Il advint du depuis a cause de la mort dudict Bringuenarilles ung aultre cas si merveilleux que je ne vous en ause rescripre la verite de peur que vous ne disiez que je mentz (combien qu’il soit vray) c’est que au lieu ou ledict Bringuenarilles mourut et qu’il fut brusle, la

Au regard de ses disciples ilz se saulverent ou ilz peurent, mais non pas sans estre fort interessez en leurs personnes, la terre ou le cas advint demoura si grasse et si fertille qu’elle produict par chascun an plus de mille moulins a vent avec les musniers et les asnes tous propres a servir aux dictz moulins.

Les gentilz hommes du pays en vont achepter ce pendant qu’il sont encores petitz, devant qu’ilz soient venus en maturite et a perfection et les font mener en leurs terres et seigneuries sur des brouettes puis les font planter, et lors qu’ilz sont grandz et parcrus il ne leur fault que tourner les aesles vers le vent et lors ilz meullent et tournent comme font ceulx de par deca.

Le seigneur a qui est la terre la ou ilz croissent en recoipt par chascun an ung merveilleux argent de ceulx qui les vont achepter car l’on en meine par mer et par terre ung nombre infiny.