Comment certaine espece de Pantagruelion ne peut estre par feu consommée. Chapitre LII.

Ce que je vous ay dict, est grand et admirable. Mais si vouliez vous hazarder de croire quelque aultre divinité de ce sacre Pantagruelion, je la vous dirois. Croyez la ou non.

ce m’est tout un. me suffist vous avoir dict verité. Verité vous diray. Mais pour y entrer, car elle est d’accés assez scabreux et difficile, je vous demande. Si j’avoys en ceste bouteille mis deux cotyles de vin, et une d’eau ensemble bien fort meslez, comment les demesleriez vous? comment les separeriez vous? de maniere que vous me rendriez l’eau a part sans le vin, le vin sans l’eau, en mesure pareille que les y auroys mis. Aultrement. Si vos chartiers et nautonniers amenans pour la provision de vos maisons certain nombre de tonneaulx, pippes, et bussars de vin de Grave, d’ Orleans, de Beaulne, de Myrevaulx, les avoient buffetez et beuz a demy, le reste emplissans d’eau, comme font les Limosins, a belz esclotz, charroyans les vins d’ Argenton, et Sangaultier : comment en honsteriez vous l’eau entierement? comment les purifieriez vous? J’entends bien, vous me parlez d’un entonnoir de Lierre. Cela est escript. Il est vray et averé par mille experiences. Vous le sçaviez desja. Mais ceulx qui ne l’ont sceu et ne le veirent oncques, ne le croyroient possible. Passons oultre.

Si nous estions du temps de Sylla, Marius, Caesar et aultres Romains empereurs ou du temps de nos antiques Druydes, qui faisoient brusler les corps mors de leurs parens et seigneurs, et voulussiez les cendres de vos femmes, ou peres boyre en infusion de quelque bon vin blanc, comme feist Artemisia les cendres de Mausolus son mary, ou aultrement les reserver entieres en quelque urne, et reliquaire: comment saulveriez vous icelles cendres a part, et separées des cendres du bust et feu funeral? Respondez. Par ma figue vous seriez bien empeschez. Je vous en despesche. Et vous diz, que prenent de ce celeste Pantagruelion autant qu’en fauldroit pour couvrir le corps du defunct, et ledict corps ayant bien a poinct enclous dedans, lié et cousu de mesmes matiere, jectez le on feu tant grand, tant ardent que vouldrez: le feu a travers le Pantagruelion bruslera et redigera en cendres le corps et les oz. le Pantagruelion non seulement ne sera consumé ne ards, et ne deperdera un seul atome des cendres dedans encloses, ne recepvra un seul atome des cendres bustuaires, mais sera en fin du feu extraict plus beau,

