De ce qu'est signifié par les couleurs blanc et bleu. Chapitre. x.

Le blanc doncques signifie joye, soulas, et liesse: et non a tort le signifie, mais a bon droict et juste tiltre. Ce que pourrez verifier si arriere mises voz affections voulez entendre ce que presentement vous exposeray.

Aristoteles dict que supposent deux choses contraires en leur espece: comme bien et mal: vertu et vice: froid et chauld: blanc et noir: volupte et doleur: joye et dueil, et ainsi de aultres si vous les coublez en telle facon, q'un contraire d'une espece convienne raisonnablement a l'un contraire d'une aultre, il est consequent,

que l'autre contraire compete avecques l'au tre residu. Exemple. Vertus et Vice sont contraires en une espece, aussy sont Bien et Mal. Si l'un des contraires de la premiere espece convient a l'un de la seconde comme vertus et bien: car il est sceut: que vertus est bonne, ainsi feront les deux residuz, qui sont mal et vice, car vice est maulvais.

Ceste reigle logicale entendue, prenez ces deux contraires, joye et tristesse: puis ces deux, blanc et noir. Car ilz sont contraires physicalement. Si ainsi doncques est que noir signifie dueil, a bon droict blanc signifiera joye.

Et n'est ceste signifiance par imposition humaine institué, mais receue par consentement de tout le monde, que les philosophes nomment jus gentium, droict universel valable par toutes contrees.

Comme assez scavez, que tous peuples, toutes nations (je excepte les antiques Syracusans et quelques Argives: qui avoient l'ame de travers) toutes langues

voulens exteriorement demonstrer leur tristesse portent habit de noir: et tout dueil est faict par noir. Lequel consentement universel n'est faict que nature n'en donne quelque argument et raison: laquelle un chascun peut soubdain par soy comprendre sans aultrement estre instruict de personne, laquelle nous appellons droict naturel.

Par le blanc a mesmes induction de nature tout le monde a entendu joye, liesse, soulas, plaisir, et delectation.

Au temps passe les Thraces et Cretes. signoient les jours bien fortunez et joyeux, de pierres blanches: les tristes et defortunez, de noires.

La nuyct n'est elle funeste, triste, et melancholieuse? Elle est noire et obscure par privation. La clarte n'esjouit elle toute nature? Elle est blanche plus que chose que soit. a quoy prouver je vous pour rois renvoyer au livre de Laurens Valle contre Bartole, mais le tesmoignage evangelicque vous contentera. Mathieu.

xvij. est dict que a la transfiguration de nostre seigneur: vestimenta ejus facta sunt alba sicut lux , ses vestements feurent faictz blancs comme la lumiere. Par laquelle blancheur lumineuse donnoit entendre a ses troys apostres l'idee et figure des joyes eternelles. Car par la clarte sont tous humains esjouiz. Comme vous avez le dict d'une vieille que n'avoit dens en gueulle, encores disoit elle Bona lux . Et Thobie, cap. v. quand il eut perdu la veue, lors que Raphael le salua, respondit. Quelle joye pourray je avoir qui poinct ne voy la lumiere du ciel? En telle couleur tesmoignerent les Anges la joye de tout l'univers a la resurrection du saulveur, Joan. xx. et a son ascension, Act. j. De semblable parure veit sainct Jean evangeliste Apocal. iiij. et. vij. les fideles vestuz en la celeste et beatifiee Hierusalem.

Lisez les histoires antiques tant Grecques que Romaines, vous trouverez que la ville de Albe (premier patron de Rome)

feut et construicte et appellee a l'invention d'une truye blanche.

Vous trouverez que si a aulcun apres avoir eu des ennemis victoire, estoit decreté qu'il entrast a Rome en estat triumphant, il y entroit sur un char tiré par chevaulx blancs. Autant celluy qui y entroit en ovation. Car par signe ny couleur ne pouvoyent plus certainement exprimer la joye de leur venue, que par la blancheur.

Vous trouverez que Pericles duc des Atheniens voulut celle part de ses gensdarmes esquelz par sort estoient advenus les febves blanches, passer toute la journee en joye, solas, et repos: cependent que ceulx de l'aultre part batailleroient. Mille aultres exemples et lieux a ce propos vous pourrois je exposer, mais ce n'est icy le lieu.

Moyennant laquelle intelligence povez resouldre un probleme, lequel Alexandre Aphrodise a repute insolube. Pourquoy le Leon, qui de son seul cry et rugis

sement espovante tous animaulx, seulement crainct et revere le coq blanc? Car (ainsi que dict Proclus lib. de sacrificio et magia) c'est par ce que la presence de la vertus du Soleil, qui est l'organe et promptuaire de toute lumiere terrestre et syderale, plus est symbolisante et competente au coq blanc: tant pour icelle couleur que pour sa propriete et ordre specificque que au Leon. Plus dict, que en forme Leonine ont este diables souvent veuz, lesquelz a la presence d'un coq blanc soubdainement sont disparuz.

Ce est la cause pourquoy. (ce sont les Francoys ainsi appellez par ce que blancs sont naturellement comme laict, que les Grecz nomme gala) voluntiers portent plumes blanches sus leurs bonnetz. Car par nature, ilz sont joyeux, candides, gratieux et bien amez: et pour leur symbole et enseigne ont la fleur plus que nulle aultre blanche, c'est le lys.

Si demandez comment par couleur blanche nature nous induict entendre

joye et liesse: je vous responds, que l'analogie et conformite est telle. Car comme le blanc exteriorement disgrege et espart la veue, dissolvent manifestement les esperitz visifz, selon l'opinion de Aristoteles en ses problemes, et des perspectifz, et le voyez par experience: quand vous passez les montz couvers de neige: en sorte que vous plaignez de ne pouvoir bien reguarder, ainsi que Xenophon escript estre advenu a ses gens: et comme Galen expose amplement lib. x. de usu partium: tout ainsi le cueur par joye excellente est interiorement espart et patist manifeste resolution des esperitz vitaulx Laquelle tant peut estre acreue; que le cueur demoureroit spolie de son entretien, et par consequent seroit la vie estaincte, par ceste perichairie comme dict Galen lib. xij. Metho. li. v. de locis affectis et li. ij. de symptomaton causis Et comme estre au temps passe advenu tesmoignent Marc Tulle li. j. questio. Tuscul. Verrius, Aristoteles, Tite Live, apres la bataille de Cannes, Pline lib. vij. c. xxxij. et liij. Aulus Gellius li. iij. xv. et aultres. a Diagoras Rodien, Chilo, Sophocles, Diony, tyrant de Sicile, Philippides, Philemon, Polycrata, Philistion, Marcus Juventius, et aultres qui moururent de joye. Et comme dict Avicenne in. ij. canone, et lib. de viribus cordis, du zaphran, lequel tant esjouist le cueur qu'il le despouille de vie si on en prend en dose excessifve, par resolution et dilatation superflue, Icy voyez Alexandre Aphrodisien lib. primo problematum c. xix. Et pour cause. Mais quoy j'entre plus avant en ceste matiere, que ne establissois au commencement, icy doncques calleray mes voilles remettant le reste au livre en ce consomme du tout. Et diray en un mot que le bleu signifie certainement le ciel et choses celestes, par mesmes symboles que le blanc signifioit joye et plaisir.