Comment les oyseaulx gourmandeurs sont mutz en l’ isle Sonante.

Il n’avoit ces motz achevez quand pres nous advolerent vingtcinq ou trente oyseaulx de couleur et pennaige qu’encores n’avions veuz en l’isle, leur pennaige estoit changeant d’heure en heure, comme la peau d’un Chamaleon, ou comme la fleur de tripolion, ou teucrion, et tous avoyent au dessoubs de l’aille gauche une merque comme de deux diametres mypartissant un cercle, ou d’une ligne parpendiculaire tombant sur une ligne droicte. A tous estoit presque d’une forme: mais non a tous d’une couleur: es uns estoit bleue, es autres verde, es autres rouge, es autres violette, et es autres blanche. Qui sont, demanda Panurge, ceulx cy et comment les nommez? Ils sont, respondit Editus metiz, et les appellons gourmandeurs, et ont grand nombre de riches gourmanderies en vostre monde. Je vous prie dis-je, faites les un peu chanter, afin qu’entendions leur voix, ils ne chantent jamais, mais ils repaissent au double en recompense, Ou sont, demandois-je, les femelles? ils n’en ont point, respondit-il. Comment doncques infera Panurge, sont-ils ainsi crousteleurs, et tous mangez de grosse verolle? Elle est propre a ceste espece d’oyseaulx, a cause de la marine qu’ils hantent quelquesfois. Plus nous dist le motif de leur venue icy pres de vous est pour

veoir si parmy vous recognoistront une magnifique espece de gaulx et de gotz, oyseaulx de proye terribles, non toutesfois venans au leurre, ny recongnoissans le gand: lesquels ils disent estre en vostre monde. Et d’iceulx les uns portent gectz aux jambes bien beaux et precieux, avecques inscription aux varvelles, par laquelle qui mal y pensera est condamné d’estre soubdain conchié. Autres au devant de leur pennaige portent le trophee d’un calomniateur, et autres y portent une peau de belier. Maistre Anthitus, dist Panurge, il peut bien estre, mais nous ne les congnoissons mye. Ores, dist Editus, c’est assez parlamenté, allons boyre, mais repaistre, dist Panurge : repaistre, dist Editus, ou bien boyre, moictié au pair, et moictié a la couche. Allons, rien n’est si cher ne si precieux que le temps, employons-le a bonnes oeuvres. Mener il nous voulut premierement dans les thermes des Cardingaulx, belles et delicieuses souverainement. Puis yssans des baings, nous feist par les Aliptes oindre de precieux basmes: mais Pantagruel dist qu’il ne boiroit que trop sans cela. Adonc nous conduisit en un grand et delicieux refrechissoir, et nous dist: Je sçay bien que l’Hermite Braguibus vous a faict jeusner quatre jours, quatre jours serez icy a contrepoinct: sans cesser de boire, et de repaistre. Dormirons nous point ce pendant, demanda Panurge. A vostre liberté, respondit Editus, car qui dort si boit. Vray Dieu quelle chere nous feismes: O le grand homme de bien.