Comment Frere Jan joyeusement conseille Panurge

Page 89

Chapitre XXVII.

Par sainct Rigomé (dist frere Jan) Panurge mon amy doulx, je ne te conseille chose que je ne feisse, si j’estoys en ton lieu. Seulement ayez esguard et consyderation de tousjours bien lier et continuer tes coups. Si tu y fays intermission, tu es perdu paouvret: et t’adviendra ce que advient es nourrisses. Si elles desistent alaicter enfans, elles perdent leur laict. Si continuellement ne exercez ta mentule, elle perdra son laict, et ne te servira que de pissotiere: les couilles pareillement ne te serviront que de gibbessiere. Je t’en advise mon amy. J’en ay veu l’experience en plusieurs: qui ne l’ont peu quand ilz vouloient: car ne l’avoient faict quand le povoient. Aussi par non usaige sont perduz tous privileges, ce disent les clercs. Pourtant fillol maintien tout ce bas et menu populaire Troglodyte, en estat de labouraige sempiternel. Donne ordre qu’ilz ne vivent en gentilz homes: de leurs rantes, sans rien faire.

Ne dea (respondit Panurge) frere Jan mon couillon guausche, je te croiray. Tu

vas rondement en besoigne. Sans exception ne ambagés tu m’as apertement dissolu toute craincte qui me povoit intimider. Ainsi te soit donné dés cieulx, tousjours bas et roydde operer. Or doncques a ta parolle je me mariray. Il n’y aura poinct de faulte. Et si auray tousjours belles chambrieres, quand tu me viendras veoir, et seras protecteur de leur sororité. Voyla quand a la premiere partie du sermon. Escoute (dist frere Jan) l’oracle des cloches de Varenes. Que disent elles? Je les entends, (respondit Panurge). Leur son est par ma soif plus fatidicque que des chauldrons de Juppiter en Dodone. Escoute. Marie toy, marie toy: marie, marie. Si tu te marie, marie, marie, tresbien t’en trouveras, veras, veras. Marie, marie. Je te asceure que je me mariray: tous les elemens me y invitent. Ce mot te soit comme une muraille de bronze.

Quant au second poinct, tu me semblez aulcunement doubter, voyre deffier de ma paternité: comme ayant peu favorable le roydde Dieu des jardins. Je te supply me faire ce bien de croire, que je l’ay a commandement, docile, benevole, attentif, obeissant

en tout et partout. Il ne luy fault que lascher les longes, je diz l’aiguillette, luy monstrer de pres la proye: et dire, hale compaignon. Et quand ma femme future seroit aussi gloutte du plaisir Venerien, que fut oncques Messalina, ou la marquise de Oinsestre en Angleterre, je te prie croire, que je l’ay encores plus copieux au contentement. Je ne ignore que Solomon dict, et en parloit comme clerc et sçavant: depuys luy Aristoteles a declairé l’estre des femmes estre de soy insatiable: mais je veulx qu’on saiche que de mesmes qualibre j’ay le ferrement infatiguable. Ne me allegue poinct icy en paragon les fabuleux ribaulx Hercules, Proculus Caesar, et Mahumet, qui se vente en son Alchoran avoir en ses genitoires la force de soixante guallefretiers. Il a menty le paillard. Ne me alleguez poinct l’Indian tant celebré par Theophraste, Pline, et Athenaeus, lequel avecques l’ayde de certaine herbe le faisoit en un jour soixante et dix fois et plus. Je n’en croy rien. le nombre est supposé. Je te prie ne le croyre. Je te prie croyre (et ne croyras chose que ne soit vraye) mon naturel le sacre Ithyphalle messer Cotal d’ AlbinguesCotal d’ AlbinguesAlbingues, estre le prime d’el monde, Escoute ça couillette. Veidz tu oncques le froc du moine de Castresmoine de CastresCastres ? Quand on le posoit en quelque maison, feust a descouvert, feust a cachettes, soubdain par sa vertus horrificque tous les manens et habitans du lieu entroient en ruyt bestes et gens: homes et femmes, jusques aux ratz et aux chatz. Je te jure qu’en ma braguette j’ay aultres foys congneu certaine energie encores plus anomale. Je ne te parleray de maison ne de buron: de sermon ne de marché: mais a la passion qu’on jouoit a sainct Maixent entrant un jour dedans le parquet je veidz par la vertus et occulte proprieté d’icelle soubdainement tous tant joueurs que spectateurs entrer en tentation si terrificque, qu’il ne y eut Ange, Home, Diable, ne Diablesse, qui ne voulust biscoter. Le Portecole abandonna sa copie: celluy qui jouoit sainct Michel, descendit par la volerie: les Diables sortirent d’enfer, et y emportoient toutes ces paovres femmelettes: mesmes Lucifer se deschayna. Somme, voyant le desarroy, je deparquay du lieu: a l’exemple de Caton le Censorin : lequel voyant par sa praesence les festes Floralies en desordre, desista estre spectateur.