¶Comment on vestit Gargantua. Chapitre. vii.

Luy estant en cest aage, son pere ordonna qu’on luy feist des habillemens a sa livree: laquelle estoit de blanc et bleu. De faict on y besoigna et furent faictz, taillez et cousuz a la mode qui pour lors couroyt. Par les anciennes pantarches, qui sont en la chambre des comptes a Montsoreau, je trouve qu’il feut vestu en la faczon que s’ensuyt. Pour sa chemise, furent leveez neuf cens aulnes de toille de Chasteleraud, et deux cens pour les coussons en sorte de carreaux / lesquelz on mist soubz les esselles. Et n’estoit poinct froncee, car la fronseure des chemises n’a poinct este inventee, si non depuis que les lingieres, lors que la poincte de leur aigueille estoit rompue, ont commence a besoigner du cul. Pour son pourpoint feurent leveez huyt cens treize aulnes de satin blanc, et pour les agueillettes quinze cens neuf peaux et demye de chiens, lors commencza le monde de attacher les chausses au pourpoint, et non le pourpoint aux chausses, car c’est chose contre nature.

Pour ses chausses feurent leveez unze cens cinq aulnes, et un tiers d’estamet blanc, et feurent deschicqueteez en forme de columnes strieez, et crenelees par le darriere, affin de n’eschaufer les reins. Et flocquoit par dedans la deschicqueteure, de damas bleu, tant que besoing estoit. Et notez qu’il avoit tresbelles griefves, et bien proportionnees au reste de la stature.

Pour la braguette, feurent leveez seize aulnes un quartier d’icelluy mesmes drap, et feut la forme d’icelle comme d’un arc boutant, bien estachee joyeusement a deux belles boucles d’or, que prenoyent deux crochetz d’esmail, en un chascun desquelz estoit enchassee une grosse esmeraugde de la grosseur d’une pomme d’orange. Car (ainsi que dict Orpheus libro de lapidibus, et Pline lib. ultimo) elle a vertus erective et confortative du membre naturel. L’exiture de la braguette estoyt a la longueur d’une canne, deschicquettee comme les chausses, avecques le damas bleu flottant comme davant. Mais voyans la belle brodeure de canetille, et les plaisans entrelatz d’orfeverie, guarniz de fins diamens/ fins rubiz / fines turquoises/ fines esmeraugdes/ et unions Persicques, vous l’eussiez comparee a une belle corne d’abondance, telles que voyez es antiquailles, et telle que donna Rhea, es deux nymphes Adrastea, et Ida

nourrices de Juppiter. Tousjours gualante / succulente/ resudante/ tousjours verdoyante, tousjours fleurissante, tousjours fructifiante, plene d’humeurs, plene de fleurs, plene de fruictz, plene de toutes delices. Je advoue dieu s’il ne la faisoyt bon veoyr. Mais je vous en exposeray bien dadventaige on livre que j’ay faict de la dignite des braguettes. D’un cas vous advertis, que si elle estoit bien longue et bien ample, si estoyt elle bien guarnie au dedans et bien avitaillee, en riens ne ressemblant les hypocriticques braguettes d’un tas de muguetz, qui ne sont plenes que de vent, au grant interest du sexe feminin.

Pour ses souliers furent leveez quatre cens six aulnes de velours bleu cramoy si, et furent deschicquettez a barbe d’escre visse bien mignonnement. Pour la quarreleure d’iceulx furent employez unze cens peaulx de vache brune, taillee a queues de merluz.

Pour son saye furent leveez dix et huyct cens aulnes de velours bleu tainct en grene, brode a l’entour de belles vignettes et par le mylieu de pinthes d’argent de canetille, enchevestrees de verges d’or avecques force perles, par ce denotant qu’il seroit un bon fessepinthe en son temps. Sa ceincture fut de troys cens aulnes et demye de cerge de soye, moytie blanche et moytie bleue.

¶Son espase ne fut Valentienne, ny son poignart Sarragossoys, car son pere haissoyt tous ces Indalgos Bourrachous marranisez comme diables, mais il eut la belle espee de boys, et le poignart de cuyr bouilly, pinctz et dorez comme un chascun soubhaiteroit. ¶Sa bourse fut faicte de la couille d’un Oriflant, que luy donna Her Pra contal proconsul de Lybie. ¶Pour sa robbe furent levees neuf mille six cens aulnes moins deux tiers de velours bleu comme dessus, tout porfilé d’or en figure diagonale, dont par juste perspective issoit une couleur innommee, telle que voyez es coulz des tourterelles, qui resjouissoit merveilleusement les yeulx des spectateurs. ¶Pour son bonnet feurent levees troys cens deux aulnes un quart de velours blanc, et fut la forme d’icelluy large et ronde a la capacité du chief. Car son pere disoit que ces bonnetz a la Marrabeise faictz comme une crouste de pasté porteroyent quelque jour mal’ encontre a leurs tonduz. ¶Pour son plumart portoit une belle grande plume bleue prise d’un Onocrotal du pays de Hircanie la saulvaige, bien mignonnement pendente suz l’aureille droicte. ¶Pour son imaige avoit en une plataine d’or pesant soixante et huyct marcs, une

Page [30]

figure d’esmail competent en laquelle estoit portraict un corps humain ayant deux testes, l’une viree vers l’aultre, quatre bras, quatre piedz, et deux culz, tel que dict Platon in Symposio, avoir esté l’humaine nature a son commencement mystic et au tour estoit escript en letres Ioniques, Η ΑΓΑΠΗ ΟΥ ΖΗΤΕΙ ΤΑ ΕΑΥΤΗΣ. ¶Pour porter au col: eut une chaine d’or pesante vingt et cinq mille soixante et troys marcs d’or, faicte en forme de grosses bacces, entre lesquelles estoyent en oeuvre gros Jaspes verds, engravez et taillez en Dracons tous environnez de rayes et estincelles, comme les portoit jadis le roy Nechepsos. Et descendoit jusque a la boucque du petit ventre. Dont toute la vie en eut l’emolument tel que scavent les medicins Gregoys. ¶Pour ses guands furent mises en oeuvre seize peaulx de lutins, et troys de loups guarous pour la brodeure d’iceulx. Et de telle matiere luy feurent faictz par l’ordonnance des Cabalistes de Sainlouand. ¶Pour ses aneaulx (lesquelz voulut son pere qu’il portast pour renouveller le signe antique de noblesse) il eut on doigt indice de sa main gausche une escarboucle grosse comme un oeuf d’austruche, en chassee en or de seraph bien mignonnement. On doigt medical d’icelle, eut un

Page [31]

aneau faict des quatre metaulx ensemble: en la plus merveilleuse faczon: que jamais feust veue, sans que l’acier froissast l’or, sans que l’argent foullast le cuyvre. Le tout fut faict par le capitaine Chappuys et Alcofribas son bon facteur. On doigt medical de la dextre eut un aneau faict en forme spirale, on quel estoyent enchassez un balay en perfection, un diament en poincte, et une esmeraulde de Physon, de pris inestimable. Car Hans Carvel grand lapidaire du roy de Melinde les estimoit a la valeur de soixante neufz millions huict cens nonante et quatre mille moutons a la grand’ laine, autant l’estimerent les Fourques D’ auxbourg.