Comment les trente deux personnages du bal combatent. CHAP. XXIIII.

Ainsi posees en leurs assiettes les deux compagnies, les musiciens commencent ensemble sonner, en intonation martiale, assez espouventablement, comme à l'assault. Là voyons les deux bandes fremir, et soy affermer pour bien combatre, venant l'heure du hourt, qu'ils seront evoquez hors leur camp. Quand soudain les musiciens de la bande argentee cesserent, seulement sonnoient les organes de la bande auree. En quoy il nous estoit signifié que la bande auree assailloit. Ce que bien tost advint: car à un ton nouveau, veismes, que la Nymphe parquee devant la Royne, fist un tour entier à gausche vers son Roy, comme demandant congé d'entrer en combat, ensemble aussi saluant toute sa compagnie:

Puis desmarcha deux carreaux avant, en bonne modestie, et fist d'un pied reverence à la bande adverse, laquelle elle assailloit. Là cesserent les musiciens aurez, commencerent les argentez. Icy n'est à passer en silence, que la Nymphe avoit en tour salué son Roy et sa compagnie, afin qu'eux ne restassent ocieux. Pareillement la resaluerent en tour entier gyrans à gausche: exceptee la Royne, laquelle vers son Roy se destourna à dextre, et fut ceste salutation de tous desmarchans observee, en tout le discours du bal, le ressaluement aussi, tant d'une bande comme de l'autre. Au son des musiciens argentez desmarcha la Nymphe argentee: laquelle estoit parquee devant sa Royne, son Roy saluant gratieusement, et toute sa compagnie, eux de mesme la resaluans, comme a esté dict des aurees: excepté qu'ils tournoient à dextre, et leur Royne à senestre: se posa sur le second carreau avant, et faisant reverence à son adversaire, se tint en face de la premiere Nymphe auree. sans distance aucune, comme prestes à combatre, ne fust, qu'elles ne frappent que des costez. Leurs compagnes les suyvent, tant aurees comme argentees en figure intercalaire: et là font comme apparence de escarmoucher: tant que la nymphe auree, laquelle estoit premiere en camp entree, frappant en main une Nymphe argentee à gausche, la mist hors du camp, et occupa son lieu: mais bien tost à son nouveau des musiciens, fut de mesme frappee par l'Archer argenté: une Nymphe auree le fist ailleurs serrer: le Chevalier argenté sortit en camp: La Royne auree se parqua devant son Roy.

Adonc le Roy argenté change place, doutant la furie de la Royne auree: et se retira au lieu de son Custode à dextre, lequel lieu sembloit tresbien muny, et en bonne defense.

Les deux Chevaliers qui tenoient à gausche, tant aurez qu'argentez, desmarchent, et font amples prinses des Nymphes adverses, lesquelles ne pouvoient arriere soy retirer: mesmement le Chevalier auré, lequel met toute sa cure à prinse de Nymphes. Mais le Chevalier argenté pense chose plus importante: dissimulant son entreprinse, et quelquefois qu'il a peu prendre une Nymphe auree, il la laisse, et passe outre, et à tant faict, qu'il s'est posé pres ses ennemis, en lieu auquel il a salué le Roy advers, et dit, Dieu vous gard. La bande auree ayant cestuy advertissement de secourir son Roy fremist toute, non que facilement

elle ne puisse au Roy secours soudain donner, mais que leur Roy salvant, ils perdoient leur Custode dextre sans y pouvoir remedier. Adonques se retira le Roy auré à gausche, et le Chevalier argenté print le Custode auré: ce que leur fut en grande perte. Toutesfois la bande auree delibere de s'en venger, et l'environnent de tous costez, à ce que reffuir ils ne puisse ny eschapper de leurs mains. Il fait mille efforts de sortir, les siens font mille ruses pour le garentir, mais en fin la Royne auree le print.

