Page 73

Comment Panurge patrocine a l’ordre des fratres Mendians. Chapitre XXII.

Issant de la Chambre de Raminagrobis, Panurge comme tout effrayé dist. Je croy par la vertus Dieu qu’il est Haereticque ou je me donne au Diable. Il mesdict des bons peres mendians Cordeliers, et Jacobins, qui sont les deux hemisphaeres de la Christianté, et par la gyrognomonique circumbilivagination desquelz comme par deux filopendoles coelivages, tout l’Antonomatic matagrabolisme de l’eclise Romaine, soy sentente emburelucoquée d’aulcun baraguouïnage d’erreur ou de haeresie, homocentricalement se tremousse. Mais que tous les Diables luy ont faict les paouvres Diables de Capussins, et Minimes? Ne sont ilz assez meshaignez les paouvres diables? Ne sont ilz assez enfumez et perfumez de misere et calamité les paouvres haires extraictz de Ichthyophagie? Est il, frere Jan, par ta foy, en estat

Page [73v]
de salvation? Il s’en va par Dieu damné comme une serpe a trente mille hottées de Diables. Mesdire de ces bons et vaillans piliers d’eclise? Appelez vous cela fureur poëticque? Je ne m’en peuz contenter: il peche villainement, il blaspheme contre la religion. J’en suys fort scandalisé. Je (dist frere Jan) ne m’en soucie d’un bouton. Ilz mesdisent de tout le monde: si tout le monde mesdit d’eulx, je n’y pretends aulcun interest. Voyons ce qu’il a escript.

Panurge leut attentement l’escripture du bon vieillart: puys leurs dist. Il resve le paouvre Beuveur. Je l’excuse toutesfoys. Je croy qu’il est pres de sa fin. Allons faire son epitaphe. Par la response qu’il nous donne, je suys aussi saige que oncques puys ne fourneasmes nous. Escoute ça Epistemon mon bedon. Ne l’estimez tu pas bien resolu en ses responses? Il est par Dieu sophiste argut, ergoté, et naïf. Je guaige qu’il est Marrabais. Ventre beuf comment il se donne guarde de mesprendre en ses parolles. Il ne respond que par disjonctives. il ne peult ne dire vray. Car a la verité d’icelles suffist l’une partie estre vraye. O quel Patelineux. Sainct Iago

de Bressuire Sainct Iago Page 74de BressuireSainct IagoBressuire, en est il encores de l’eraige? Ainsi (respondit Epistemon) protestoit Tiresias le grand Vaticinateur au commencement de toutes ses divinations, disant apertement a ceulx qui de luy prenoient advis. Ce que je diray, adviendra, ou ne adviendra poinct. Et est le style des prudens prognosticqueurs. Toutesfoys (dist Panurge) Juno luy creva les deux oeilz. Voyre (respondit Epistemon) par despit de ce que il avoit mieulx sententié que elle, sus le doubte propousé par Juppiter. Mais (dist Panurge) quel Diable possede ce maistre Raminagrobis, qui ainsi sans propous, sans raison, sans occasion, mesdict des paouvres beatz peres Jacobins, Mineurs, et Minimes? Je en suys grandement scandalisé, je vous affie, et ne me en peuz taire. Il a grefvement peché. Son ame s’en va a trente mille panerées de Diables. Je ne vous entends poinct (respondit Epistemon). Et me scandalisez vous mesmes grandement, interpretant perversement des fratres Mendians, ce que le bon Poëte disoit des bestes noires, fauves, et aultres. Il ne l’entend (scelon mon jugement) en telle sophisticque
Page [74v]
et phantasticque allegorie. Il parle absolument et proprement des pusses, punaises, cirons, mousches, culices, et aultres telles bestes: les quelles sont unes noires, aultres fauves, aultres cendrées, aultres tannées et basanées: toutes importunes, tyrannicques, et molestes, non es malades seulement, mais aussi a gens sains et viguoureux. Par adventure a il des Ascarides, Lumbriques, et Vermes dedans le corps. Par adventure patist il (comme est en AEgypte, et lieux confins de la mer Erithrée, chose vulgaire et usitée) es bras ou jambes quelque poincture de Draconneaulx grivolez, que les Arabes appellent Meden. Vous faictez mal aultrement expousant ses parolles. Et faictez tord au bon Poëte par detraction, et es dictz Fratres par imputation de tel meshain. Il fault tousjours de son presme interpreter toutes choses a bien.

Aprenez moy (dist Panurge) a congnoistre mousches en laict. Il est par la vertus Dieu haereticque. Je diz haereticque formé, haereticque clavelé, haereticque bruslable, comme une belle petite horologe. Son ame s’en va a trente mille charrettées

Page 75
de Diables. Sçavez vous ou? Cor Bieu mon amy droict dessoubs la scelle persée de Proserpine, dedans le propre bassin infernal, on quel elle rend l’operation fecale de ses clysteres, a cousté guausche de la grande chauldiere, a trois toises prés les gryphes de Lucifer, tirant vers la chambre noire de Demiourgon. Ho le villain.

Real    Hypothetical    Fictional    Mythical   
Region, area    Town, village    Building    Water (lakes, rivers, etc.)    mountains, islands, ...    Other