De la nativite du tresredoubte Pantagruel. Chap. ij.

Gargantua en son eage de quatre cens quatre vingtz quarante et quatre ans engendra son filz

Pantagruel de sa femme nommee Badebec, fille du Roy des Amaurotes en Utopie laquelle mourut du mal d'enfant, car il estoit si merveilleusement grand et si lourd, qu'il ne peut venir a lumiere, sans ainsi suffocquer sa mere. Mais pour entendre pleinement la cause et raison de son nom qui luy feut baille en baptesme.Vous noterez qu'en icelle annee feut seicheresse tant grande en tout le pays de Africque, que passerent . xxxvj. moys, troys sepmaines quatre jours, treze heures, et quelque peu d'advantaige sans pluye, avec chaleur de soleil si vehemente que toute la terre en estoit aride. Et ne fut au temps de Helye, plus eschauffee que fut pour lors.Car il n'estoit arbre sus terre qui eust ny fueille ny fleur, les herbes estoient sans verdure, les rivieres taries, les fontaines a sec, les pauvres poissons delaissez de leurs propres elemens, vagans et crians par la terre horriblement, les oyseaux tumbans de l'air par faulte de rosee, les loups, les regnars, cerfz, sangliers, dains, lievres, connifz, belettes, foynes, blereaux, et aultres bestes l'on trouvoit par les champs mortes la gueulle baye.Au regard des hommes, c'estoit la grande pitie, vous les eussiez veuz tirans la langue comme levriers qui ont couru six heures. Plusieurs se gettoyent dedans les puys. Aultres se mettoyent au ventre d'une vache pour estre a l'hombre: et les appelle Homere Alibantes.Toute la contree estoit a l'ancre, c'estoit pitoyable cas, de veoir le travail des humains pour se garentir de ceste horrificque alteration. Car il avoit prou affaire de sauver l'eaue benoiste par les eglises: a ce que ne feust desconfite, mais l'on y donna tel ordre par le conseil de messieurs les Cardinaulx et du sainct pere, que nul n'en osoit prendre que une venue. Encores quand quelcun entroit en l'eglise, vous en eussiez veu a vingtaines de pauvres alterez qui venoyent au derriere de celluy qui la distribuoit a quelcun, la gueulle ouverte pour en avoir quelque goutellete, comme le maulvais Riche affin que rien ne se perdist.O que bien heureux fut en icelle annee celluy qui eut cave fresche et bien garnie.Le philosophe raconte en mouvent la question. Parquoy c'est, que l'eaue de la mer est salee? que au temps que Phebus bailla le gouvernement de son chariot lucificque a son filz Phaeton, ledict Phaeton mal apris en l'art, et ne scavant ensuyvre la line ecliptique entre les deux tropiques de la sphere du Soleil, varia de son chemin, et tant approcha de terre, qu'il mist a sec toutes les contrees subjacentes, bruslant une grande partie du ciel, que les philosophes appellent via lactea: et les Lifrelofres, nomment le chemin sainct Jacqueschemin sainct Jacquessainct Jacques. Combien que les plus Huppez poetes disent estre la part ou tomba le laict de Juno, lors qu'elle allaicta Hercules. Adoncques la terre fut tant eschaufee, que il luy vint une sueur enorme, dont elle sua toute la mer, qui par ce est salee: car toute sueur est salee: ce que vous direz estre vray si voulez taster de la vostre propre ou bien de celles des verollez quand on les faict suer, ce me est tout un.Quasi pareil cas arriva en ceste dicte annee, car un jour de vendredy que tout le monde s'estoit mis en devotion, et faisoit une belle procession avecques forces letanies et beaux preschans, supplians, a dieu omnipotent les vouloir regarder de son oeil de clemence en tel desconfort, visiblement furent veues de terre sortir grosses gouttes deaue comme quand quelque personne sue copieusement. Et le pauvre peuple commenca a s'esjouyr comme si ce eust este chose a eulx proffitable, car les aulcuns disoient que de humeur il n'y en avoit goute en l'air, dont on esperast avoir pluye, et que la tere supplioit au deffault. Les aultres gens scavans disoyent que c'estoit pluye des Antipodes : comme Senecque narre au quart livre questionum naturalium, parlant de l'origine et source du Nil, mais ilz y furent trompes, car la procession finie alors que chascun vouloit recueillir de ceste rosee et en boire a plein godet, trouverent que ce n'estoit que saulmure pire et plus salee que n'estoit l'eaue de la mer.Et par ce que en ce propre jour nasquit Pantagruel, son pere luy imposa tel nom. Car Panta en Grec vault autant a dire comme tout, et Gruel en langue Hagarene vault autant comme alteré, voulent inferer, que a l'heure de sa nativite le monde estoit tout altere. Et voyant en esperit de prophetie qu'il seroit quelque jour dominateur des alterez, Ce que luy fut monstre a celle heure mesmes par aultre signe plus evident.Car alors que sa mere Badebec l'enfantoit, et que les sages femmes attendoyent pour le recepvoir, yssirent premier de son ventre soixante et huyt tregeniers chascun tirant par le licol un mulet tout charge de sel, apres lesquelz sortirent neuf dromadaires charges de jambons et langues de beuf fumees, sept chameaulx chargez d'anguillettes, puis.xxv. charretees de porreaulx, d'aulx, d'oignons, et de cibotz ce que espoventa bien lesdictes saiges femmes, mais les aulcunes d'entre elles disoyent. Voicy bonne provision aussy bien ne bevyons nous que lachement non en lancement, cecy n'est que bon signe, ce sont aguillons de vin.Et comme elles caquetoyent de ces menus propos entre elles, voicy sorty Pantagruel, tout velu comme un Ours, dont dict une d'elles en esperit propheticque. Il est né a tout le poil, il fera choses merveilleuses, et s'il vit il aura de l'eage.