La bande auree privee d'un de ses supposts s'esvertue, et à tors et à travers cherche moyen de soy venger, assez incautement: et fait beaucoup de dommage parmy l'ost des ennemis. La bande argentee dissimule, et attend l'heure de revanche: et presente une de ses Nymphes à la Royne auree, luy ayant dressé une embuscade secrette, tant qu'à la prinse de la Nymphe peu s'en faillit que l'Archer auré ne surprint la Royne argentee. Le Chevalier auré intente prinse de Roy et Royne argentee, et dit bon jour. L'Archer argenté les saluë, il fut prins par une Nymphe auree: icelle fut prinse par une Nymphe argentee. La bataille est aspre. Les Custodes sortent

hors de leurs sieges au secours. Tout est en meslee dangereuse, Enyo encores ne se declare. Aucunefois tous les argentez enfoncent jusques à la tante du Roy auré, soudain sont repoussez. Entre autres la Royne auree fait grandes prouesses: et d'une venue prent l'Archer, et costoyant prent le Custode argenté. Ce que voyant la Royne argentee se met en avant, et foudroye de pareille hardiesse: et prent le dernier Custode auré, et quelque Nymphe pareillement. Les deux Roynes combatirent longuement, part taschant de s'entresurprendre, par pour soy sauver, et leurs Roys contregarder. Finalement la Royne auree print l'argentee, mais soudain apres elle fut prinse par l'Archer argenté. Là seulement au Roy auré resterent trois Nymphes, un Archer, et un Custode. A l'argenté restoient trois Nymphes, et le Chevalier dextre, ce que fut cause qu'au reste plus cautement et lentement ils combatirent. Les deux Roys sembloient dolens d'avoir perdu leurs dames Roynes tant aimees: et est tout leur estude et tout leur effort d'en recevoir d'autres s'ils peuvent de tout le nombre de leurs Nymphes à ceste dignité et nouveau mariage les aimer joyeusement avec promesses ertaines d'y estre receues si elles penetrent jusques à la derniere filliere du Roy ennemy. Les aurees anticipent, et d'elles est creé une Royne nouvelle, à laquelle on impose une couronne en chef, et baille l'on nouveaux accoustremens.

Les argentees suyvent de mesme: et plus n'estoit qu'une ligne, que d'elles ne fust Royne nouvelle creée: mais en cestuy endroit le Custode auré la guettoit, pourtant elle s'arresta quoy.

La nouvelle Royne auree voulut à son advenement, forte, vaillante, et belliqueuse se monstrer. Fist grans faicts d'armes parmy le camp. Mais en ces entrefaictes le Chevalier argenté print le Custode auré, lequel gardoit la mete du camp, par ce moyen fut faicte nouvelle Royne argentee. Laquelle se voulut semblablement vertueuse monstrer à son nouveau advenement. Fut le combat renouvellé plus ardent que devant. Mille ruses, mille assaulx, mille desmarches furent faictes, tant d'un costé que d'autre: si bien que la Royne argentee clandestinement entra en la tante du Roy auré disant, Dieu vous gard. Et ne peust estre secouru que par sa nouvelle Royne. Icelle ne fist difficulté de soy opposer pour le sauver. Adonques le Chevalier argenté, voltigeant de tous costez se rendoit pres

sa Royne, et misrent le Roy auré en tel desarroy que pour son salut luy convint perdre sa Royne. Mais le Roy auré print le Chevalier argenté. Ce nonobstant l'Archer auré avec deux Nymphes qui restoient à toutes leurs puissances defendoient leur Roy, mais en fin tous furent prins et mis hors le camp: et demeura le Roy auré seul. Lors de toute la bande argentee luy fut dit en profonde reverence, bon jour, comme restant le Roy argenté vainqueur. A laquelle parolle les deux compagnies des musiciens commencerent ensemble sonner, comme victoire. Et print fin ce premier bal en tant grande allegresse, gestes tant plaisans, maintien tant honneste, graces tant rares, que nous fusmes tous en nos esprits rians comme gens ecstatiques: et non à tord nous sembloit que nous fussions transportez es souveraines delices et derniere felicité du ciel Olimpe.

