Comment nous fut monstré Papegaut à grande difficulté. CHAP. VIII.

Le tiers jour continua en festins et mesmes banquets que les deux jours precedents.

Auquel jour Pantagruel requeroit instamment veoir Papegaut: mais Aeditue respondit, qu'il ne se laissoit ainsi facilement veoir. Comment, dist Pantagruel, a il l'armet de Platon en teste, l'anneau de Gyges es grifes, ou un Chameleon en sein pour se rendre invisible au monde? Non, respondit Aeditue : mais il par nature est à veoir un peu difficile. Je donneray toutesfois ordre, que le puissiez veoir si faire se peult. Ce mot achevé nous laissa au lieu grignotans. Un quart d'heure apres retourné nous dist Papegaut estre pour ceste heure visi-:ble et nous mena en tapinois et silence droit en la cage en laquelle il estoit acroué accompagné de deux petits Cardingaux, et de six gros et gras Evesgaux. Panurge curieusement considera sa forme, ses gestes, son maintien. Puis s'escria à haute voix disant, en mal-an soit la beste, il semble une duppe. Parlez bas, dit Aeditue, de par Dieu, il a aureilles, comme sagement denota Michael de matiscones. Si a bien une duppe, dit Panurge. Si une fois il vous entend ainsi blasphemans, vous estes perdus bonnes gens, voyez vous là dedans sa cage un bassin? D'iceluy sortira foudre, tonnoirre, esclairs, diables et tempeste: par lesquels en un moment serez cent pieds souz terre abismez. Mieux seroit, dist frere Jehan, boire et banqueter. Panurge restoit en contemplation vehemente de Papegaut, et de sa compagnie, quand il apperçeut au dessouz de sa cage une cheveche: adonc se escria, disant. Par la vertu Dieu nous sommes icy bien pippez à plaines pippes, mal equippez. Il y a par Dieu de la pipperie, fripperie, et ripperie tant et plus en ce manoir. Regardez là ceste cheveche, nous sommes par Dieu assassinez. Parlez bas de par Dieu, dist Aeditue, ce n'est mie une cheveche, il est masle, c'est un noble chevecier. Mais, dist Pantagruel, faictes nous icy quelque peu Papegaut chanter, afin qu'oyons son armonie? Il ne chante, respondit Aeditue, qu'à ses heures, et ne mange qu'à ses heures. Non fay-je, dit Panurge, mais toutes les heures sont miennes. Allons donques boire d'autant. Vous, dist Aeditue, parlez à ceste heure correct, ainsi parlans jamais ne serez heretique. Allons j'en suis d'opinion. Retournans à la beuverie apperçeusmes un vieil Evesgaux à teste verde, lequel estoit acroué accompagné de trois Onocrotales oiseaux joyeux: et ronfloient sous une fueillade. Pres luy estoit une jolie Abbegesse, laquelle joyeusement chantoit, et y prenions plaisir si grand, que de- sirions tous nos membres en aureilles convertis, rien ne perdre de son chant, et du tout, sans ailleurs estre distrait, y vaquer. Panurge dit, ceste belle Abbegesse se rompt la teste à force de chanter, et ce gros vilain Evesgaut ronfle ce pendant, Je le feray bien tantost chanter de par le diable. Lors sonna une cloche pendante sus sa cage, mais quelque sonnerie qu'il fist, plus fort ronfloit Evesgaut, point ne chantoit. Par Dieu dist Panurge, vieille buze par moyen autre bien chanter je vous feray. Adonques print une grosse pierre le voulant ferir par la moitié. Mais Aeditue s'escria disant, homme de bien frappe, feris, tue, et meurtris tous Roys et Princes du monde, en trahison, par venin, ou autrement quand tu voudras, deniche des cieux les anges, de tout auras pardon du Papegaut, à ces sacrez oiseaux ne touche, d'autant qu'aymes la vie, le profit, le bien, tant de toy que de tes parens et amis vifs et trespassez: encores ceux qui d'eux apres naistroient en seroient infortunez: Considere bien ce bassin. Mieux donques vaut, dit Panurge, boire d'autant et banqueter. Il dist bien monsieur Antitus, dist frere Jehan : cy voyans ces diables d'oiseaux ne faisons que blasphemer, vuydant vos bouteilles et pots ne faisons que Dieu louer. Allons donques boire d'autant. O le beau mot.

Le troisiesme jour apres boire (comme entendez) nous donna Aeditue congé. Nous luy fismes present d'un beau petit cousteau perguois, lequel il print plus à gré, que ne fist Artaxerxes le voirre d'eauë froide que luy presenta un païsant. Et nous remercia courtoisement: envoya en nos navires refreschissement de toutes munitions: nous souhaita bon voyage, et venir à sauvement de nos personnes, et fin de nos entreprinses, et nous fist promettre et jurer par Jupiter pierre, que nostre retour seroit par son territoire. En fin nous dist, amis vous notterez que par le monde y a beaucoup plus de couillons que d'hommes: et de ce vous souvienne.