Comment le temple estoit esclairé par une Lampe admirable. CHAP. XL.

Avant qu'entrer à l'exposition de la Bouteille, je vous descriray la figure admirable d'une Lampe, moyennant laquelle estoit eslargie lumiere par tout le

temple, tant copieuse, qu'encor qu'il fust subterrain, on y voyoit come en plein midy, nous voyons le Soleil cler et serain, luysant sus terre. Au milieu de la voulte estoit un anneau d'or massif attaché, de la grosseur de plein poing: auquel pendoient de grosseur peu moindre, trois chesnes bien artificiellement faites, lesquelles deux pieds et demy en l'air comprenoient en figure triangle une lame de fin or, ronde, de telle grandeur que le diametre excedoit deux coudees, et demye palme. En icelle estoient quatre boucles ou pertuys: en chascune desquelles estoit fixement retenue une boule vuyde, cavee par le dedans, ouverte du dessus, comme petite Lampe, ayant en circonferance environ deux palmes, et estoient toutes de pierres bien precieuses: L'une d'Amethyste, l'autre de Carboucle Lybien, la tierce d'Opalle, la quarte d'Anthracite. Chascune estoit plaine d'eau ardente, cinq fois distilee par Alambic serpentin, inconsomptible comme l'huille que jadis mist Callimachus en la lampe d'or de Pallas en l' Acropolis d' Athenes, avec un ardent lychnion faict part de lin Asbestin, comme estoit jadis au temple de Jupitertemple de JupiterJupiter en Ammonie, et leut Cleombrotus philosophe trestudieux, par de lin Carpasien, lesquels par feu plustost sont renouvellez que consommez.

Au dessouz d'icelle lame, environ deux pieds et demy, les trois chesnes en leurs figures premieres estoient embouclees en trois anses, lesquelles issoient d'une grande lampe ronde de Cristalin trespur, ayans en diametre une coudee et demye: laquelle au dessus estoit ouverte environ deux palmes, par ceste ouverture estoit au milieu posé un vaisseau de cristalin, pareil en forme de coucourde, ou comme à un urinal: et descendoit jusques au fonds de la grande lampe, avec telle quantité de la susdicte eau ardente, que la flamme du lin abestin estoit droictement au centre de la grande lampe. Par ce moyen sembloit donc tout le corps spherique d'icelle ardre, et enflamboyé: par ce que le feu estoit au centre et poinct moyen.

Et estoit difficile d'y asseoir ferme et constant regard, comme on ne peut au corps du Soleil, estant la matiere de merveilleuse perspicuité, et l'ouvrage tant diaphane et subtil, par la flection des diverses couleurs, qui sont naturelles és pierres precieuses des quatres petites lampes superieures, à la grand inferieure, et d'icelle quatre estoit la resplandeur en tous points inconstante

et vacillante par le temple. Venant d'avantage icelle vague lumiere toucher, sur la pollissure du marbre, duquel estoit incrusté tout le dedans du temple, apparoissoient telles couleurs, que voyons en l'arc celeste, quant le clair Soleil touche les nues pluvieuses.

L'invention estoit admirable, mais encores plus admirable, ce me sembloit, que le sculpteur avoit autour de la corpulance d'icelle lampe cristaline engravee, à ouvrage cataglyphe une prompte et gaillarde bataille de petis enfans nuds, montez sus des petis chevaux de bois, avec lances de virolets, et pavois faits subtilement de grappes de raisins, entrelassez de pampre, avec gestes et effors pueriles, tant ingenieusement par art exprimez, que nature mieux ne le pourroit. Et ne sembloient engravez dedans la matiere, mais en bosse, ou pour le moins en crotesque apparoissoient enlevez totalement, moyennant la diverse et plaisante lumiere, laquelle dedans contenue ressortissoit par la sculpture.