Comment au pays de Satin nous veismes Ouy dire, tenant escole de tesmoignerie, CHAP. XXX.

Passans quelque peu avant en ce pays de tapisserie, vismes la mer mediterranee, ouverte et descouverte jusques aux abismes, tout ainsi comme au gouffre Arabic se descovrit la mer Erithree, pour faire chemin aux Juifs issans d' Egypte. Là je recongnu Triton sonnant de sa grosse conche, Glaucus, Proteus, Nereus, et mille autres dieux et monstres marins. Vismes aussi nombre infiny de poissons en especes diverses, dansans, volans, voltigeans, combatans, mangeans, respirans, belutans, chassans, dressans escarmouches, faisans embuscades, composans trefves, marchandans, jurans, s'esbatans. En un coing la pres vismes Aristoteles tenant une lanterne, en semblable contenance que l'on peint l'hermite pres sainct Christofle, espiant, considerant, le tout redigeant par escrit. Derriere luy estoient, comme records de sergents, plusieurs autres Philosophes, Appianus, Heliodorus, Atheneus, Porphirius, Pancrates Archadian, Numenius, Possidonius, Ovidius, Oppianus, Olympius, Seleucus, Leonides, Agathocles, Theophraste, Damostrate, Mutianus, Nymphodorus, Elianus, cinq cens autres gens, aussi de loisir comme fut Chrysippus, ou Aristharcus

de Sole, lequel demeura cinquante huit ans à contempler l'estat des abeilles, sans autre chose faire. Entre iceux j'y advisay Pierre Gylles lequel tenoit un urinal en main, considerant en profonde contemplation l'urine de ces beaux poissons. Avoir longuement consideré ce pays de Satin, dist Pantagruel, J'ay icy longuement repeu mes yeux, mais je ne m'en peux en rien saouler, mon estomach brait de male rage de faim, repaissons, repaissons, di-je, et tastons de ces anacampserotes qui pendent la dessus, Fy, ce n'est rien qui vaille. Je donques prins quelques mirobalans qui pendoient à un bout de tapisserie: mais je ne les peu mascher n'avaller, et les goustans eussiez proprement dict et juré que fust soye retorsse, et n'avoient saveur aucune. On penseroit qu' Heliogabalus là eust prins comme transsump de bulle, forme de festoyer ceux qu'il avoit long temps fait jusner, leur promettant en fin, banquet somptueux, abondant, Imperial, puis les paissoit de viandes en cire, en marbre, en potterie, en peintures et nappes figurees. Cerchans donques par ledit pays si viandes aucunes trouverions, entendismes un bruit strident et divers, comme si fussent femmes lavant la buee, ou traquets de moulins du bazacle lez Tolose, sans plus sejourner nous transportasmes au lieu ou c'estoit, et vismes un petit vieillard, bossu, contrefait et monstrueux, on le nommoit Ouy-dire, il avoit la gueule fendue jusques aux aureilles, et dedans la gueule sept langues, et la langue fendue en sept parties, quoy que ce fust, de toutes sept ensemblement parloit divers propos et langages divers, avoit aussi parmy la teste et le reste du corps autant d'aureilles comme jadis eut Argus d'yeux, au reste estoit aveugle et paralitique des jambes, au tour de luy je vy nombre innumerable d'hommes et de femmes escoutans et attentifs, et en recongnu aucuns parmy la trouppe faisans bon minois, d'entre lesquels un pour lors tenoit une Mappemonde, et la leur exposoit sommairement par petites aphorismes, et y devenoient clercs et scavans en peu d'heure, et parloient de prou de choses prodigieuses elegantement, et par bonne memoire pour la centiesme partie desquelles scavoir ne suffiroit la vie de l'homme, des Pyramides, du Nil, de Babylone, des Troglodites, des Hymatopodes, des Blemmies, des Pygmees, des Canibales, des monts Hyperborees, des Egipanes, de tous les diables, et tout par Ouy- dire. Là je vy selon mon advis, Herodote, Pline, Solin, Berose, Philostrate, Mela, Strabo, et tant d'autres antiques, plus Albert le Jacobin grand, Pierre Tesmoin, Pape Pie second, Volateran, Paulo Jovio le vaillant homme, Jaques Cartier, Charton Armenian, Marc Paule Venitien, Ludovic Romain, Pietre Aliares, et ne scay combien d'autres modernes historiens cachez derriere une piece de tapisserie en tapinois escrivans de belles besongnes, et tout par Ouy-dire.

Derriere une piece de velours figuré à fueille de menthe, pres d' Ouy-dire, je vy nombre grand de Percherons et Mançeaux bons estudians, jeunes assez: et demandans en qu'elle faculté ils appliquoient leur estude, entendismes que la de jeunesse ils apprenoient estre tesmoins, et en cestuy art proufitoient si bien, que partans du lieu, et retournez en leur province, vivoient honnestement du mestier de tesmoignerie: rendans seur tesmoignage de toutes choses à ceux, qui plus donneroient par journee, et tout par ouy-dire. Dictes-en ce que voudrez, mais ils nous donnerent de leur chanteaux, et beusmes à leurs barils, à bonne chere. Puis nous advertirent cordialement, qu'eussions à espargner verité, tant que possible nous seroit, si voulions parvenir

en Court de grans Seigneurs.