Comment Panurge se conseille a Her Trippa Chapitre XXV.

Voyez cy (dist Epistemon continuant) toutesfoys que ferez, avant que retournons vers nostre Roy, si me croyez. Icy pres l’ isle Bouchart demeure Her Trippa, vous sçavez comment par art de Astrologie, Geomantie, Chiromantie, Metopomantie, et aultres de pareille farine il praedict toutes choses futures: conferons de vostre affaire avecques luy. De cela (respondit Panurge) je ne sçay rien. Bien sçay je que luy un jour parlant au grand Roy des choses celestes et transcendentes, les lacquais de court par les degrez, entre les huys sabouloient sa femme a plaisir, laquelle estoit assez bellastre. Et il voyant toutes choses aetherées et terrestres sans bezicles, discourant de tous cas passez et praesens, praedisant tout l’advenir, seulement ne voioit sa femme brimballante, et oncques n’en sceut les nouvelles. Bien allons vers luy, puys qu’ainsi le voulez. On ne sçauroit trop apprendre.

Au lendemain arriverent au logis de Her Trippa. Panurge luy donna une robbe de peau de loup, une grande espée bastarde bien dorée a fourreau de velours, et cinquante beaulx angelotz: puis familiairement

avecques luy confera de son affaire. De premiere venue Her Trippa le reguardant en face dist. Tu as la metaposcopie et physionomie d’un coqu. Je diz coqu scandalé et diffamé. Puys consyderant la main dextre de Panurge en tous endroictz, dist. Ce faulx traict que je voy icy au dessus du mons Jovismons JovisJovis, oncques ne feut qu’en la main d’un coqu. Puys avecques un style feist hastivement certain nombre de poinctz divers, les accoubla par Geomantie, et dist. Plus vraye n’est la verité, qu’il est certain que seras coqu, bien tost apres que seras marié. Cela faict, demanda a Panurge l’horoscope de sa nativité. Panurge luy ayant baillé, il fabrica promptement sa maison du ciel en toutes ses parties, et consyderant l’assieté, et les aspectz en leurs triplicitez, jecta un grand souspir et dist. J’avois ja praedict apertement que tu serois coqu, a cela tu ne povoys faillir: icy j’en ay d’abondant asceurance nouvelle. Et te afferme que tu seras coqu. D’adventaige seras de ta femme battu, et d’elle seras desrobbé. Car je trouve la septiesme maison en aspectz tous malings, et en batterie de tous signes portans cornes, comme Aries, Taurus, Capricorne, et aultres. En la quarte je trouve decadence de Jovis, ensemble aspect tetragone de Saturne, associé de Mercure. Tu seras bien poyvré, home de bien.

Je seray (respondit Panurge) tes fortes fiebvres quartaines vieulx fol sot mal plaisant que tu es. Quand tous coqus s’assembleront, tu porteras la baniere. Mais dont me vient ce Cyron icy entre ces deux doigtz? Cela disoit tirant droict vers Her Trippa les deux premiers doigtz ouvers en forme de deux cornes, et fermant on poing tous les aultres. Puys dict a Epistemon. Voyez cy le vray Ollus de Martial. Lequel tout son estude adonnoit a observer et entendre les maulx et miseres d’aultruy. Ce pendent sa femme tenoit le brelant. Il de son cousté paouvre plus que ne feut Irus. Au demourant glorieux, oultrecuydé, intolerable plus que dix sept diables, en un mot, πτωχαλαζών, comme bien proprement telle peaultraille de belistrandiers nommoient les anciens. Allons. Laissons icy ce fol enraigé, mat de cathene, ravasser tout son saoul avecques ses diables privez. Je croirois tantost que les diables voulussent

servir un tel marault. Il ne sçait le premier traict de philosophie, qui est, CONGNOIS TOY . et se glorifiant veoir un festu en l’oeil d’aultruy, ne void une grosse souche laquelle luy poche les deux oeilz. C’est un tel Polypragmon, que descript Plutarche. C’est une aultre Lamie, laquelle en maisons estranges, en public, entre le commun peuple, voyant plus penetramment qu’un Oince, en sa maison propre estoit plus aveugle qu’une Taulpe: chés soy rien ne voioyt. Car retournant du dehors en son privé, oustoit de sa teste ses oeilz exemptiles comme lunettes, et les cachoit dedans un sabot attaché darriere la porte de son logis. A ces motz print Her Trippa un rameau de Tamarix. Il prend bien (dist Epistemon) Nicander la nomme divinatrice.

