Comment Panurge se conseille a Triboullet. Chapitre XLV.

Au sixiesme jour subsequent Pantagruel feut de retour: en l’heure que par eaue de Bloys estoit arrivé Triboullet. Panurge a sa venue luy donna une vessie de porc bien enflée, et resonante a cause des poys qui dedans estoient: plus une espée de boys bien dorée: plus une petite gibbessiere faicte d’une coque de Tortue: plus une bouteille clissée pleine de vin Breton: et un quarteron de pommes Blandureau. Comment, (dist Carpalim) est il fol, comme un chou, a pommes? Triboullet ceignit l’espée et la gibbessiere, print la vessie en main: mangea part des pommes: beut tout le vin. Panurge le reguardoit curieusement: et dist. Encores ne veids je oncques fol, et si en ay veu pour plus de dix mille francs, qui ne beust voluntiers et a longs traictz. Depuys luy exposa son affaire en parolles rhetoriques et eleguantes. Davant qu’il eust achevé,

Triboullet luy bailla un grand coup de poing entre les deux espaules, luy rendit en main la bouteille: le nazardoit avecques la vessie de porc, et pour toute response luy dist, branslant bien fort la teste. Par Dieu, Dieu, fol enraigé, guare moine, cornemuse de Buzançay. Ces parolles achevées s’esquarta de la compaignie, et jouoit de la vessie, se delectant au melodieux son des poys. Depuys ne feut possible tirer de luy mot quelconques. Et le voulant Panurge d’adventaige interroger, Triboullet tira son espée de boys, et l’en voulut ferir.

Nous en sommes bien vrayement, (dist Panurge). Voyla belle resolution. Bien fol est il, cela ne se peult nier: mais plus fol est celluy qui me l’amena: et je tresfol, qui luy ay communicqué mes pensées. C’est (respondit Carpalim) droict visé a ma visiere. Sans nous esmouvoir, (dist Pantagruel) considerons ses gestes et ses dictz. En iceulx j’ay noté mysteres insignes, et plus tant que je souloys ne m’esbahys de ce que les Turcs reverent telz folz comme Musaphiz et Prophetes. Avez vous consideré, comment sa teste s’est

avant qu’il ouvrist la bouche pour parler, crouslée et esbranlée? Par la doctrine des antiques Philosophes, par les ceremonies des Mages, et observations des Jurisconsultes povez juger que ce mouvement estoit suscité a la venue et inspiration de l’esprit fatidicque, lequel brusquement entrant en debile et petite substance, (comme vous sçavez que en petite teste ne peut estre grande cervelle contenue) l’a en telle maniere esbranlée, que disent les Medicins tremblement advenir es membres du corps humain, sçavoir est, part pour le pesanteur et violente impetuosité du fays porté: part pour l’imbecillité de la vertus et organe portant. Exemple manifeste est en ceulx qui a jeun ne peuvent en main porter un grand hanat plein de vin sans trembler des mains. Cecy jadis nous praefiguroit la divinatrice Pythie, quand avant respondre par l’oracle escroulloit son laurier domesticque. Ainsi dict Lampridius que l’empereur Heliogaballus pour estre reputé divinateur par plusieurs festes de son grand Idole, entre les retaillatz fanaticques bransloit publicquement la teste. Ainsi declare Plaute en son Asnerie, que Saurias cheminoit branslant la teste, comme furieux et hors du sens, faisant paour a ceulx qui le rencontroient. Et ailleurs exposant pourquoy Charmides bransloit la teste, dict qu’il estoit en ecstase. Ainsi narre Catulle en Berecynthia et Atys du lieu, on quel les Maenades femmes Bacchicques, prebstresses de Bacchus, forcenées, divinatrices, portantes rameaulx de Lierre bransloient les testes. Comme en cas pareil faisoient les Gals escouillez prebstres de Cybele, celebrans leurs offices. Dont ainsi est dicte scelon les antiques Theologiens. car Κυβίσται signifie, rouer, tortre, bransler la teste, et faire le torti colli. Ainsi escript, que es Bacchanales de Rome, les homes et femmes sembloient vaticiner a cause de certain branslement et jectigation du corps par eulx contrefaicte. Car la voix commune des Philosophes, et l’opinion du peuple estoit, vaticination ne estre jamais des cieulx donnée sans fureur et branslement du corps tremblant et branslant, non seulement lors qu’il la recevoit, mais lors aussi qu’il la manifestoit et declaroit. De faict Julian Jurisconsulte insigne quelques foys interrogé, si le serf seroit tenu pour sain, lequel en compaignie de gens fanaticques et furieux, auroit conversé, et par adventure vaticiné, sans toutesfoys tel branslement de teste, respondit estre pour sain tenu. Ainsi voyons nous de praesent les praecepteurs et Paedaguoges esbransler les testes de leurs disciples (comme on faict un pot par les anses) par vellication et erection des aureilles, qui est (scelon la doctrine des saiges AEgyptiens) membre consacré a Memoire) affin de remettre leurs sens, lors par adventure esguarez en pensemens estranges, et comme effarouchez par affections abhorrentes, en bonne et philosophicque discipline. Ce que de soy confesse Virgile en l’esbranlement de Apollo Cynthius.