Comment Gargamelle estant grosse de Gargantua mangea grand planté de tripes. Chapitre. iiij.

L'Occasion et maniere comment Gargamelle enfanta fut telle. Et si ne le croyez, le fondement vous escappe. Le fondement luy escappoit une apresdinee le. iij. jour de febvrier, par trop avoir mange de gaudebillaux, Gaudebillaux: sont grasses tripes de coiraux. Coiraux:

sont beufz engressez a la creche et prez guimaulx. Prez guimaulx: sont qui portent herbe deux fois l'an. D'iceulx gras beufz avoient faict tuer troys cens soixante sept mille et quatorze, pour estre a mardy gras sallez: affin qu'en la prime vere ilz eussent beuf de saison a tas, pour au commencement des repastz faire commemoration de saleures, et mieulx entrer en vin.

Les tripes furent copieuses, comme entendez: et tant friandes estoient que chascun en leichoit ses doigtz. Mais la grande diablerie a quatre personnaiges estoit bien en ce que possible n'estoit longuement les reserver. Car elles feussent pourries. Ce que sembloit indecent. Dont fut conclud, qu'ilz les bauffreroient sans rien y perdre. A ce faire convierent tous les citadins de Sainnais, de Suille : de la Rocheclermaud, de Vau gaudray, sans laisser arriere le Coudray, Montpensier le Gue de vedeGue de vedevede et aultres voisins: tous bons beveurs, bons compaignons et beaulx

joueurs de quille la. Le bon homme Grandgousier y prenoit plaisir bien grand: et commendoit que tout allast par escuelles. Disoit toutesfoys a sa femme qu'elle en mangeast le moins, veu qu'elle aprochoit de son terme, et que ceste tripaille n'estoit viande moult louable. Celluy (disoit il) a grande envie de mascher merde, qui d'icelle le sac mangeue. Non obstant ces remontrances: elle en mangea seze muiz, deux bussars, et six tupins. O belle matiere fecale, que doivoit boursouffler en elle

Apres disner tous allerent (pelle melle) a la saulsaie : et la sus l'herbe dure dancerent au son des joyeux flageolletz, et doulces cornemuses: tant baudement que c'estoit passetemps celeste les veoir ainsi soy rigouller.