Continuation des responses de Trouillogan philosophe Ephecticque et Pyrrhonien. Chapitre XXXVI.

Vous dictez d’orgues, respondit Panurge. Mais je croy que je suis descendu on puiz tenebreux, onquel disoit Heraclytus estre Verité cachée. Je ne voy goutte: je n’entends rien: je sens mes sens tous hebetez. Et doubte grandement que je soye charmé. Je parleray d’aultre style. Nostre feal ne bougez. N’emboursez rien. Muons de chanse, et parlons sans disjunctives. Ces membres mal joinctz vous faschent, a ce que je voy. Or ça de par Dieu. Me doibz je marier? Trouillogan. Il y a de l’apparence. Panurge. Et si je ne marie poinct? TROUILLOGAN Je n’y voy incontinent aulcun. PANURGE Vous n’y en voyez poinct? TROUILLOGAN Nul, ou la veue me deçoit. PANURGE Je y en trouve plus de cinq cens. TROUILLOGAN Comptez les. PANURGE Je diz improprement parlant: et prenent nombre certain pour incertain: determiné, pour indeterminé. C’est a dire

beaucoup. TROUILLOGAN J’escoute. PANURGE Je ne peuz me passer de femme, de par tous les diables. TROUILLOGAN Houstez ces villaines bestes. PANURGE De par Dieu soit, Car mes Salmiguondinoys disent coucher seul ou sans femme, estre vie brutale, et telle la disoit Dido en ses lamentations. TROUILLOGAN A vostre commandement. PANURGE Pe le quau Dé j’en suis bien. Doncques me mariray je? TROUILLOGAN Par adventure. PANURGE M’en trouveray je bien? TROUILLOGAN Scelon la rencontre. PANURGE Aussi si je rencontre bien, comme j’espoire, seray je heureux. TROUILLOGAN Assez. PANURGE Tournons a contrepoil. Et si rencontre mal? TROUILLOGAN Je m’en excuse. PANURGE Mais conseillez moy de grace. Que doibs je faire? TROUILLOGAN Ce que vouldrez. PANURGE Tarabin tarabas. TROUILLOGAN Ne invocquez rien je vous prie. PANURGE On nom de Dieu soit, Je ne veulx sinon ce que me conseillerez. Que m’en conseillez vous? TROUILLOGAN Rien. PANURGE Me mariray je? TROUILLOGAN Je n’y estois pas. PANURGE Je ne me mariray doncques poinct? TROUILLOGAN Je n’en peu mais. PANURGE Si je ne suys marié, je ne seray jamais coqu? TROUILLOGAN Je y pensois. PANURGE Mettons le cas que je sois marié. TROUILLOGAN Ou le mettrons nous? PANURGE Je dis, Prenez le cas que marié je soys. Je suys d’ailleurs empesché. PANURGE Merde en mon nez, Dea si je ausasse jurer quelque petit coup en cappe, cela me soulageroit d’autant. Or bien. Patience. Et doncques, si je suys marié, je seray coqu? TROUILLOGAN On le diroit. PANURGE Si ma femme est preude et chaste, je ne seray jamais coqu? TROUILLOGAN Vous me semblez parler correct. PANURGE Escoutez. TROUILLOGAN Tant que vouldrez. PANURGE Sera elle preude et chaste? reste seulement ce poinct. TROUILLOGAN J’en doubte. PANURGE Vous ne la veistez jamais? TROUILLOGAN Que je sache. PANURGE Pour quoy doncques doubtez vous d’une chose que ne congnoissez? TROUILLOGAN Pour cause. PANURGE Et si la congnoissiez? TROUILLOGAN Encores plus. PANURGE Paige mon mignon, tien icy mon bonnet, je le te donne, saulve les lunettes et va en la basse court jurer une petite demie heure pour moy. Je jureray pour toy quand tu vouldras. Mais qui me fera coqu? TROUILLOGAN Quelqu’un. PANURGE Par le ventre beuf de boys je vous froteray bien monsieur le quelqu’un. TROUILLOGAN Vous le dictez. PANURGE Le diantre, celluy qui n’a poinct de blanc en l’oeil m’emporte doncques: ensemble si je ne boucle ma femme a la Bergamasque, quand je partiray hors mon serrail. PANURGE Discourez mieulx. PANURGE C’est bien chien chié chanté pour les discours. Faisons quelque resolution. PANURGE Je n’y contrediz. PANURGE Attendez. Puis que de cestuy endroict ne peuz sang de vous tirer, je vous saigneray d’aultre vene. Estes vous marié ou non? PANURGE Ne l’un ne l’aultre, et tous les deux ensemble. PANURGE Dieu nous soit en ayde. Je sue par la mort beuf d’ahan: et sens ma digestion interrompue. Toutes mes phrenes, metaphrenes, et diaphragmes sont suspenduz et tenduz pour incornifistibuler en la gibbessiere de mon entendement ce que dictez et respondez. PANURGE Je ne m’en empesche. PANURGE Trut avant. nostre feal estes vous marié? PANURGE Il me l’est advis. PANURGE Vous l’aviez esté une aultre foys? PANURGE Possible est. PANURGE Vous en trouvastez vous bien la premiere fois? PANURGE Il n’est pas impossible. A ceste seconde fois comment vous en trouvez vous? PANURGE Comme porte mon sort fatal? PANURGE Mais quoy a bon essiant, vous en trouvez vous bien? TROUILLOGAN Il est vray semblable. PANURGE Or ça de par Dieu. J’aymeroys par le fardeau de sainct Christofle autant entreprendre tirer un pet d’un Asne mort, que de vous une resolution. Si vous auray je a ce coup. Nostre feal, faisons honte au diable d’enfer, confessons verité. Feustez vous jamais coqu? Je diz vous qui estez icy: je ne diz pas vous qui estez la bas au jeu de paulme. TROUILLOGAN Non, s’il n’estoit praedestiné. PANURGE Par la chair, je renie: par le sang, je renague: par le corps, je renonce. Il m’eschappe. A ces motz Gargantua se leva, et dist. Loué soit le bon Dieu en toutes choses. A ce que je voy, le monde est devenu beau filz depuys ma congnoissance premiere. En sommes nous la? Doncques sont huy les plus doctes et prudens philosophes entrez on phrontistere et escholle des Pyrrhoniens, Aporrheticques, Scepticques, et Ephecticques. Loué soit le bon Dieu. Vrayement on pourra dorenavant prendre les Lions par les Jubes: les chevaulx par les crains: les boeufz par les cornes: les bufles, par le museau: les loups, par la queue: les chevres, par la barbe: les oiseaux, par les piedz. Mais ja ne seront telz Philosophes par leurs parolles pris. Adieu mes bons amys. Ces motz prononcez, se retira de la compaignie. Pantagruel et les aultres le vouloient suyvre: mais il ne le voulut permettre.

