée en maniere que jamais ne pouvoit rompre, mais au contraire, tout ce qu'il en touchoit rompoit incontinent.Ainsi doncques comme il approuchoit en grande fierté, Pantagruel jectant ses yeulx au ciel se recommanda a Dieu de bien bon cueur, faisant veu tel comme s'ensuyt. Seigneur dieu qui tousjours as esté mon protecteur et mon servateur, tu vois la destresse en laquelle je suis maintenant. Rien icy ne me amene, sinon zele naturel, ainsi comme tu as octroyé es humains de garder et defendre soy, leurs femmes, enfans, pays, et famille, en cas que ne seroit ton negoce propre qui est la foy, car en tel affaire tu ne veulx coadjuteur: sinon de confession catholicque, et service de ta parolle: et nous as defendu toutes armes et defences: car tu es le tout puissant, qui en ton affaire propre, et ou ta cause propre est tiree en action, te peulx defendre trop plus qu'on ne scauroit estimer: toy qui as mille milliers de centaines de milions de legions d'anges duquel le moindre peut occire tous les humains, et tourner le ciel et la terre a son plaisir, comme jadys bien apparut en l'armee de Sennacherib. Doncques s'il te plaist a ceste heure me estre en ayde, comme en toy seul est ma totale confiance et espoir. Je te fais veu que par toutes contrees tant de ce pays de Utopie que d'ailleurs, ou je auray puissance et auctorité, Je feray prescher ton sainct Evangile, purement, simplement, et entierement, si que les abus d'un tas de papelars et faulx prophetes, qui ont par constitutions humaines et inventions depravees envenimé tout le monde: seront d'entour moy exterminez.Alors feut ouye une voix du ciel, disant, Hoc fac et vinces, c'est a dire, Fais ainsi, et tu auras victoire.Puys voyant Pantagruel que Loupgarou approcheoit la gueulle ouverte, vint contre luy hardiment et s'escrya tant qu'il peut. A mort ribault a mort, pour luy faire paour, selon la discipline des Lacedemoniens, par son horrible cry.Puis luy getta de sa barque, qu'il portoit a sa ceincture, plus de dix et huyct cacques et un minot de sel, dont il luy emplit et gorge et gouzier, et le nez et les yeulx.De ce irrité Loupgarou, luy lancea un coup de sa masse, luy voulant rompre la cervelle.

Mais Pantagruel feut habille et eut tousjours bon pied et bon oeil, par ce demarcha du pied gauche un pas arriere, mais il ne sceut si bien faire que le coup ne tumbast sur la barque, laquelle rompit en quatre mille octante et six pieces et versa la reste du sel en terre.

Quoy voyant Pantagruel gualentement ses bras desplie et comme est l'art de la hasche, luy donna du gros bout

sur son mast, en estoc au dessus de la mammelle, et retirant le coup a gauche en taillade luy frappa entre col et collet puis avanceant le pied droict luy donna sur les couillons un pic du hault bout de son mast, a quoy rompit la hune, et versa troys ou quatre poinsons de vin qui estoient de reste.Dont Loupgarou pensa qu'il luy eust incise la vessie, et du vin que se feust son urine qui en sortist.

De ce non contant Pantagruel vouloit redoubler au coulouoir: mais Loupgarou haussant sa masse avancea son pas sur luy, et de toute sa force la vouloit enfoncer sur Pantagruel : de faict en donna si vertement que si dieu n'eust secouru le bon Pantagruel, il l'eust fendu despuis le sommet de la teste jusques au fond de la ratelle: mais le coup declina a droict par la brusque hastiveté de Pantagruel Et entra sa masse plus de soixante et treize piedz en terre a travers un gros rochier, dont il feist sortir le feu plus gros que neuf mille six tonneaux.

Voyant Pantagruel, qu'il s'amusoit a tirer sadicte masse qui tenoit en terre entre le roc, luy court sus, et luy vouloit avaller la teste tout net: mais son mast de male fortune toucha un peu au fust de la masse de Loupgarou qui estoit pheée (comme avons dict devant) par ce moyen, son mast luy rompit a troys doigtz de la poignee. Dont il feut plus estonné q'un fondeur de cloches et s'escria. Ha Panurge ou es tu?Ce que ouyant Panurge, dict au Roy et aux Geans. Par dieu ilz se feront mal, qui ne les departira. Mais les Geans estoient aises comme s'ilz feussent de nopces.

Lors Carpalim se voulut lever de la pour secourir son maistre: mais un Geant luy dist. Par Golfarin nepveu de Mahon, si tu bouges d'icy je te mettray au fond de mes chausses comme on faict d'un suppositoire, aussi bien suis je constipé du ventre, et ne peulx gueres bien cagar, sinon a force de grincer les dentz.Puis Pantagruel ainsi

destitué de baston, reprint le bout de son mast, en frappant torche lorgne, dessus le Geant, mais il ne luy faisoit mal en plus que feriez baillant une chicquenaude sus un enclume de forgeron. Ce pendent Loupgarou tiroit de terre sa masse et l'avoit ja tiree et la paroit pour en ferir. Pantagruel qui estoit soubdain au remuement et declinoit tout ses coups jusques a ce que une foys voyant que Loupgarou le menassoit, disant meschant a ceste heure te hascheray je comme chair a pastez. Jamais tu ne altereras les pauvres gens. Pantagruel le frappa du pied un si grand coup contre le ventre, qu'il le getta en arriere a jambes rebindaines, et vous le trainnoyt ainsi a l'escorche cul plus d'un traict d'arc. Et Loupgarou s'escrioit rendant le sang par la gorge. Mahon, Mahon, Mahon.

A quelle voix se leverent tous les Geans pour le secourir. Mais Panurge leur dist. Messieurs n'y alez pas si m'en croyez: car nostre maistre est fol, et

frappe a tors et a travers, et ne regarde poinct (ou) il vous donnera malencontre.

Mais les Geans n'en tindrent compte, voyant que Pantagruel estoit sans baston: Lors que aprocher les veid Pantagruel, print Loupgarou par les deux piedz et son corps leva comme une picque en l'air et d'icelluy armé d'enclumes frappoit parmy ces Geans armez de pierres de taille, et les abbatoit comme un masson faict de couppeaulx, que nul arrestoit devant luy qu'il ne ruast par terre.Dont a la rupture de ces harnoys pierreux feut faict un si horrible tumulte qu'il me souvint, quand la grosse tour de beurre qui estoit a sainct Estienne de Bourgessainct Estienne de BourgesBourges, fondit au soleil. Panurge ensemble Carpalim et Eusthenes ce pendent esgorgetoyent ceulx qui estoyent portez par terre.Faictez vostre compte qu'il n'en eschappa un seul, et a veoir Pantagruel sembloit un fauscheur, qui de sa faulx (c'estoit Loupgarou) abbatoit l'herbe d'un pré (c'estoyent

les Geans.)Mais a ceste escrime, Loupgarou perdit la teste, ce feut, quand Pantagruel en abatit un, qui avoit nom Riflandouille, qui estoit armé a hault appareil, c'estoit de pierres de gryson, dont un esclat couppa la gorge tout oultre a Epistemon : car aultrement la plus part d'entre eulx estoyent armez a la legiere, c'estoit de pierre de tuffe, et les aultres de pierre ardoyzine.Finablement voyant que tous estoient mors getta le corps de Loupgarou tant qu'il peut contre la ville, et tomba comme une grenoille, sus ventre en la place mage de ladicte ville: et en tombant du coup tua un chat brusle, une chatte mouillée, une canne petiere, et un oyson bridé.