plus blanc, et plus net que ne l’y aviez jecté. Pourtant est il appellé Asbeston. Vous en trouverez foison en Carpasie, et soubs le climat Dia Cyenes, a bon marché. O chose grande! chose admirable? Le feu qui tout devore, tout deguaste, et consume: nettoye, purge, et blanchist ce seul Pantagruelion Carpasien Asbestin. Si de ce vous defiez, et en demandez assertion et signe usual comme Juifz et incredules: prenez un oeuf fraiz et le liez circulairement avecques ce divin Pantagruelion. Ainsi lié mettez le dedans le brasier tant grand et ardent que vouldrez. Laissez le si long temps que vouldrez. En fin vous tirerez l’oeuf cuyt, dur, et bruslé, sans alteration, immutation, ne eschauffement du sacre Pantagruelion. Pour moins de cinquante mille escuz Bourdeloys, amoderez a la douzieme partie d’une Pithe: vous en aurez faict l’experience. Ne me parragonnez poinct icy la Salamandre. c’est abus. Je confesse bien que petit feu de paille la vegete et resjouist. Mais je vous asceure que en grande fournaise elle est comme tout aultre animant, suffoquée, et consumée. Nous en avons veu l’experience . Galen l’avoit long temps a confermé et demonstré lib. 3. de temperamen tis. et le maintient Dioscorides 2. Icy ne me alleguez l’alum de plume, ne la tour de boys en Pyrée, laquelle ne peut oncques faire brusler, pource que Archelaus gouverneur de la ville pour le roy Mithridates, l’avoit toute enduicte d’alum. Ne me comparez icy celle arbre que Alexander Cornelius nommoit Eonem. et la disoit estre semblable au Chesne qui porte le Guy: et ne povoir estre ne par eau, ne par feu consommée ou endommagée, non plus que le Guy de chesne, et d’icelle avoir esté faicte et bastie la tant celebre navire Argos. Cherchez qui le croye. Je m’en excuse. Ne me parragonnez aussi, quoy que mirificque soit celle espece d’arbre que voyez par les montaignes de Briançonmontaignes de BriançonBriançon, et Ambrun, laquelle de sa racine nous produit le bon Agaric, de son corps nous rend la resine tant excellente que Galen l’ause aequiparer a la Terebinthine: sus ses feueilles delicates nous retient le fin miel du ciel, c’est la Manne: et quoy que gommeuse et unctueuse soit, est inconsumptible par feu. Vous la nommez Larrix en Grec et Latin: les Alpinois la nomment Melze: les Antenorides et Venetians, Larege. Dont feut dict Larignum le chasteau en Piedmont : lequel trompa Jule Caesar venent es Gaules. Jule Caesar avoit faict commendement a tous les manens et habitans des Alpes et Piedmont, qu’ilz eussent a porter vivres et munitions es estappes dressées sus la voie militaire, pour son oust passant oultre. Au quel tous feurent obeissans, exceptez ceulx qui estoient dedans Larigno, les quelz soy confians en la force naturelle du lieu, refuserent a la contribution. Pour les chastier de ce refus, l’Empereur feist droict au lieu acheminer son armée. Davant la porte du chasteau estoit une tour bastie de gros chevrons de Larix lassez l’un sus l’aultre alternativement comme une pyle de boys, continuans en telle haulteur, que des machicoulis facilement on povoit avecques pierres et liviers debouter ceulx qui approcheroient. Quand Caesar entendit que ceulx du dedans n’avoient aultres defenses que pierres et liviers, et que a poine les povoient ilz darder jusques aux approches, commenda a ses soubdars jecter au tour force fagotz, et y mettre le feu. Ce que feut incontinent faict. Le feu mis es fagotz, la flambe feut si grande et si haulte, qu’elle couvrit tout le chasteau. Dont penserent que bien tost apres la tour seroit arse et demollie. Mais cessant la flambe, et les fagotz consumez, la tour apparut entiere, sans en rien estre endommagée. Ce que consyderant Caesar, commenda que hors le ject des pierres tout au tour l’on feist une seine de fossez et bouclus. Adoncques les Larignans se rendirent a composition. Et par leur recit congneut Caesar l’admirable nature de ce boys, lequel de soy ne faict feu, flambe, ne charbon: et seroit digne en ceste qualité d’estre on degré mis de vray Pantagruelion, et d’autant plus que Pantagruel d’icelluy voulut estre faictz tous les huys, portes, fenestres, goustieres, larmiers, et l’ambrun de Theleme : pareillement d’icelluy feist couvrir les pouppes, prores, fougons, tillacs, coursies, et rambades de ses carracons, navires, gualeres, gualions, brigantins, fustes, et aultres vaisseaulx de son arsenac de Thalasse : ne feust que Larix en grande fournaise de feu provenent d’aultres especes de boys, est en fin corrompu et dissipé, comme sont les pierres en fourneau de chaulx. Pantagruelion Asbeste plus tost y est renouvelé et nettoyé, que corrompu ou alteré. Pourtant
Indes cessez, Arabes, Sabiens
Tant collauder vos Myrrhe, Encent, Ebene,
Venez icy recongnoistre nos biens,
Et emportez de nostre herbe la grene.
Puys si chez vous peut croistre, en bonne estrene,
Graces rendez es cieulx un million:
Et affermez de France heureux le regne,
On quel provient Pantagruelion.

FIN DU TROISIESME livre des faicts et dicts Heroïcques du bon Pantagruel.