Issu Guargantua de la salle, Pantagruel dist es invitez. Le Timé de Platon au commencement de l’assemblée, compta les invitez: nous au rebours les compterons en la fin. Un, deux, trois: ou est le quart? N’estoit ce nostre amy Bridoye ? Epistemon respondit, avoir esté en sa maison pour l’inviter: mais ne l’avoir trouvé. Un huissier du parlement Myrelinguoys en Myrelingues, l’estoit venu querir et adjourner pour personellement comparoistre, et davant les Senateurs raison rendre de quelque sentence par luy donnée. Pourtant estoit il au jour praecedent departy affin de soy repraesenter au jour de l’assignation, et ne tomber en deffault ou contumace. Je veulx (dist Pantagruel) entendre que c’est. Plus de quarante ans y a qu’il est juge de Fonsbeton : icelluy temps pendent a donné plus de quatre mille sentences definitives. De deux mille trois cens et neuf sentences par luy données feut appellé par les parties condemnées en la Court souveraine du parlement Mirelinguoys en Mirelingues : toutes par arrestz d’icelle ont esté ratifiées, approuvées, et confirmées: les appeaulx

renversez, et a neant mis. Que maintenant doncques soit personellement adjourné sus ses vieulx jours: il qui par tout le passé a vescu tant sainctement en son estat, ne peut estre sans quelque desastre. Je luy veulx de tout mon povoir estre aidant en aequité. Je sçay huy tant estre la malignité du monde aggravée, que bon droict a bien besoing d’aide. Et praesentement delibere y vacquer de paour de quelque surprinse. Allors furent les tables levées. Pantagruel feist es invitez dons precieux et honorables de bagues, joyaulx et vaisselle tant d’or comme d’argent: et les avoir cordialement remercié, se retira vers sa chambre.