Voulez vous (dist Her Trippa) en sçavoir plus amplement la verité par Pyromantie, par Aëromantie celebrée par Aristophanes en ses nuées, par Hydromantie, par Lecanomantie, tant jadis celebrée entre les Assyriens et exprovée par Hermolaus Barbarus ? Dedans un bassin plein d’eaue je te monstreray ta femme future brimballant avecques deux rustres. Quand

(dist Panurge) tu mettras ton nez en mon cul, soys recors de deschausser tes lunettes. Par Catoptromantie (dist Her Trippa continuant) moyenant laquelle Didius Julianus empereur de RomeDidius Julianus empereur de RomeRome praevoyoit tout ce que luy doibvoit advenir, il ne te fauldra poinct de lunettes. Tu la voyras en un mirouoir brisgoutant aussi apertement, que si je te la monstrois en la fontaine du temple de Minervetemple de MinerveMinerve pres Patras. Par Coscinomantie jadis tant religieusement observée entre les cerimonies des Romains. Ayons un crible et des forcettes, tu voyras Diables. Par Alphitomantie designée par Theocrite en sa Pharmaceutrie, et par Aleuromantie meslant du froment avecques de la farine. Par Astragalomantie. J’ay ceans les projectz tous prestz. Par Tyromantie. J’ay un fromaige de Brehemont a propous. Par Gyromantie je te feray icy tournoyer force cercles, les quelz tous tomberont a gausche je t’en asceure. par Sternomantie. par ma foy tu as le pictz assez mal proportionné. Par Libanomantie. Il ne fault qu’un peu d’encent. Par Gastromantie, de la quelle en Ferrare longuement usa la dame Jacoba Rhodogine Engastrimythe: par Cephaleonomantie, de laquelle user souloient les Alemans, routissans la teste d’un Asne sus des charbons ardens. Par Ceromantie. La par la cire fondue en eaue tu voiras la figure de ta femme et de ses taboureurs. Par Capnomantie. Sus des charbons ardens nous mettrons de la semence de Pavot et de Sisame. O chose gualante! Par Axinomantie. Fais icy provision seulement d’une coingnée et d’une pierre Gagate, laquelle nous metterons sus la braze. O comment Homere en use bravement envers les amoureux de Penelope. Par Onymantie. Ayons de l’huylle et de la cire. Par Tephramantie. Tu voiras la cendre en l’aër figurante ta femme en belestat. Par Botanomantie. J’ay icy des feuilles de Saulge a propos. Par Sycomantie. O art divine en feuielle de figuier! Par Ichthyomantie tant jadis celebrée et practiquee par Tiresias et Polydamas. Aussi certainement que jadis estoit faict en la fosse Dina on boys sacré a Apollo en la terre des Lyciens. Par Choeromantie. Ayons force pourceaulx, tu en auras la vescie. Par Cleromantie, comme l’on trouve la febve on guasteau la vigile de l’Epiphanie. Par Anthropomantie, de laquelle usa Heliogabalus empereur de RomeHeliogabalus empereur de RomeRome. Elle est quelque peu fascheuse. Mais tu l’endureras assez, puis que tu es destiné coqu. Par Stichomantie Sibylline. Par Onomatommantie. Comment as tu nom? (Maschemerde respondit Panurge) ou bien par Alectryomantie. Je feray icy un cerne gualantement, lequel je partiray toy voyant et considerant en vingt et quatre portions equales. Sus chascune je figureray une letre de l’alphabet: sus chascune letre je poseray un grain de froment: puys lascheray un beau coq vierge a travers. Vous voirez (je vous affie) qu’il mangera les grains posez sus les lettres C.O. Q.U.S.E.R.A. aussi fatidicquement, comme soubs l’ empereur Valens estant en perplexité de sçavoir le nom de son successeur, le coq vaticinateur et Alectryomantic mangea sus les letres Θ.Ε.Ο.Δ. Voulez vous en sçavoir par l’art de Aruspicine? par Extispicine? par Augure prins du vol des oizeaulx? du chant des Oscines? du bal solistime des canes? (Par Estronspicine, respondit Panurge) ou bien par Necromantie? Je vous feray soubdain resusciter quelqu’un peu cy devant mort, comme feist Apollonius de TyaneApollonius de TyaneTyane envers Achilles, comme feist la Phitonisse en praesence de Saul : lequel nous en dira le totage, ne plus ne moins que a l’invocation de Erictho un deffunct praedist a Pompée tout le progres et issue de la bataille Pharsalicque. Ou si avez paour des mors, comme ont naturellement tous coquz, je useray seulement de Sciomantie.

Va (respondit Panurge) fol enraigé au Diable: et te faiz lanterner a quelque Albanoys, si auras un chapeau poinctu. Diable que ne me conseillez tu aussi bien tenir une Esmeraulde, ou la pierre de Hyene soubs la langue? ou me munir de langues de Puputz, et de coeurs de Ranes verdes? ou manger du coeur et du foye de quelque Dracon, pour a la voix et au chant des Cycnes et oizeaulx entendre mes destinées, comme faisoient jadis les Arabes on pays de Mesopotamie ? A trente Diables soit le coqu, cornu, marrane, sorcier au Diable, enchanteur de l’Antichrist. Retournons vers nostre Roy. Je suys asceuré que de nous content ne sera, s’il entend une foys que soyons icy venuz

en la tesniere de ce Diable emgiponné. Je me repens d’y estre venu. Et donnerois voluntiers cent nobles et quatorze roturiers, en condition que celluy qui jadis souffloit on fond de mes chausses, praesentement de son crachatz luy enluminast les moustaches. Vray Dieu comment il m’a perfumé de fascherie et diablerie, de charme et de sorcellerie! Le Diable le puisse emporter. Dictez amen, et allons boyre. Je ne feray bonne chere de deux, non de quatre jours.