Comment Pantagruel entra en la ville des Amaurotes Et comment Panurge maria le roy Anarche, et le feist cryeur de saulce vert. Cha. xxxj.

Apres celle victoire merveilleuse Pantagruel envoya Carpalim en la ville des Amaurotes dire et annoncer comment le Roy Anarche estoit prins, et tous leurs ennemys defaictz. Laquelle nouvelle entendue, sortirent au devant de luy tous les habitans de la ville en bon ordre et en grande pompe triumphale, avecques une liesse divine et le conduirent en la ville. Et furent faictz beaulx feuz de joye par toute la ville, et belles tables rondes garnies de force vivres dressees par les rues. Ce feut un renouvellement du temps de Saturne, tant y fut faicte lors grande chere. Mais Pantagruel tout le senat ensemble, dist Messieurs ce pendent que le fer est chault il le fault batre, pareillement devant que nous debaucher davantaige, je veulx que allions prendre d'assault tout le Royaulme des Dipsodes. Pourtant ceulx qui avecques

moy vouldront venir, se aprestent a demain apres boire: car lors je commenceray marcher. Non qu'il me faille gens davantaige pour me ayder a le conquester: car autant vauldroit que je le tinse desja: mais je voy que ceste ville est tant pleine des habitans qu'ilz ne peuvent se tourner par les rues. Doncques je les meneray comme une colonie en Dipsode, et leur donneray tout le pays, qui est beau, salubre, fructueux, et plaisant sus tous les pays du monde, comme plusieurs de vous scavent qui y estes allez aultreffoys. Un chascun de vous qui y vouldra venir soit prest comme j'ay dict.

Ce conseil et deliberation fut divulgue par la ville, et au lendemain se trouverent en la place devant le palais jus ques au nombre de dixhuyct cens cinquante et six mille, et unze sans les femmes et petitz enfans. Ainsi commencerent a marcher droict en Dipsodie en si bon ordre qu'ilz ressembloyent es enfans d' israel quand ilz partirent de

Egypte pour passer la mer rouge.

Mais d'avant que poursuyvre ceste entreprinse je vous veulx dire comment Panurge traicta son prisonnier le roy Anarche Il luy souvint de ce que avoit raconté Epistemon comment estoient traictez les Roys et riches de ce monde par les champs Elisees, et comment ilz gaignoient pour lors leur vie a vilz et salles mestiers.Pourtant un jour habilla sondict Roy d'un beau petit pourpoint de toille tout deschicquete comme la cornette d'un Albanoys, et de belles chausses a la mariniere, sans souliers: car (disoit il) ilz luy gasteroient la veue, et un petit bonnet pers avecques une grande plume de chappon. Je faulx, car il m'est advis qu'il y en avoit deux, et une belle ceincture de pers et vert, disant que ceste livree luy advenoit bien, veu qu'il avoit este pervers.En tel poinct l'amena davant Pantagruel, et luy dist. Congnoissez vous ce rustre? Non certes, dist Pantagruel. C'est monsieur

du Roy de troys cuittes.Je le veulx faire homme de bien: ces diables de roys icy ne sont que veaulx, et ne scavent ny ne valent rien, sinon a faire des maulx es pauvres subjectz, et a troubler tout le monde par guerre pour leur inique et detestable plaisir.Je le veulx mettre a mestier, et le faire crieur de saulce vert Or commence a cryer, Vous fault il poinct de saulce vert? Et le pauvre diable cryoit, C'est trop bas, dist Panurge et le print par l'aureille, disant. Chante plus hault en .g. sol re ut. Ainsi, diable tu as bonne gorge, tu ne fuz jamais si heureux que de n'estre plus roy.Et Pantagruel prenoit a tout plaisir. Car je ause bien dire que c'estoit le meilleur petit bon homme qui fust d'icy au bout d'un baston.Ainsi feut Anarche bon cryeur de saulce vert.Deux jours apres Panurge le maria avecques une vieille lanterniere, et luy mesmes fist les nopces a belles testes de mouton, bonnes hastilles a la moustarde, et beaulx tribars aux ailz, dont il en envoya cinq sommades a Pantagruel, lesquelles il mangea toutes tant il les trouva appetissantes, et a boire belle piscantine et beau cormé. Et pour les faire dancer, loua un aveugle qui leur sonnoit la note avecques sa vielle.Apres disner les amena au palais et les monstra a Pantagruel, et luy dist monstrant la mariee, Elle n'a garde de peter. Pourquoy? dist Pantagruel.Pource, dist Panurge, qu'elle est bien entamee. Quelle parolle est cela? dist Pantagruel. Ne voyez vous, dist Panurge, que les chastaignes qu'on faict cuire au feu, si elles sont entieres elles petent que c'est raige: et pour les engarder de peter l'on les entame. Aussi ceste nouvelle mariee est bien entamee par le bas, ainsi elle ne petera poinct

Pantagruel leur donna une petite loge aupres de la basse rue, et un mortier de pierre a piller la saulce. Et firent en ce poinct leur petit mesnage: et feut aussi gentil cryeur de saulce vert qui feust

oncques veu en Utopie, Mais l'on m'a dict despuis que sa femme le bat comme plastre, et le pauvre sot ne se ause defendre, tant il est nies.