Comment Pantagruel et Panurge diversement interpretent les parolles de Triboullet.

Page [140v]

Chapitre XLVI.

Il dict que vous estez fol. Et quel fol? Fol enragé, qui sus vos vieulx jours voulez en mariage vous lier, et asservir. Il vous dict, Guare moine. Sus mon honneur que par quelque moine vous serez faict coqu. Je enguaige mon honneur, chose plus grande ne sçauroys, fusse je dominateur unicque et pacificque en Europe, Africque, et Asie. Notez combien je defere a nostre Morosophe Triboullet. Les aultres oracles et responses vous ont resolu pacificquement coqu, mais n’avoient encores apertement exprimé, par qui seroit vostre femme adultere, et vous coqu. Ce noble Triboullet le dict. Et sera le Coqüage infame, et grandement scandaleux. Fauldra il que vostre lict conjugual soit incesté et contaminé par Moynerie? Dict oultre, que serez la cornemuse de Buzançay, c’est a dire, bien corné, cornard, et cornu. Et ainsi comme il voulant au roy Loys douzieme demander pour un sien frere le contrerolle du sel a Buzançay, demanda une Cornemuse: vous pareillement, cuydant quelque

femme de bien et d’honneur espouser, espouserez une femme vuyde de prudence, pleine de vent d’oultrecuydance, criarde et mal plaisante, comme une cornemuse. Notez oultre, que de la vessie il vous nazardoit, et vous donna un coup de poing sus l’eschine. Cela praesagist que d’elle serez battu, nazardé, et desrobbé, comme desrobbé aviez la vessie de porc aux petitz enfans de Vaubreton.

Au rebours (respondit Panurge). Non que je me vueille impudentement exempter du territoire de follie. J’en tiens et en suys, je le confesse. Tout le monde est fol. En Lorraine Fou est prés Tou par bonne discretion. Tout est fol. Solomon dict que infiny est des folz le nombre. A infinité rien ne peut decheoir, rien ne peut estre adjoinct, comme prouve Aristoteles. Et fol enragé serois, si fol estant, fol ne me reputois. C’est ce que pareillement faict le nombre des maniacques et enraigez infiny. Avicenne dict, que de manie infinies sont les especes. Mais le reste de ses dictz et gestes faict pour moy. Il dict a ma femme, guare moyne. C’est un moyneau qu’elle aura en delices, comme avoit la Lesbie de

Catulle : lequel volera pour mousches, et y passera son temps autant joyeusement que feist oncques Domitian le croquemousche. Plus dict qu’elle sera villaticque et plaisante comme une belle cornemuse de Saulieu ou de Buzançay. Le veridicque Triboullet bien a congneu mon naturel, et mes internes affections. Car je vous affie que plus me plaisent les guayes bergerottes eschevelées, es quelles le cul sent le Serpoullet, que les dames des grandes cours avecques leurs riches atours, et odorans perfums de mauljoinct: plus me plaist le son de la rusticque cornemuse, que les fredonnemens des lucz, rebecz, et violons auliques. Il m’a donné un coup de poing sus ma bonne femme d’eschine. Pour l’amour de Dieu soit, et en deduction de tant moins des poines de Purgatoire. Il ne le faisoit par mal. Il pensoit frapper quelque paige. Il est fol de bien. Innocent je vous affie, et peche qui de luy mal pense. Je luy pardonne de bien bon coeur. Il me nazardoit. Ce seront petites follastries entre ma femme et moy, comme advient a tous nouveaux mariez.