Comment en l' isle sonante n’est qu’un papegault.

Lors demandasmes a maistre Editus veu la multiplication de ces venerables oiseaulx en toutes leurs especes, Pourquoy la n’estoit qu’un Papegault? Il nous respondit que telle estoit l’institution premiere et fatale destinee des astres que des clers-gaulx naissent les Prestres-gaulx et Monegaulx, sans compagnie charnelle, Comme se faict entre les abeilles, des Prestresgaulx naissent Evesquesgaulx, d’iceux les Cardingaux, et les Cardingaux si de mort n’estoient prevenuz finiroient en Pape-gaut, et n’en est ordinairement qu’un comme par les ruches des abeilles, Il n’y a qu’un Roy, et au monde n’est qu’un Soleil, iceluy decedé en naist un autre de toute la race des Cardingaulx sans copulation charnelle, entendez tousjours de sorte qu’il y a en ceste espece unité individue avecques perpetuité de succession ne plus ne moings qu’un Phoenix d’ arabie, vray est qu’il y a environ deux mil sept cens soixante lunes que furent en nature deux Papegaulx produictz mais ce fut la plusgrande calamité qu’on vid onques en ceste Isle, car disoit Editus tous ces oiseaux se pillerent les uns les

aultres et s’entre-pelauderent si bien ce temps durant que l’Isle periclita d’estre spoliee de ses habitans, part d’iceux adherans a un et le soustenant, part a autre et le deffendant demourerent part d’iceux muetz comme poissons et oncques ne chanterent et part de ses cloches comme interdites coup ne sonnerent. Ce seditieux temps durant, a leurs secours evocquerent Empereurs, Rois, Ducs, Marquis, contes, barons et communautez du monde qui habitent ou contiennent en terre ferme et n’eut fin ce chisme et sedition que l’un d’iceux ne fust tollu de vie et la pluralité reduicte a unité, Puis demandasmes que mouvoit ces oiseaux ainsi sans cesse chanter, Editus nous respond que c’estoient ses cloches pendantes au dessus de leurs caiges, Puis nous dist, voullez vous que presentement je face chanter ces oiseaux bardocuculez d’une chausse d’ipocras comme une allouette sauvage, de grace respondismes nous. Lors sonna une cloche six coups seulement et moinesgaulx d’acourir, et moinesgaulx de chanter: dist Panurge, si je sonnois ceste cloche la, ferois-je pareillement chanter ceux-cy qui ont le pennage en couleur de haran soret (Pareillement respondit Editus) Panurge sonna, soudain arriverent ces oiseaux enfumez et chantoient ensemble mais ils avoyent les voix rauques et mal plaisantes, aussi nous remonstra Editus qu’ils ne vivoient que de poisson comme les hayrons et cormorannes du monde et que c’estoit une quinte espece de Cagotz imprimez nouvellement adjousta d’avantage qu’ils avoient eu advertissement par Robert valbringue qui par la nagueres estoit passé, comment du pais d’ aphrique bien tost y devoit advoller une sexte espece lesquels ils nommoient Caputragaulx plus tristes, plus maigres, et plus fascheux qu’espece qui y fust. Aphricque dist Pantagruel est coustumiere de produire choses nouvelles et monstrueuses.