Comment nous descendismes en l' Isle d'Odes, en laquelle les chemins cheminent. CHAP. XXV.

Avoir par deux jours navigé, s'offrit à nostre veuë l' Isle d'Odes, en laquelle vismes une chose memorable. Les chemins y sont animaux, si vraye est la sentence d' Aristoteles, disant argument invincible d'un animant, si se meut de soy- mesme. Car les chemins cheminent comme animaux. Et sont les uns chemins errans, à la semblance des planetes: autres chemins passans, chemins croisans, chemins traversans. Et vy que les voyagiers, souvent ès habitans du païs demandoient, ou va ce chemin, et cestuy-cy. On leur respondoit, entre midy et fevrolles, à la parroisse, à la ville, à la riviere. Puis se guindans au chemin oportun, sans autrement se peiner ou fatiguer, se trouvoient au lieu destiné: comme vous voyez advenir à ceux, qui de Lyon en Avignon et Arles se mettent en basteau, sur le Rosne. Et comme vous savez, qu'en toutes choses il y a de la

faute, et rien n'est en tous endroits heureux, aussi là nous fut dict estre une maniere de gens, lesquels ils nommoient, guetteurs de chemins, et batteurs de pavez. Et les pauvres chemins les craignoient, et s'esloignoient d'eux, comme de brigans. Ils les guettoient au passage, comme on fait les loups à la trainee, et les becasses au fillet. Je vy un d'iceux, lequel estoit apprehendé de la justice pour ce qu'il avoit prins injustement malgré Pallas le chemin de l'escole, s'estoit le plus long: un autre se ventoit avoir prins de bonne guerre le plus court disant luy estre tel advantage à ceste rencontre que premier venoit à bout de son entreprinse. Aussi dist Carpalin à Epistemon quelque jour le rencontrant, la pissotiere au poing, contre une muraille pissant que plus ne s'esbahissoit si tousjours premier estoit au lever du bon Pantagruel, car il tenoit le plus court et le moins chevauchant. Je y recongnu le grand chemin de Bourges, et le vy marcher à pas d'Abbé, et le vy aussi fuir à la venue de quelques charretiers qui le menassoient fouller avec les pieds de leurs chevaux et luy faire passer les charrettes dessus le ventre comme Tullia fist passer son charriot dessus le ventre de son pere Servius

Page [108]

Tullius sixiesme Roy des Romains. Je y recongnu pareillement le vieu quemin de Peronne à sainct Quentin et me sembloit quemin de bien de sa personne. Je y recongnu entre les rochers le bon vieux chemin de la Ferrare sus le mont d'un grand Ours. Le voyant de loing me souvint de sainct Hierosme en peinture, si son Ours eust esté Lyon, car il estoit tout mortifié, avoit la longue barbe toute blanche et mal peignee, vous eussiez proprement dit que fussent glassons: avoit sur soy force grosses patenostres de pinastre mal rabottees, et estoit comme à genoillons, et non debout ne couché du tout, et se battoit la poitrine avec grosses et rudes pierres, il nous fist peur et pitié ensemble. Le regardant nous tira à part un bachelier courant du païs et monstrant un chemin bien licé tout blanc et quelque peu feustré de paille nous dist, dorenavant ne desprisez l'opinion de Thales Milesien disant l'eau estre de toutes choses le commencement ne la sentence d' Homere affermant toute chose prendre naissance de l'Ocean. Ce chemin, que voyez, nasquit d'eau et s'y en retournera: devant deux mois les basteaux par-cy passoient, à ceste heure y passent les charrettes. Vrayement dist Pantagruel vous nous la baillez bien piteuse. En nostre monde nous en voyons tous les ans de pareille transformation cinq cens et davantage. Puis considerans les alleures de ces chemins mouvans nous dist que selon son jugement Philolaus, Aristarchus, avoient en icelle Isle philosophe Seleucus, prins opinion d'affermer la terre veritablement au tour des poles se mouvoir non le Ciel, encores qu'il nous semble le contraire estre verité. Comme estans sur la riviere de Loire nous semblent les arbres prochains se mouvoir, toutesfois ils ne se mouvent mais nous par le decours du batteau. Retournans à nos navires vismes que pres le rivage on mettoit sus la rouë trois guetteurs de chemins qui avoient esté prins en embuscade et brusloit à petit feu un grand paillard lequel avoit battu un chemin et luy avoit rompu une coste, et nous fut dict que c'estoit le chemin des aggeres et levees du nil en Egypte.