Comment Gargantua fut unze moys porté ou ventre de sa mere. Chapitre. iij.

Grandgousier estoit bon raillard en son temps, aymant a boyre net autant que homme qui pour lors fust au monde, et mangeoit voluntiers sale. A ceste fin avoit ordinairement bonne munition de jambons de Magence et de Baionne, force langues de beuf fumees, abondance de andouilles en la saison et beuf sallé a la moustarde. Renfort de boutargues, provision de saulcisses, non

de Bouloigne (car il craignoit ly boucon de Lombard) mais de Bigorre, de Lonquaulnay, de la Brene, et de Rouargue. En son eage virile espousa Gargamelle fille du roy des Parpaillos, belle gouge et de bonne troigne. Et faisoient eux deux souvent ensemble la beste a deux doz, joyeusement se frotans leur lard, tant qu'elle engroissa d'un beau filz, et le porta jusques a l'unziesme moys.

Car autant, voire dadvantage, peuvent les femmes ventre porter, mesmement quand c'est quelque chef d'oeuvre, et personnage qui doibve en son temps faire grandes prouesses. Comme dict Homere que l'enfant (duquel Neptune engroissa la nymphe) nasquit l'an apres revolu: ce fut le douziesme moys, Car (comme dit Aule Gelle lib. iij.) ce long temps convenoit a la majesté de Neptune, affin qu'en icelluy l'enfant feust form a perfection. A pareille raison Jupiter feist durer, xlviij. heures la nuyct qu'il coucha avecques Alcmene. Car en moins de temps n'eust il

peu forger Hercules qui nettoia le monde de monstres et tyrans.

Messieurs les anciens Pantagruelistes ont conformé ce que je dis, et ont declaré non seulement possible, mais aussi legitime l'enfant né de femme l'unziesme moys apres la mort de son mary.

Hippocrates lib. de alimento. Pline li vij cap v. Plaute in Cistellaria. Marcus Varro en la satyre inscripte. Le testament, allegant l'autorite d ' Aristoteles a ce propos. Censorinus li. de die natali. Aristoteles libr. vij. capi. iij. et.iiij. de nat animalium. Gellius li. iij. ca. xvj. Servius in egl. exposant ce metre de Virgile Matri longa decem etc. Et mille aultres folz, Le nombre desquelz a esté par les legistes acreu ff. de suis et legit. l. Intestato. §. fi. Et in autent. de restituit. et ea que parit in. xj. mense.

D'abondant en ont chaffourré leur robidilardicque loy. Gallus. ff. de lib. et posthu. et. l. Septimo. ff. de stat. homi. et quelques aultres, que pour le present dire n'ause.

Moiennans lesquelles loys, les femmes vefves peuvent franchement jouer du serrecropiere a tous enviz et toutes, restes, deux mois apres le trespas de leurs mariz. Je vous prie par grace vous aultres mes bons averlans, si d'icelles en trouvez que vaillent le desbraguetter, montez dessus et me les amenez. Car si au troisiesme moys elle engroissent: leur fruict sera heritier du deffunct. Et la groisse congneue, poussent hardiment oultre, et vogue la gualee, puis que la panse est pleine. Comme Julie fille de l' empereur Octavian ne se abandonnoit a ses taboureurs, sinon quand elle se sentoit grosse, a la forme que la navire ne recoit son pilot, que premierement ne soit callafatee et chargee. Et si personne les blasme de soy faire rataconniculer

ainsi suz leur groisse, veu que les bestes suz leur ventrees n'endurent jamais le masle mascalant: elles responderont que ce sont bestes, mais elles sont femmes: bien entendentes les beaulx et joyeux menuz droictz de superfection: comme jadis respondit Populie selon le raport de Macrobe li. ij. Saturnal. Si le diavol ne veult qu'elles engroissent, il fauldra tortre le douzil, et bouche clouse.