Comment Thaumaste racompte les vertuz et scavoirs de Panurge Chapitre. xx.

Adoncques se leva Thaumaste et ostant son bonnet de la teste, remercia ledict Panurge doulcement. Puis dist a haulte voix a toute l'assistance.Seigneurs a ceste heure puis je bien dire le mot evangelicque. Et ecce plusquam Salomon hic . Vous avez icy un thesor incomparable en vostre presence, c'est monsieur Pantagruel, duquel la renommee me avoit icy attire du fin fond de Angleterre, pour conferer avecques luy des problemes insolubles tant de Magie, Alchymie, de Caballe, de Geomantie, de Astrologie, que de Philosophie: lesquelz je avoys en mon esprit. Mais de present je me courrouce contre la renommee, laquelle me semble estre envieuse contre luy, car elle n'en raporte la miliesme partie, de ce que en est par efficace. Vous avez veu, comment son seul disciple me acontente

et m'en a plus dict que n'en demandoys, dabundand m'a ouvert et ensemble solu d'aultres doubtes inestimables. En quoy je vous puisse asseurer qu'il m'a ouvert le vrays puys et abisme, de Encyclopedie, voire en une sorte que je ne pensoys trouver homme qui en sceust les premiers elemens seulement, c'est quand nous avons disputé par signes sans dire mot ny demy. Mais a tant je redigeray par escript ce que avons dict et resolu, affin que l'on ne pense que ce ayent este mocqueries, et le feray imprimer a ce que chascun y apreigne comme je ay faict. Dont povez juger, ce que eust peu dire le maistre, veu que le disciple a faict telle prouesse: car Non est discipulus super magistrum . En tous cas Dieu soit loué, et bien humblement vous remercie de l'honneur que nous avez faict a cest acte, Dieu vous le retribue eternellement.Semblables actions de graces rendit Pantagruel a toute l'assistance, et de la partant mena disner Thaumaste avecques luy, et croyez qu'ilz beurent a ventre deboutonné (car en ce temps la on fermoit les ventres a boutons, comme les colletz de present). jusques a dire, dont venez vous? Saincte dame comment ilz tiroyent au chevrotin, et flaccons d'aller, et eulx de corner, tyre, baille, paige, vin, boutte de par le diable. boutte, il n'y eut celluy qui ne beust vingt et cinq ou trente muys. Et scavez comment, sicut terra sine aqua , car il faisoit chault, et dadvantaige se estoyent alterez.Au regard de l'exposition des propositions mises par Thaumaste, et significations des signes desquelz ils userent en disputant je vous les exposeroys selon la relation d'entre eulx mesmes: mais l'on m'a dict que Thaumaste en feist un grand livre imprimé a Londres, auquel il declaire tout sans rien laisser: par ce je m'en deporte pour le present.