Pourquoy est dicte Pantagruelion, et des admirables vertus d’icelle. Chapitre LI.

Par ces manieres (exceptez la fabuleuse. car de fable ja Dieu ne plaise que usions en ceste tant veritable histoire) est dicte l’herbe Pantagruelion. Car Pantagruel feut d’icelle inventeur. je ne diz quant a la plante, mais quant a un certain usaige, lequel plus est abhorré et hay des larrons: plus leurs est contraire et ennemy, que ne est la Teigne et Cuscute au Lin, que le Rouseau a la Fougere: que le Presle aux Fauscheurs: que Orobanche aux poys Chices: AEgilops a l’Orge: Securidaca aux Lentilles: Antranium aux Febves:

Page 153
l’Yvraye au Froment: le Lierre aux Murailles: que le Nenufar et Nymphaea Heraclia aux ribaux Moines, que n’est la Ferule et le Boulas aux escholiers de Navarre, que n’est le Chou, a la Vigne: le Ail, a l’Aymant: l’Oignon, a la veue: la graine de Fougere, aux femmes enceinctes: la semence de Saule, aux Nonnains vitieuses: l’umbre de If, aux dormans dessoubs: le Aconite, aux Pards et Loups: le flair du Figuier, aux taureaux indignez: la Cigue aux Oisons: le Poupié, aux Dents: l’Huille, aux Arbres. Car maintz d’iceulx avons veu par tel usaige finer leur vie hault et court: a l’exemple de Phyllis royne des Thraces: de Bonosus, Empereur de Rome : de Amate, femme du roy Latin: de Iphis, Auctolia, Licambe, Arachne, Phaeda, Leda, Acheus roy de LydieAcheus roy de LydieLydie, et aultres: de ce seulement indignez, que sans estre aultrement mallades, par le Pantagruelion on leurs oppiloit les conduictz, par les quelz sortent les bons mots et entrent les bons morseaulx, plus villainement que ne feroit la male Angine et mortelle Squinanche.

Aultres avons ouy sus l’instant que Atropos

Page [153v]
leurs couppoit le fillet de vie, soy griefvement complaignans et lamentans de ce que Pantagruel les tenoit a la guorge. Mais (las) ce n’estoit mie Pantagruel. Il ne feut oncques rouart, c’estoit Pantagruelion, faisant office de hart, et leurs servant de cornette. Et parloient improprement et en Soloecisme. Si non qu’on les excusast par figure Synecdochique, prenens l’invention pour l’inventeur. Comme on prent Ceres pour pain, Bacchus pour vin. Je vous jure icy par les bons motz qui sont dedans ceste bouteille la qui refraichist dedans ce bac, que le noble Pantagruel ne print oncques a la guorge si non ceulx qui sont negligens de obvier a la soif imminente.

Aultrement est dicte Pantagruelion par similitude. Car Pantagruel naissant on monde estoit autant grand que l’herbe dont je vous parle. et en feut prinse la mesure aisement: veu qu’il nasquit on temps de alteration, lors qu’on cuille ladicte herbe, et que le chien de Icarus par les aboys qu’il faict au Soleil, rend tout le monde Troglodyte, et constrainct habiter es caves et lieux subterrains.

Page 154

Aultrement est dicte Pantagruelion par ses vertus et singularitez. Car comme Pantagruel a esté l’Idée et exemplaire de toute joyeuse perfection, (je croy que persone de vous aultres Beuveurs n’en doubte) aussi en Pantagruelion je recongnoys tant de vertus, tant d’energie, tant de perfection, tant d’effectz admirables, que si elle eust esté en ses qualitez congneue lors que les arbres (par la relation du Prophete) feirent election d’un Roy de boys pour les regir et dominer, elle sans doubte eust emporté la pluralité des voix et suffrages. Diray je plus? Si Oxylus filz de Orius l’eust de sa soeur Hamadryas engendrée, plus en la seule valeur d’icelle se feust delecté, qu’en tous ses huyct enfans tant celebrez par nos Mythologes, qui ont leurs noms mis en memoire eternelle. La fille aisnée eut nom Vigne. le filz puysné eut nom Figuier: l’autre Noyer, l’aultre Chesne, l’autre Cormier, l’autre Fenabregue, l’autre Peuplier, le dernier eut nom Ulmeau, et feut grand Chirurgien en son temps.

