Comment doibt estre preparé et mis en oeuvre le celebre Pantagruelion. Chapitre L.

On pare le Pantagruelion soubs l’aequinocte automnal en diverses manieres, scelon la phantaisie des peuples, et diversité des pays. L’enseignement premier de Pantagruel feut, le tige d’icelle devestir de feueilles et semence: le macerer en Eaue stagnante non courante par cinq jours, si le temps est sec, et l’eaue chaulde, par neuf ou douze, si le temps est nubileux, et l’eaue froyde. puys au Soleil le seicher: puys a l’umbre le excorticquer,

et separer les fibres (es quelles, comme avons dict, consiste tout son pris et valeur) de la partie ligneuse, laquelle est inutile, forsqu’a faire flambe lumineuse, allumer le feu, et pour l’esbat des petitz enfans enfler les vessies de porc. D’elle usent aulcunesfoys les frians a cachetes, comme de Syphons, pour sugser et avecques l’haleine attirer le vin nouveau par le bondon. Quelques Pantagruelistes modernes evitans le labeur des mains qui seroit a faire tel depart, usent de certains instrumens catharactes composez a la forme que Juno la fascheuse tenoit les doigtz de ses mains liez pour empescher l’enfantement de Alcmene mere de Hercules. et a travers icelluy contundent et brisent la partie ligneuse, et la rendent inutile, pour en saulver les fibres. En ceste seule praeparation acquiescent ceulx qui contre l’opinion de tout le monde, et en maniere paradoxe a tous Philosophes, guaingnent leur vie a recullons. Ceulx qui a profict plus evident la voulent avalluer, font ce que l’on nous compte du passetemps des troys soeurs Parces: de l’esbatement nocturne de la noble Circe : et de la longue excuse de Penelope envers ses muguetz amoureux, pendant l’absence de son mary Ulyxes. Ainsi est elle mise en ses inestimables vertus, des quelles vous expouseray partie, (car le tout est a moy vous expouser impossible) si davant, vous interprete la denomination d’icelle.

Je trouve que les plantes sont nommées en diverses manieres. Les unes ont prins le nom de celluy qui premier les inventa, congneut, monstra, cultiva, aprivoisa, et appropria, comme Mercuriale de Mercure : Panacea de Panace, fille de AEsculapius : Armoise, de Artemis, qui est Diane : Eupatoire, du roy Eupator : Telephium, de Telephus : Euphorbium, de Euphorbus Medicin du roy Juba : Clymenos, de Clymenus : Alcibiadion, de Alcibiades : Gentiane, de Gentius roy de SclavonieGentius roy de SclavonieSclavonie. Et tant a esté jadis estimée ceste praerogative de imposer son nom aux herbes inventées, que comme feut controverse meue entre Neptune et Pallas de qui prendroit nom la terre par eulx deux ensemblement trouvée: qui depuys feut Athenes dicte, de Athene c’est a dire Minerve : pareillement Lyncus roy de Scythie

se mist en effort de occire en trahison le jeune Triptoleme envoyé par Ceres pour es homes monstrer le froment lors encores incongneu: affin que par la mort d’icelluy il imposast son nom, et feust en honneur et gloire immortelle dict inventeur de ce grain tant utile et necessaire a la vie humaine. Pour laquelle trahison feut par Ceres transformé en Oince, ou Loupcervier. Pareillement grandes et longues guerres feurent jadis meues entre certains Roys de sejour en Cappadoce, pour ce seul different, du nom des quelz seroit une herbe nommée: laquelle pour tel debat feut dicte Polemonia, comme Guerroyere.

Les aultres ont retenu le nom des regions des quelles feurent ailleurs transportées, comme pommes Medices, ce sont Poncires de Medie, en laquelle feurent premierement trouvées: pommes Punicques, ce sont Grenades, apportées de Punicie, c’est Carthage. Ligusticum, c’est Livesche, apportée de Ligurie, c’est la couste de Genes. Rhabarbe, du fleuve Barbare nommé Rha comme atteste Ammianus : Santonicque, foenu Grec:Castanes, Persicques,

Sabine, Stoechas, de mes isles Hieres antiquement dictez Stoechades, Spica Celtica, et aultres.

Les aultres ont leur nom par Antiphrase et contrarieté: comme Absynthe, au contraire de pynthe. car il est fascheux a boyre. Holosteon. c’est tout de os: au contraire. car herbe n’est en nature plus fragile et plus tendre, qu’il est.

Aultres sont nommées par leurs vertus et operations, comme Aristolochia, qui ayde les femmes en mal d’enfant. Lichen qui guerist les maladies de son nom. Maulve qui mollifie. Callithrichum, qui faict les cheveulx beaulx. Alyssum, Ephemerum, Bechium, Nasturtium, qui est Cresson Alenoys: Hyoscyame, hanebanes, et aultres.

Les aultres par les admirables qualitez qu’on a veu en elles. comme Heliotrope, c’est Soulcil, qui suyt le Soleil. Car le Soleil levant, il s’espanouist: montant, il monte: declinant, il decline: soy cachant, il se cloust. Adiantum: car jamais ne retient humidité, quoy qu’il naisse pres les eaues, et quoy qu’on le plongeast en eaue par bien long temps: Hieracia, Eryngion,

et aultres.

Aultres par Metamorphose d’homes et femmes de nom semblable: comme Daphne, c’est Laurier, de Daphne : Myrte, de Myrsine : Pytis, de Pytis : Cynara, c’est Artichault: Narcisse, Saphran, Smilax, et aultres.

Aultres par similitude, comme Hippuris (c’est Prelle) car elle resemble a queue de Cheval: Alopecuros, qui semble a la queue de Renard: Psylion, qui semble a la Pusse: Delphinium, au Daulphin: Buglosse, a langue de Beuf: Iris, a l’arc en ciel, en ses fleurs: Myosota, a l’aureille de Souriz: Coronopous, au pied de Corneille. Et aultres. Par reciprocque denomination sont dictz les Fabies, des Febves: les Pisons, des Poys: les Lentules, des Lentiles: les Cicerons, des poys Chices. Comme encores par plus haulte resemblance est dict le nombril de Venus, les cheveux de Venus, la cuve de Venus, la barbe de Juppiter, l’oeil de Juppiter, le sang de Mars, les doigtz de Mercure : Her modactyles: et aultres.

Les aultres de leurs formes: comme Trefeueil, qui ha trois feueilles: Pentaphyllon,

qui ha cinq feueilles: Serpoullet, qui herpe contre terre: Helxine, Petasites, Myrobalans, que les Arabes appellent Béen, car ilz semblent a gland, et sont unctueux.