¶Comment Gargantua feut institue par un theologien en letres latines. Chap. xiii.

Ces propous entenduz le bon homme Grantgouzier fut ravy en admiration considerant le hault sens et merveilleux entendement de son filz Gargantua. Et dist a ses gouvernantes. Philippe roy de MacedonePhilippe roy de MacedoneMacedone congneut le bon sens de son filz Alexandre, a manier dextrement un cheval. Car ledict cheval estoit si terrible et efrene que nul ne ouzoyt monter dessus: par ce que a tous ses chevaucheurs il bailloit la saccade: a l’un rompant le coul, a l’aultre les jambes, a l’aultre la cervelle, a l’aultre les mandibules. Ce que considerant Alexandre en l’hippodrome (qui estoit le lieu ou l’on pourmenoit et voultigeoit les chevaulx) advisa que la fureur du cheval

ne venoit que de frayeur qu’il prenoit a son umbre. Dont montant dessus le feist courir encontre le Soleil, si que l’umbre tumboit par darriere, et par ce moien rendit le cheval doulx a son vouloir. A quoy congneut son pere le divin entendement qui en luy estoit. et le feist tresbien endoctriner par Aristotele, qui pour lors estoit estime suz tous philosophes de Grece. Mais je vous diz, qu’en ce seul propous que j’ay presentement davant vous tenu a mon filz Gargantua, je congnois que son entendement participe de quelque divinite: tant je le voy agu, subtil profond, et serain. Et ne foys doubte aulcun, qu’il ne parvieigne quelques foys a un degre souverain de sapience, s’il est bien institue. Par ainsi je veulx le bailler a quelque homme scavant pour l’endoctriner selon sa capacite. Et n’y veulx rien espargner. De faict l’on luy enseigna un grand docteur en theologie nomme maistre Thubal Holoferne, qui luy aprint sa charte si bien qu’il la disoit par cueur au rebours: et il fut cinq ans et troys moys puis luy leut le Donat le facet le Theo dolet/ et Alanus in parabolis: et y feut treze ans et six moys. Mais notez que ce pendent il luy aprenoit a escripre Gotticquement et escripvoit tous ses livres. Car l’art d’impression n’estoit poinct encores en usaige. Et portoit ordinairement un gros escriptoire pesant plus de sept mille quintaulx, du quel le gualimart estoit aussi gros et grand que les gros pilliers de Enay, et le cornet y pendoit a grosses chaisnes de fer, a la capacite d’un tonneau de marchandise. Puis luy leugt de modis significandi, avecques les commens de Hurtebize, de fasquin, de tropditeulx, de Gualehault, de Jehan le veau, de Billonio, Brelinguandus, et un tas d’aultres, et y feut plus de dixhuyt ans et unze moys. Et le sceut si bien que au coupelaud il le rendoit par cueur a revers. Et prouvoit sus ses doigts a sa mere que de modis significandi non erat scientia. Puis luy leut le compost, ou il feut bien seize ans et deux moys/ lors que son dict precepteur mourut: et fut l’an mil quatre cens et vingt, de la verolle qui luy vint. Apres en eut un aultre vieulx tousseux, nomme maistre Jobelin bride, qui luy leugt. Hugutio. Hebrard, Grecisme, le doctrinal, les pars/ le quid est, le supplementum. Marmotret, de moribus in mensa servandis. Seneca de quatuor virtutibus cardinalibus, Passavantus cum commento. Et dormi secure pour les festes. Et quelques aultres de semblable farine, a la lecture desquelz il devint aussi saige qu’onques puis ne fourneasmez nous.