Je laisse a vous dire comment le jus d’icelle exprimé et instillé dedans les aureilles

Page [154v]
tue toute espece de vermine, qui y seroit née par putrefaction, et tout aultre animal qui dedans seroit entré. Si d’icelluy jus vous mettez dedans un seilleau de eaue, soubdain vous voirez l’eaue prinse, comme si feussent caillebotes, tant est grande sa vertus. Et est l’eaue ainsi caillée remede praesent aux chevaulx coliqueux, et qui tirent des flans. La racine d’icelle cuicte en eaue, remollist les nerfz retirez, les joinctures contractes, les podagres sclirrhotiques, et les gouttes nouées. Si promptement voulez guerir une bruslure, soit d’eaue, soit de feu, applicquez y du Pantagruelion crud, c’est a dire tel qui naist de terre, sans aultre appareil ne composition. Et ayez esguard de le changer ainsi que le voirez deseichant sus le mal. Sans elle seroient les cuisines infames, les tables detestables, quoy que couvertes feussent de toutes viandes exquises: les lictz sans delices, quoy que y feust en abondance Or, Argent, Electre, Ivoyre, et Porphyre. Sans elle ne porteroient les Meusniers bled au moulin, n’en rapporteroient farine. Sans elle comment seroient portez les playdoiers des Advocatz a l’auditoire?
Page 155
Comment seroit sans elle porté le plastre a l’hastellier? Sans elle comment seroit tirée l’eaue du puyz? Sans elle que feroient les Tabellions, les Copistes, les Secretaires, et Escrivains? Ne periroient les Pantarques et papiers rantiers? Ne periroit le noble art d’Imprimerie? De quoy feroit on chassis? Comment sonneroit on les cloches? D’elle sont les Isiacques ornez, les Pastophores revestuz, toute humaine nature couverte en premiere position. Toutes les arbres lanificques des Seres, les Gossampines de Tyle en la mer Persicque, les Cynes des Arabes, les vignes de Malthe, ne vestissent tant de persones, que faict ceste herbe seulette. Couvre les armées contre le froid et la pluye, plus certes commodement que jadis ne faisoient les peaulx. Couvre les Theatres et Amphiteatres contre la chaleur, ceinct les boys et taillis au plaisir des chasseurs, descend en eaue tant doulce que marine au profict des pescheurs. Par elle sont bottes, botines, botasses, houzeaulx, brodequins, souliers, escarpins, pantofles, savattes mises en forme et usaige. Par elle sont les arcs tendus, les arbelestes bandées, les fondes faictes.
Page [155v]
Et comme si feust herbe sacre, Verbenicque, et reverée des Manes et Lemures les corps humains mors sans elle ne sont inhumez.

Je diray plus. Icelle herbe moyenante les substances invisibles visiblement sont arrestées, prinses detenues, et comme en prison mises. A leur prinse et arrest sont les grosses et pesantes moles tournées agillement a insigne profict de la vie humaine. Et m’esbahys comment l’invention de tel usaige a esté par tant de siecles celé aux antiques Philosophes, veue l’utilité impréciable qui en provient: veu le labeur intolerable, que sans elle ilz supportoient en leurs pistrines. Icelle moyenant, par la retention des flotz aërez sont les grosses Orchades, les amples Thalameges, les fors Guallions, les Naufz Chiliandres et Myriandres de leurs stations enlevées, et poussées a l’arbitre de leurs gouverneurs. Icelle moyenant, sont les nations, que Nature sembloit tenir absconses, impermeables, et incongneues: a nous venues, nous a elles. Chose que ne feroient les oyseaulx, quelque legiereté de pennaige qu’ilz ayent, et quelque liberté

Page 156
de nager en l’aër, que leurs soit baillée par Nature. Taprobrana a veu. Lappia : Java a veu les mons Riphées : Phebol voyra Theleme : les Islandoys et Engronelands boyront Euphrates. Par elle Boreas a veu le manoir de Auster: Eurus a visité Zephire. De mode que les Intelligences celestes, les Dieux tant marins que terrestres en ont esté tous effrayez, voyans par l’usaige de cestuy benedict Pantagruelion, les peuples Arcticques en plein aspect des Antarcticques, franchir la mer Athlanticque, passer les deux Tropicques, volter soubs la Zone torride, mesurer tout le Zodiacque, s’esbatre soubs l’AEquinoctial, avoir l’un et l’aultre Pole en veue a fleur de leur Orizon. Les Dieux Olympicques ont en pareil effroy dict. Pantagruel nous a mis en pensement nouveau et tedieux, plus que oncques ne feirent les Aloïdes, par l’usaige et vertus de son herbe. Il sera de brief marié, de sa femme aura enfans. A ceste destinée ne pouvons nous contrevenir: car elle est passée par les mains et fuseaulx des soeurs fatales, filles de Necessité. Par ses enfans (peut estre) sera inventée herbe de semblable
Page [156v]
energie: moyenant laquelle pourront les humains visiter les sources des gresles, les bondes des pluyes, et l’officine des fouldres. pourront envahir les regions de la Lune, entrer le territoire des signes celestes, et la prendre logis, les uns a l’Aigle d’or, les aultres au Mouton, les aultres a la Couronne, les aultres a la Herpe, les aultres au Lion d’argent: s’asseoir a table avecques nous, et nos Déesses prendre a femmes. qui sont les seulx moyens d’estre deifiez. En fin ont mis le remede de y obvier en deliberation, et au conseil.

Réel    Hypothétique    Fictif    Mythique   
Région, contrée    Ville, village    Bâtiment    Étendue, cours d'eau    Montagne, île, ...    Autre