Comment Pantagruel partit de Paris ouyant nouvelles que les Dipsodes envahyssoient le pays des Amaurotes Et la cause pourquoy les lieues sont tant petites en France. Chapitre. xxiij.

Page [93v]

Peu de temps apres Pantagruel ouyt nouvelles que son pere Gargantua avoit este translaté au pays des Phees par Morgue, comme feut jadis Ogier et Artus, ensemble que le bruyt de sa translation entendu, les Dipsodes estoyent yssus de leurs limites, et avoyent gasté un grand pays de Utopie, et tenoyent pour lors la grande ville des Amaurotes assiegée, Dont partit de Paris sans dire a dieu a nul luy: car l'affaire requeroit diligence, et vint a Rouen.Or en cheminant voyant Pantagruel que les lieues de France estoient petites par trop au regard des aultres pays. en demanda la cause et raison a Panurge, lequel luy dist une histoire que mect Marotus du lac monachus es gestes des Roys de Canarre.

Disant que d'ancienneté les pays n'estoyent distinctz par lieues, miliaires, stades, ny parasanges, jusques a ce que le roy Pharamond les distingua, ce que feut faict en la maniere que s'ensuyt.

Page Fu.94.

Car il print dedans Paris cent beaulx jeunes et gallans compaignons bien de liberez, et cent belles garses Picardes, et les feist bien traicter et bien penser par huyt jours, puis les appella et a un chascun bailla sa garse avecques force argent pour les despens, leur faisant commandement qu'ilz allassent en divers lieux par cy et par la, Et a tous les passaiges qu'ilz biscoteroyent leurs garses que ilz missent une pierre, et ce seroit une lieue. Ainsi les compaignons joyeusement partirent, et pource qu'ilz estoient frays et de sejour ilz fanfreluchoient a chasque bout de champ, et voyla pourquoy les lieues de France sont tant petites.Mais quand ilz eurent long chemin parfaict et estoient ja las comme pauvres diables et n'y avoit plus dolif en lycaleil, ilz ne belinoyent si souvent et se contentoyent bien (j'entends quand aux hommes) de quelque meschante et paillarde foys le jour, Et voyla qui faict les lieues de

Page [94v]
Bretaigne, De lanes, d' allemaigne, et aultre pays plus esloignez, si grandes. Les aultres mettent d'aultres raisons: mais celle la me semble la meilleure. A quoy consentit voluntiers Pantagruel.Partans de Rouen arriverent a Hommefleur ou se mirent sur mer Pantagruel, Panurge, Epistemon, Eusthenes, et Carpalim. Auquel lieu attendans le vent propice et calfretant leur nef receut d'une dame de Paris (laquelle il avoit entretenue bonne espace de temps) unes lettres inscriptes au dessus.Au plus aymé des belles, et moins loyal des preux. PANTAGRUEL.

Réel    Hypothétique    Fictif    Mythique   
Région, contrée    Ville, village    Bâtiment    Étendue, cours d'eau    Montagne, île, ...    Autre