Comment Pantagruel explore par sors Virgilianes, quel sera le mariage de Panurge. Chapitre XII.

Adoncques ouvrant Panurge le livre, rencontra on ranc sezieme ce vers.
Nec Deus hunc mensa, Dea nec dignata cubili est.
Digne ne feut d’estre en table du Dieu,
Et n’eut on lict de la Déesse lieu.

Cestuy (dist Pantagruel) n’est a vostre adventaige. Il denote que vostre femme sera ribaulde, vous coqu par consequent. La Déesse que ne aurez favorable, est Minerve vierge tresredoubtée, Déesse puissante, fouldroiante, ennemie des coquz, des muguetz, des adulteres: ennemie des femmes lubricques, non tenentes la foy promise a leurs mariz, et a aultruy soy abandonnantes. Le Dieu est Juppiter tonnant, et fouldroyant des cieulx. Et noterez par la doctrine des anciens Ethrusques, que les manubies (ainsi appelloient

ilz les jectz des fouldres Vulcanicques) competent a elle seulement: exemple de ce feut donné en la conflagration des navires de Ajax Oileus, et a Juppiter son pere capital. A aultres dieux Olympicques n’est licite fouldroier. Pourtant ne sont ilz tant redoubtez des humains. Plus vous diray. et le prendrez comme extraict de haulte mythologie. Quand les Geantz entreprindrent guerre contre les Dieux: les Dieux au commencement se mocquerent de telz ennemis, et disoient qu’il n’y en avoit pas pour leurs pages. Mais quand ilz veirent par le labeur des Geantz le mons Pelion posé dessus le mons Osse, et ja esbranlé le mons Olympe pour estre mis au dessus des deux, feurent tous effrayez. Adoncques tint Juppiter chapitre general. La feut conclud de tous les Dieux, qu’ilz se mettroient vertueusement en defence. Et pource qu’ilz avoient plusieurs foys veu les batailles perdues par l’empeschement des femmes qui estoient parmy les armées, feut decreté, que pour l’heure on chasseroit des cieulx en AEgypte et vers les confins du Nil, toute ceste vessaille des Déesses desguisées en Beletes, Fouines, Ratepenades, Museraignes, et aultres Metamorphoses. Seule Minerve feut de retenue pour fouldroier avecques Juppiter, comme Déesse des letres et de guerre. de conseil et execution: Déesse née armée, Déesse redoubtée on ciel, en l’air, en la mer, et en terre.

Ventre guoy (dist Panurge) seroys je bien Vulcan, duquel parle le poëte? Non. Je ne suys ne boiteux, ne faulx monnoieur, ne forgeron, comme il estoit. Par adventure ma femme sera aussi belle et advenente comme sa Venus : mais non ribaulde comme elle: ne moy coqu comme luy. Le villain jambe torte se feist declairer coqu par arrest et en veute figure de tous les Dieux. Pource entendez au rebours. Ce sort denote que ma femme sera preude, pudicque, et loyalle, non mie armée, rebousse, ne ecervelée et extraicte de cervelle, comme Pallas : et ne me sera corrival ce beau Juppin, et ja ne saulsera son pain en ma souppe, quand ensemble serions a table. Considerez ses gestes et beaulx faictz. Il a esté le plus fort ruffien et plus infame Cor, je diz Bordelier, qui oncques feut: paillard tousjours comme

un Verrat: aussi feut il nourry par une Truie en Dicte de Candie, si Agathocles Babylonien ne ment: et plus boucquin que n’est un Boucq: aussi disent les autres, qu’il feut alaicté d’une chevre Amalthée. Vertus de Acheron il belina pour un jour la tierce partie du monde, bestes et gens, fleuves et montaignes: ce feut Europe. Pour cestuy belinaige les Ammoniens le faisoient protraire en figure de belier belinant, belier cornu. Mais je sçay comment guarder se fault de ce cornart. Croyez qu’il n’aura trouvé un sot Amphitrion, un niais Argus avecques ses cent bezicles: un couart Acrisius, un lanternier Lycus de Thebes, un resveur Agenor, un Asope phegmaticq, un Lychaon patepelue, un modourre Corytus de la Toscane, un Atlas a la grande eschine. Il pourroit cent et cent foys se transformer en Cycne, en Taureau, en Satyre, en Or, en Coqu, comme feist quand il depucella Juno sa soeur: en Aigle, en Belier, en Pigeon comme feist estant amoureux de la pucelle Phthie, laquelle demouroit en AEgie : en Feu, en Serpent, voire certes en Pusse, en Atomes Epicureicques, ou magistronostralement en secondes intentions. Je le vous grupperay au cruc. Et sçavez que luy feray? Corbieu ce que feist Saturne au Ciel son pere. Senecque la de moy predict, et Lactance confirmé. Ce que Rhea feist a Athys. Je vous luy coupperay les couillons tout rasibus du cul. Il ne s’en fauldra un pelet. Par ceste raison ne sera il jamais Pape, car testiculos non habet. Tout beau fillol (dist Pantagruel) tout beau. Ouvrez pour la seconde foys. Lors rencontra ce vers.
Membra quatit, gelidusque coït formidine sanguis.
Les os luy rompt, et les membres luy casse:
Dont de la paour le sang on corps luy glasse.

Il denote (dist Pantagruel) qu’elle vous battera dos et ventre. Au rebours (respondit Panurge) C’est de moy qu’il prognosticque, et dict, que je la batteray en Tigre si elle me fasche. Martin baston en fera l’office. En faulte de baston, le Diable me mange, si je ne la mangeroys toute vive: comme la sienne mangea Cambles

roy des Lydiens. Vous estez (dist Pantagruel) bien couraigeux. Hercules ne vous combatteroit en ceste fureur: mais c’est ce que l’on dict, que le Jan en vault deux. et Hercules seul n’auza contre deux combattre. Je suis Jan ? dist Panurge. Rien, rien, respondit Pantagruel. Je pensois au jeu de l’ourche et tricquetrac. Au tiers coup rencontra ce vers.
Foemineo praedae et spoliorum ardebat amore.
Brusloit d’ardeur en feminin usaige
De butiner, et robber le baguaige.

Il denote (dist Pantagruel) qu’elle vous desrobera. Et je vous voy bien en poinct, scelon ces troys sors. Vous serez coqu, vous serez batu, vous serez desrobbé. Au rebours, (respondit Panurge) ce vers denote, qu’elle m’aymera d’amour perfaict. Oncques n’en mentit le Satyricque, quand il dist: que femme bruslant d’amour supreme, prent quelques foys plaisir a desrobber son amy. Sçavez quoy? Un guand, une aiguillette, pour la faire chercher. Peu de chose, rien d’importance. Pareillement ces petites noisettes, ces riottes qui

par certain temps sourdent entre les amans, sont nouveaulx refraischissemens, et aiguillons d’amour. Comme nous voyons par exemple les coustelleurs leurs coz quelques foys marteler, pour mieulx aiguiser les ferremens. C’est pourquoy je prens ces troys sors a mon grand adventaige. Aultrement j’en appelle. Appeller (dist Pantagruel) jamais on ne peult des jugemens decidez par Sort et Fortune, comme attestent nos antiques Jurisconsultes: et le dict Balde. L. ult. C. de leg. La raison est: pource que Fortune ne recongnoist poinct de superieur, auquel d’elle et de ses sors on puisse appeller. Et ne peult en ce cas le mineur estre en son entier restitué, comme apartement il dict in L. Ait praetor. §. ult. ff. de minor.