Fini le premier tournay retournerent les deux bandes en leur assiette premiere, et comme avoient combatu paravant ainsi commencerent à combatre pour la seconde fois: excepté que la musique fut en sa mesure serree d'un demy temps, plus que la precedente, Les progrez aussi totalement differens du premier. La je vy que la Royne

auree comme despitee de la route de son armee fut par l'intonation de la musique evoquee et se mist des premieres en camp avec un Archer et un Chevalier et peu s'en faillit qu'elle ne surprint le Roy argenté en sa tante au millieu de ses officiers. Depuis voyant son entreprinse descouverte s'escarmoucha parmy la trouppe, et tant desconfit de Nymphes argentees et autres officiers, que c'estoit cas pitoiable les voir. Vous eussiez dit que ce fut une autre Panthasilee Amazone foudroyante par le camp des Gregeois, mais peu dura cestuy esclandre, car les argentees fremissans à la perte de leurs gens, dissimulans toutefois leur dueil, luy dresserent occultement en embuscade un Archer en angle lointain, et un Chevalier errant, par lesquels elle fut prinse et mise hors le camp. Le reste fut bien tost deffait. Elle sera une autrefois mieux advisee: pres de son Roy se tiendra, tant loin ne s'escartera, et ira quand aller faudra, bien autrement accompagnee. La donques resterent les argentez vainqueurs, comme devant.

Pour le tiers et dernier bal, se tindrent en pieds les deux bandes, comme devant, et me semblerent porter visage plus gay et deliberé, qu'es deux precedens. Et fut la

musique serree en la mesure plus que de hemiole, et intonation Phrygienne et bellique, comme celle qu'inventa jadis Marsyas. Adonques commencerent tournoyer, et entrer en combat, avec telle legereté, qu'en un temps de la musique ils faisoient quatre desmarches, avec les reverences de tours competans, comme avons dit dessus: de mode que ce n'estoient que saux, gambades et voltigemens petauristiques, entrelassez les uns parmy les autres. Et les voyans sus un pied tournoyer, apres la reverence faite, les comparions au mouvement d'une Rhombe girante, au jeu des petis enfans, moyennant les coups de fouet: lors que tant subit est son tour, que son mouvement est repos, elle semble quiete, non soy mouvoir, ains dormir, comme il le nomment. Et y figurant un point de quelque couleur, semble à nostre veuë non point estre, mais ligne continue, comme sagement l'a noté Cusane, en matiere bien divine.

Là nous n'oyons que frappemens de mains, et episemasies à tous destroits reiterez tant d'une bande que d'autre. Il ne fut onques tant severe Caton, ne Crassus l'ayeul tant agelaste, ne Timon Athenien tant misanthrope, ne Heraclitus tant abhorrant

du propre humain, qui est, rire, qui n'eust perdu contenance, voyant au son de la musique tant soudaine, en cinq cens diversitez, si soudain se mouvoir, desmarcher sauter, voltiger, gambader, tournoyer ces jouvenceaux avecq'les Roynes et Nymphes, en telle dexterité qu'onques l'un ne fist empeschement à l'autre. Tant moindre estoit le nombre de ceux qui restoient en camp, tant estoit le plaisir plus grand, veoir les ruses et destours, desquels ils usoient pour surprendre l'un l'autre, selon que par la musique leur estoit signifié. Plus vous diray, si ce spectacle, plus qu'humain, nous rendoit confus en nos sens, estonnez en nos esprits, et hors de nous-mesmes, Encores plus sentions nous nos coeurs esmeus et effrayez à l'intonation de la musique, et croyrois facilement, que par telle modulation, Ismanias excita Alexandre le'grand estant à table et disnant en repos, à soy lever, et armes prendre. Au tiers tournay fut le Roy auré vainqueur. Durant lesquelles dances, la dame invisiblement se disparut et plus ne la vismes. Bien fusmes menez par les michelots de Geber, et là fusmes inscripts en l'estat par elle ordonné. Puis descendans au port Matrotechne, entrasmes en nos navires, entendans qu'avions vent en pouppe: lequel si refusions sur l'heure, à peine pourroit estre recouvert de trois quartiers brisans.