Comment Pantagruel droissa un Trophee en memoire de leur prouesse, et Pa nurge un aultre en memoire des Levraulx. Et comment Pantagruel de ses petz engendroit les petitz hommes, et de ses vesnes les petites femmes. Et comment Panurge rompit un gros baston sur deux verres. Chap. xxvij.

Devant que partions d'icy, dist Pantagruel, en memoire de la prouesse que avez presentement faict, je veulx eriger en ce lieu un beau trophee.Adoncques un chascun d'entre eulx en grande liesse et petites chansonnettes villaticques dresserent un grand boys, auquel y pendirent une selle d'armes, un chanfrain de cheval, des pompes, des estrivieres, des esperons, un haubert, un hault appareil

asseré, une hasche, un estoc d'armes, un gantelet, une masse, des goussetz, des greves, un gorgery, et ainsi de tout appareil requis a un arc triumphal ou Trophee. Puis en memoire eternelle escripvit Pantagruel le dicton victorial comme s'ensuyt.

Ce fut icy qu'apparut la vertus
De quatre preux et vaillans champions,
Qui de bon sens, non de harnois vestuz
Comme Fabie, ou les deux Scipions
Firent six cens soixantes morpions
Puissans ribaulx, brusler comme une escorce:
Prenez y tous Roys, ducz, rocz et pions
Enseignement, que engin mieux vault que force.

Car la victoire
Comme est notoire,
Ne gist que en heur,
Du consistoire
Ou regne en gloire
Le hault seigneur,
Vient, non au plus fort ou greigneur,
Ains a qui luy plaist, com' fault croire:
Doncques a chevanche et honneur
Cil qui par foy en luy espoire.

Ce pendent que Pantagruel escripvoit les carmes susdictz Panurge emmancha en un grand pal les cornes du chevreul, et la peau, et les piedz droitz de devant d'icelluy. Puis les aureilles de troys levraulx, le rable d'un lapin, les mandibules d'un lievre, les aesles de deux bitars, les piedz de quatre ramiers une guedofle de vinaigre, une corne ou ilz mettoient le sel, leur broche de boys, une lardouere, un meschant chauldron tout pertuisé, une breusse ou ilz saulsoient, une saliere de terre, et un guobelet de Beauvoys. Et en imitation des vers et Trophee de Pantagruel escripvit ce que s'ensuyt.

Ce feut icy que mirent abaz culz
Joyeusement quatre gaillars pions,
Pour bancqueter a l'honneur de Baccus
Beuvans a gré comme beaulx carpions,
Lors y perdit rables et cropions
Maistre levrault, quand chascun si efforce:
Sel et vinaigre, ainsi que scorpions,
Le poursuivoyent, dont en eurent, l'estorce.

Car l'inventoire
D'un defensoire.
En la chaleur,
Ce n'est que a boire
Droict et net, voire
Et du meilleur,
Mais manger levrault, c'est malheur
Sans de vinaigre avoir memoire:
Vinaigre est son ame et valeur,
Retenez le en poinct peremptoire.

Lors dist Pantagruel. Allons enfans, c'est trop muse icy a la viande: car a grand poine voit on advenir que grans bancqueteurs facent beaulx faictz d'armes. Il n'est umbre que d'estandartz, il n'est fumee que de chevaulx, et clycquetys que de harnoys. A ce commencza Epistemon soubrire, et dist. Il n'est umbre

que de cuisine, fumee que de pastez, et clicquetys que de tasses.A quoy respondit Panurge. Il n'est umbre que de courtines, fumee que de tetins, et clicquetys que de couillons.Puis se levant fist un pet: un sault, et un sublet, et crya a haulte voix joyeusement, vive tousjours Pantagruel.Ce voyant Pantagruel en voulut autant faire, mais du pet qu'il fist, la terre trembla, neuf lieues a la ronde, duquel avec l'air corrumpu engendra plus de cinquante et troys mille petitz hommes nains et contrefaictz: et d'une vesne qu'il fist, engendra autant de petites femmes acropies comme vous en voyez en plusieurs lieux, qui jamais ne croissent, sinon comme les quehues des vaches, contre bas, ou bien comme les rabbes de Lymousin, en rond.Et quoy dist Panurge, voz petz sont ilz tant fructueux? Par dieu voicy de belles savates d'hommes, et de belles vesses de femmes, il les fault marier ensemble. Ilz engendreront des mouches bovines. Ce que fist Pantagruel, et les nomma Pygmees. Et les envoya vivre en une isle la aupres, ou ilz se sont fort multipliez despuis.Mais les grues leur font continuellement guerre, desquelles ilz se defendent courageusement, car ces petitz boutz d'hommes (lesquelz en Escosse l'on appelle manches d'estrilles) sont voluntiers cholericques.La raison physicale est: par ce qu'ilz ont le cueur pres de la merde.En ceste mesme heure Panurge print deux verres qui la estoient tous deux d'une grandeur, et les emplit d'eau tant qu'ilz en peurent tenir, et en mist l'un sur une escabelle, et l'aultre sur une aultre les esloingnans a part par la distance de cinq piedz, puis print le fust d'une javeline de la grandeur de cinq piedz et demy, et les mist dessus les deux verres, en sorte que les deux boutz du fustz touchoient justement les bors des verres. Cela faict print un gros pau, et dist a Pantagruel et es aultres.Messieurs considerez comment nous aurons victoire facillement de noz ennemys.Car ainsi comme je rompray ce fust icy dessus les verres sans que les verres soient en rien rompus ne brisez, encores que plus est, sans que une seulle goutte d'eau en sorte dehors: tout ainsi nous romprons la teste a noz Dipsodes, sans ce que nul de nous soit blesse, et sans perte aulcune de noz besoignes.Mais affin que ne pensez qu'il y ait enchantement, tenez dist il a Eusthenes, frappez de ce pau tant que pourrez au millieu. Ce que fist Eusthenes, et le fust rompit en deux pieces tout net, sans que une goutte d'eau tumbast des verres. Puis dist. J'en scay bien d'aultres, allons seullement en asseurance.