Comment Pantagruel persuade a Panurge prendre conseil de quelque fol Chapitre XXXVII.

Pantagruel soy retirant, aperceut par la guallerie Panurge en maintien de un resveur ravassant, et dodelinant de la teste, et luy dist. Vous me semblez a une souriz empegée:

Page 118
tant plus elle s’efforce soy depestrer de la poix, tant plus elle s’en embrene. Vous semblablement efforsant issir hors les lacs de perplexité, plus que davant y demourez empestré, et n’y sçay remede fors un. Entendez. J’ay souvent ouy en proverbe vulguaire, Qu’un fol enseigne bien un saige. Puys que par les responses des saiges n’estez a plein satisfaict, conseillez vous a quelque fol. Pourra estre que ce faisant, plus a vostre gré serez satisfaict et content. Par l’advis, conseil, et praediction des folz vous sçavez quants princes, roys, et republicques ont esté conservez, quantes batailles guaingnées, quantes perplexitez dissolues. Ja besoing n’est vous ramentevoir les exemples. Vous acquiescerez en ceste raison. Car comme celluy qui de prés reguarde a ses affaires privez et domesticques, qui est vigilant et attentif au gouvernement de sa maison, duquel l’esprit n’est poinct esguaré, qui ne pert occasion quelconques de acquerir et amasser biens et richesses, qui cautement sçayt obvier es inconveniens de paovreté, vous appellez Saige mondain, quoy que fat soit il en l’estimation des Intelligences coelestes: ainsi fault il pour davant icelles saige
Page [118v]
estre je diz sage et praesage par aspiration divine, et apte a recepvoir benefice de divination, se oublier soymesmes, issir hors de soymesmes, vuider ses sens de toute terrienne affection, purger son esprit de toute humaine sollicitude, et mettre tout en non chaloir. Ce que vulguairement est imputé a follie. En ceste maniere feut du vulgue imperit appellé Fatuel le grand vaticinateur, Faunus filz de Picus roy des Latins. En ceste maniere voyons nous entre les Jongleurs a la distribution des rolles le personaige du Sot et du Badin estre tous jours representé par le plus perit et perfaict joueur de leur compaignie. En ceste maniere disent les Mathematiciens un mesmes horoscope estre a la nativité des Roys et des Sotz. Et donnent exemple de AEneas, et Choroebus, lequel Euphorion dict avoir esté fol, qui eurent un mesme genethliaque. Je ne seray hors de propous, si je vous raconte ce que dict sus un canon de certain rescript papal addressé au Maire et Bourgeoys de la Rochelle : et apres luy Panorme en ce mesmes canon: Barbatia sus les Pandectes, et recentement Jason en ses conseilz,
Page 119
de Seigny Joan fol insigne de Paris, bisayeul de Caillette. Le cas est tel.

A Paris en la roustisserie du petit Chastelet, au davant de l’ouvrouoir d’un Roustisseur un Faquin mangeoit son pain a la fumée du roust, et le trouvoit ainsi perfumé grandement savoureux. Le Roustisseur le laissoit faire. En fin quand tout le pain feut baufré, le Roustisseur happe le Faquin au collet, et vouloit qu’il luy payast la fumée de son roust. Le Faquin disoit en rien n’avoir ses viandes endommaigé. rien n’avoir du sien prins: en rien ne luy estre debiteur. La fumée dont estoit question, evaporoit par dehors: ainsi comme ainsi se perdoit elle: jamais n’avoit esté ouy que dedans Paris on eust vendu fumée de roust en rue. Le Roustisseur replicquoit que de fumée de son roust n’estoit tenu nourrir les Faquins: et renioit en cas qu’il ne le payast, qu’il luy housteroit ses crochetz. Le Faquin tire son tribart, et se mettoit en defense. L’altercation feut grande. Le badault peuple de Paris accourut au debat de toutes pars. La se trouva a propous Seigny Joan le fol Citadin de Paris. L’ayant apperceu le Roustisseur, demanda au Faquin.

Page [119v]
Veulx tu sus nostre different croire ce noble Seigny Joan ? Ouy par le sambreguoy, respondit le Faquin. Adoncques Seigny Joan avoir leur discord entendu, commenda au Faquin, qu’il luy tirast de son baudrier quelque piece d’argent. Le Faquin luy mist en main un Tournoys Philippus. Seigny Joan le print, et le mist sus son espaule guausche, comme explorant s’il estoit de poys: puys le timpoit sus la paulme de sa main guausche, comme pour entendre s’il estoit de bon alloy: puys le posa sus la prunelle de son oeil droict, comme pour veoir s’il estoit bien marqué. Tout ce feut faict en grande silence de tout le badault peuple, en ferme attente du Roustisseur, et desespoir du Faquin. En fin le feist sus l’ouvroir sonner par plusieurs foys. Puys en majesté Praesidentale tenent sa marote on poing, comme si feust un sceptre, et affeublant en teste son chapperon de martres cingesses a aureilles de papier, fraizé a poincts d’orgues, toussant prealablement deux ou trois bonnes foys, dist a haulte voix. La court vous dict que le Faquin qui a son pain mangé a la fumée du roust, civilement a payé le Roustisseur
Page 120
au son de son argent. Ordonne la dicte court que chascun se retire en sa chascuniere: sans despens, et pour cause. Ceste sentence du fol Parisien tant a semblé equitable, voire admirable es docteurs susdictz, qu’ilz font doubte en cas que la matiere eust esté on Parlement dudict lieu, ou en la rotte a Rome, voire certes entre les Areopagites decidée, si plus juridicquement eust esté par eulx sententié. Pourtant advisez si conseil voulez de un fol prendre.

Real    Hypothetical    Fictional    Mythical   
Region, area    Town, village    Building    Water (lakes, rivers, etc.)    mountains, islands, ...    Other