¶Comment Gargantua fut unze moys porté au ventre de sa mere. Chap. iii.

Grandgouzier estoit bon raillard en son temps, aymant a boyre net autant que homme qui pour lors feust on mon de, et mangeoyt volentiers salé. A ceste fin avoit ordinairement bonne munition de jambons de Magence et de Baionne, force langues de beuf fumees, abondance de andouilles en la saison et beuf salé a la moustarde. Renfort de bou targues, provision de saulcisses, non de

Bouloigne (car il craignoit ly bouconé de Lombard) mais de Bigorre, de Lonquaulnay, de la Brene, et de Rouargue. En son eage virile espousa Gargamelle fille du roy des Parpaillos, belle gouge et de bonne troigne. Et faisoient eulx deux souvent ensemble la beste a deux douz, joyeusement se frotans leur lard, tant qu’elle engroissa d’un beau filz, et le porta jusques a l’unziesme mois. Car autant, voire d’adventage, peuvent les femmes ventre porter, mesmement quand c’est quelque chef d’oeuvre, et personnage qui doibve en son temps faire grandes prouesses. Come dict Homere que l’enfant (du quel Neptune engroissa la nymphe) nasquit l’an apres revolu: ce fut le douziesme mois, car (come dict Aule Gelle lib. 3.) ce long temps convenoit a la majesté de Neptune, affin qu’en icelluy l’enfant feust forme a perfection. A pareille raison Jupiter feist durer .xlviii heures la nuyct qu’il coucha avecques Alcmene. Car en moins de temps n’eust il peu forger Hercules : qui nettoia le monde de monstres et tirans. Messieurs les anciens Pantagruelistes ont conformè ce que je dis, et ont declairé non seulement possible, mais aussi legitime l’enfant nè de femme l’unziesme moys apres la mort de son mary. Hyppocrates lib. de alimento. Pline, li. 7 cap. 5. Plaute in Cistellaria. Marcus Varro en la satyre inscripte, Le Testament, allegant l’autoritè d’Aristoteles a ce propous. Censorinus li. de die natali. Aristoteles lib. vii. cap. iii et iiii. de nat. animalium. Gellius li. iii. ca. xvi. Et mile aultres folz. Le nombre desquelz a esté par les legistes acreu. ff. de suis et legit. l. Intestato. § fi. Et in autent. de restitut et ea que parit in. vi. mens. D’abondant en ont chaffourre leur robidilardicque loy Gallus. ff. de lib. et posthu. et l. Septimo. ff. de stat. homi. et quelques aultres, que pour le present dire n’ause. Moienans lesquelles loys, les femmes veuves peuvent franchement jouer du serrecropiere a tous enviz et toutes restes, deux moys apres le trespas de leurs mariz. Je vous prie par grace vous aultres mes bons averlans, si d’icelles en trouvez que vaillent le des braguetter, montez dessus et me les amenez. Car si on troisiesme moys elles en groissent: leur fruict sera heritier du def funct. Et la groisse congneue, poussent hardiment oultre, et vogue la gualee, puis que la panse est pleine. Comme Julie fil le de l’empereur Octavian ne se abandonnoyt a ses taboureurs, sinon quand elle se sentoyt grosse, a la forme que la navire ne recoyt son pilot, que premierement ne soyt callafatee et chargee. Et si personne les blasme de soy faire rataconniculer ainsi suz leur groisse: veu que les bestes suz leurs ventrees n’endurent jamais le mas le masculant: elles responderont que ce sont bestes, mais elles sont femmes: bien entendentes les beaulx et joyeux menuz droictz de superfetation: come jadis respondit Populie scelon le raport de Macrobe li. ii Saturnal. Si le diavol ne veult qu’elles engroissent, il fauldra tortre le douzil, et bouche clause.