Comment en l' Isle Sonnante n'est qu'un Papegaut. CHAP. III.

Lors demandasmes à maistre Aeditue veu la multiplication de ces venerables oiseaux en toutes leurs especes, pourquoy la n'estoit qu'un Papegaut. Il nous respondit que telle estoit l'institution premiere, et fatale destinee des estoilles. Que des Clergaux naissent les Prestregaux et Monagaux sans compagnie charnelle, comme fait entre les abeilles d'un jeune toreau accoustré selon l'art et pratique d' Aristaeus. Des Prestregaux naissent les Evesgaux, d'iceux les beaux Cardingaux, et les Cardingaux si par mort n'estoient prevenus finissoient en Papegaut: et n'en

est ordinairement qu'un, comme par les ruches des abeilles n'y a qu'un roy, et au monde n'est qu'un soleil. Iceluy decedé en naist un autre en son lieu de toute la race des Cardingaux, entendez tousjours sans copulation charnelle. De sorte qu'il y a en ceste espece unité individuale, avec perpetuité de succession, ne plus ne moins qu'au Phoenix d' Arabie. Vray est qu'il y a environ de deux mil sept cens soixante lunes, que furent en nature deux Papegaux produits, mais ce fut la plus grande calamité qu'on vit onques en ceste Isle. Car disoit Aeditue tous ces oiseaux icy se pillerent les uns les autres, et s'entreplauderent si bien ce temps durant, que l'Isle periclita d'estre spoliee de ses habitans. Part d'iceux adheroit à un et le soustenoit: part à l'autre, et le defendoit, demeurerent part d'iceux muts comme poissons et onques ne chanterent, et part de ces cloches comme interdicte coup ne sonna. Ce seditieux temps durant à leur secours evoquerent Empereurs, Rois, Ducs, Monarques, Comtes, Barons et communautez du monde qui habite en continent et terre ferme, et n'eut fin ce schisme et ceste sedition qu'un d'iceux ne fut tollu de vie, et la pluralité reduicte en unité.

Puis demandasmes qui mouvoit ces oiseaux à ainsi sans cesse chanter, Aeditue nous respondit que c'estoient les cloches pendantes au dessus de leurs cages. Puis nous dit, voulez vous que presentement je face chanter ses Monagaux que voyez là bardocucullez d'une chausse d'hypocras comme une allouette sauvage, de grace respondismes nous. Lors sonna une cloche six coups seulement, et Monagaux d'accourir, et Monagaux de chanter. Et si, dist Panurge, je sonnoye ceste cloche, feray -je pareillement chanter ceux qui ont le plumage à couleur de haran soret, pareillement respondit Aeditue. Panurge sonna, et soudain accoururent ces oiseaux enfumez et chantoient ensemblement: mais ils avoient les voix rauques et mal plaisantes: Aussi nous remonstra Aeditue qu'ils ne vivoient que de poisson, comme les Herons et Cormorans du monde, et que c'estoit une quinte espece de Cagaux, imprimez nouvellement. Adjousta d'avantage qu'il avoit eu advertissement par Robert valbringue, qui par là n'agueres estoit passé en revenant du pays d' Affrique, que bien tost y devoit avoler une sexte espece lesquels il nommoit Capucingaux, plus tristes, plus maniaques, et plus fascheux

qu'espece qui fust en toute l'Isle. Affrique, dist Pantagruel, est coustumiere tousjours choses produire nouvelles et monstrueuses.