Comment en l'Emblemature estoit figuré le hourt, et l'assaut que donnoit le bon Bacchus contre les Indians. CHAP. XXXIX

Consequemment estoit figuré le hourt, et l'assaut que donnoit le bon Bacchus contre les Indians. Là considerois que Silenus chef de l'avantgarde suoit à grosses gouttes, et son Asne aigrement tourmentoit: l'Asne de mesmes ouvroit la gueule horriblement. s'esmouchoit, desmarchoit, s'escarmouchoit, en façon espouvantable, comme s'il eust un Freslon au cul.

Les Satyres Capitaines, Sergens de bandes, Caps d'Escadre, Corporals, avec cornaboux sonnant les orties furieusement

tournoyoient autour de l'armee à saux de chevres, à bons, à pets, à ruades, et penades, donnans courage aux compagnons de vertueusement combatre tout le monde en figure cryoit Evohe. Les Menades premieres faisoient incursion sur les Indians avec cris horribles, et sons espouvantables de leurs tymbous et boucliers: tout le Ciel en retentissoit, comme designoit l'Emblemature: A fin que plus tant n'admiriez l'art d' Apelles, Aristides Thebain, et autres qui ont painct les tonnerres, esclairs, foudres, vents, paroles, meurs et les esprits.

Consequemment estoit l'ost des Indians comme adverty que Bacchus mettoit leur pays en vastation. En front estoient les Elephans chargez de Tours avec gens de guerre en nombre infiny: mais toute l'armee estoit en routte et contre eux, et sus eux se tournoient et marchoient leurs Elephans, par le tumulte horrible des Bacchides, et la terreur Panique qui leur avoit le sens tollu: Là eussiez veu Silenus son Asne aigrement talonner, et s'escrimer de son baston à la vieille escrime, son Asne voltiger apres les Elephans la gueule bée comme s'il brailloit, et braillant martiallement (en pareille braveté, que jadis esveilla la nymphe Lotis en plains Bacchanales, quant Priapus

plein de Priapisme la vouloit dormant Priapiser sans la prier ) sonnast l'assaut.

Là eussiez veu Pan sauteler avec ses jambes tortes, autour des Menades, avec sa fluste rustique les exciter à vertueusement combatre. Là eussiez aussi veu en apres un jeune Satyre mener prisonniers dixsept Roys: une Bacchide tirer avec ses Serpens quarante et deux Capitaines: un petit Faune porter douze enseignes prinses sur les ennemis et le bon homme Bacchus sur son char se pourmener en seureté parmy le camp, riant, se gaudissant et beuvant d'autant à un chascun. En fin estoit representé en figure Emblematique le trophee de la victoire et triomphe du bon Bacchus.

Son char triomphant estoit tout couvert de Lierre, prins et cueily en la montagne Meros, et ce pour la rarité, laquelle hausse le pris de toutes choses, en Indie expressement d'icelles herbes. En ce depuis l'imita Alexandre le grand en son triomphe Indique, et estoit le char tyré par Elephans joints ensemble. En ce depuis l'imita Pompee le grand à Rome, en son triomphe Aphricain. Dessus estoit le noble Bacchus beuvant en un canthare. En ce depuis l'imita Caius Marius, apres la victoire des

Cymbres, qu'il obtint pres Aix en Provence. Toute son armee estoit couronnee de Lierre: leurs tyrses, boucliers et tymbons en estoient couvers. Il n'estoit l'Asne de Silenus qui n'en fust capparaçonné.

Es costez du char estoient les Roys Indians, prins et liez à grosses chaisnes d'or: toute la brigade marchoit avec pompes divines en joye et liesse indicible, portant infinis trophees, fercules et despouilles des ennemis, en joyeux Epinicies, et petites chansons villatiques et dithyrambes resonnans. Au bout estoit descript le pays d' Egipte avec le Nil et ses Crocodiles, Cercopitheces, Ibides, Singes, Trochiles, Ichneumones, Hipopotames, et autres bestes à luy domestiques. Et Bacchus marchoit en icelle contree à la conduite de deux beufs, sus l'un desquels estoit escript en lettres d'or, Apis, sus l'autre, Osyris, pource qu'en Egipte, avant la venue de Bacchus, n'avoit esté veu beuf ny vache.