Or est il ainsi comme on dict en ung commun proverbe qu’il n’est si feible ne si fort (s’il

Il advint une merveilleuse advanture audict Bringuenarilles dont il ne se doubtoit point, car comme il estoit ung jour au bort de la mer pres d’ung moulin a vent, auquel il y avoit ung gros mastin de chien lequel ne cessoit de abayer apres ledict Bringuenarilles par quoy il ne povoit reposer nuyct ne jour, dont il fut si fort despite que par fureur et ire il ouvrit la bouche si grande qu’il degloutit et avalla ledict moulin tout entier sans rompre ny casser aulcune chose avec le musnier et son chien tous en vie tant avoit la bouche grande et fendue, par quoy vous povez tous croire qu’il eust bien avale ung noyau de cerise sans mascher.

Et pource qu’il avoit les narines proportionnez a la bouche et que le vent donnoit dedans ledict moulin mouloit et tournoit en son estomac comme s’il eust este en plains champs, toutesfoys il print bien audict musnier de ce qu’il avoit encor force sacz pleins de bled par quoy il laissa tousjours mouldre et tourner ledict moulin, Ce non obstant quant il n’eust plus que mouldre le feu se print es meules et brusla ledict moulin dedans le ventre dudict Bringuenarilles, par quoy il tumba en fiebvre continue tant a cause du feu que du clacquet d’icelluy moulin,