Comment les oiseaux de l’ Isle sonante estoient tous passagers.

Mais dist Pantagruel veu qu’exposé nous avez que des Cardingaux naist Papegault, les Cardingaulx des Evesquesgaulx, les Evesquesgaulx des Prestresgaulx, et les Prestresgaulx des Clerczgaulx. Ils sont, dit Editus tous oyseaulx de passaige, et nous viennent de l’autre monde, part d’une contree grande a merveille, laquelle on nomme jour sans pain, part d’une autre vers le Ponant, laquelle

on nomme trop d’iceulx. De ces deux contrees avons aboutees.

Ces clerczgaulx icy nous viennent laissans pere et mere, et tous amys et parens. La maniere est telle, quant en ceste contree derniere y a trop d’iceulx enfans, soyent masles, soyent femelles, de sorte que qui a tous part seroit de l’heritage comme raison le veult, nature l’ordonne, et Dieu le commande, la maison seroit dissipee. C’est l’occasion pourquoy les parens s’en deschargent: en ceste isle mesmement s’ils sont des appennaiges de l’isle Bossart. C’est, dist Panurge, L’isle Bouchart lez Chinon, je diz Bossart, respondit Editus : car ordinairement ils sont bossuz, borgnes, boiteux, manchotz, podagres, contrefaicts et maleficiez, poix inutile de la terre. C’est, dist Pantagruel, coustume du tout contraire es institutions jadis observees a la reception des pucelles Vestalles, par lesquelles, comme atteste Antistius Laber, estoit deffendu a ceste dignité eslire fille qui eust vice aucun en l’ame, ou en ses sens diminution, ou en son corps tache quelconque, tant fust elle occulte ou petite. Je m’esbahis dist Editus : Comment les meres de pardela les portent neuf moys en leurs flancs, veu qu’en leur maison elles ne les peuvent porter ny pastir

neuf ans, non pas sept le plus souvent: en leur mettant une chemise seulement sur la robbe et sur le sommet de la teste, leur couppant je ne sçay quants cheveulx avecques je ne sçay quelles parolles apotrophees et expiatoires, comme entre les Ethiopiens certaines linoscolies et rasures. Estans crees les Isiacques visiblement, appertement et manifestement par metamorphose Pythagoricque, visiblement sans lesions ny blesseure aucune, les font oyseaulx tels que presentement les voyez, ne scay toutesfois beaux amys que peut estre, et d’ou vient que les femelles soyent clergesses, monagesses ne abbegesses, ne chantent motets plaisans et choristeres, comme on souloit faire a Horomages, par l’institution de Zoroaster : mais Catarates et Sytrophees comme on faisoit au demon Arimanian, et font continuelle devotion de leurs parens et amys, qui en oyseaulx les transformerent, je dis autant vieilles que jeunes. Plus grand nombre nous en vint de jour sans pain qui est excessivement long: car les Asaphsars habitans d’icelle contree, quand sont en danger de partir mallesuade de faim par non avoir dequoy soy alimenter, et ne scavoir ou vouloir rien faire ne travailler en quelque honneste art ou mestier, ne aussi feablement a gens de bien, soy asservir. Ceulx aussi qui n’ont peu jouir de leurs amours, qui ne sont parvenuz a leurs entreprinses en ont desesperez: ceux pareillement qui meschantement ont commis quelque cas de crime et desquels ont cerché pour a mort ignominieusement mettre, tous advolent icy, Icy ont leur vie assignee, Icy demeurent gras comme glirons qui paravant estoient maigres comme pies, icy ont parfaicte seureté indamnité et franchise. Mais demandoit Pantagruel, ces beaux oiseaux icy une fois advolez retournent-ils jamais plus au monde ouquel ils furent pounuz? Quelques uns respondit Editus, quelquesfois jadis bien peu, bien a tard, et a regret. Depuis certaines eclipses s’en est vollé une grande mouee par vertu de certaines constellations celestes. Cela de rien ne nous melencollie, le demourant n’en a que plus grande pittance. Et lors avant que revoller ont leurs pennaiges laissé parmy ces orties et espines. Nous en trouvasmes quelques uns reallement, et en recherchant d’aventure trouvasmes un pot aux roses descouvert.