Comment Pantagruel feut malade, et la facon comment il guerit. Chapitre. xxxiij.

Eu de temps apres le bon Pantagruel tomba malade, et feut tant prins de l'estomach qu'il ne pouvoit boire ny manger, et par ce q'un malheur ne vient jamais seul, luy print une pisse chaulde qui le tormenta plus que ne penseriez: mais ses medicins le secoururent et tresbien avecques force de drogues lenitives et diureticques le feirent pisser son malheur. Son urine tant estoit chaulde que despuis ce temps

la elle n'est encores refroydie, Et en avez en France en divers lieulx selon quelle print son cours: et l'on l'appelle les bains chaulx, comme a Coderetz, a Limons,a Dast, a Balleruc, a Neric, a Bourbonnensy : et ailleurs, En Italie, a Mons grot, a Appone, a Sancto Petro de PaduaSancto Petro de PaduaPadua, a Saincte Helene, a Casa nova, a Sancto Bartholomeo, En la conté de Bouloigne, a la Porrette, et mille aultres lieux. Et m'esbahis grandement d'un tas de folz philosophes et medicis, qui perdent temps a disputer dont vient la chaleur de cesdictes eaulx, ou si c'est a cause du Baurach, ou du Soulphre, ou de l'Allun, ou de Salpetre qui est dedans la minere: car ilz ne y font que ravasser, et mieulx leur vauldroit se aller froter le cul au panicault que de perdre ainsi le temps a disputer de ce dont ilz ne scavent l'origine. Car la resolution est aysee et n'en fault enquester davantaige, que lesdictz bains sont chaulx par ce que ilz sont yssus par une chaulde pisse du bon Pantagruel. Or pour vous dire comment il guerist de son mal principal je laisse icy comment pour une minorative il print Quatre quintaulx de Scammonée Colophoniacque. Six vingtz et dixhuyt charretees de Casse. Unze mille neuf cens livres de Reubarbe, sans les aultres barbouillemens. Il vous fault entendre que par le conseil des medicins feut decrete qu'on osteroit ce que luy faisoit le mal a l'estomach, Pour ce l'on fist xvii. grosses pommes de cuyvre plus grosses que celle qui est a Romme a l'aguille de Virgile, en telle facon qu'on les ouvroit par le mylieu et fermoit a un ressort.En l'une entra un de ses gens portant une lanterne et un flambeau allumé. Et ainsi l'avalla Pantagruel comme une petite pillule. En cinq aultres entrerent troys payzans chascun ayant une pasle a son col. En sept aultres entrerent sept porteurs de coustretz chascun ayant une cor beille a son col Et ainsi furent avallees comme pillules.Quand furent en l'estomach, chascun deffit son ressort et sortirent de leurs cabanes, et premier celluy qui portoit la lanterne, et ainsi cheurent plus de demye lieue en un goulphre horrible, puant, et infect plus que Mephitis, ny la palus Camarine, ny le punays lac de Sorbonelac de SorboneSorbone, duquel escript Strabo. Et n'eust este qu'ilz estoient tresbien antidotez le cueur, l'estomach, et le pot au vin (lequel on nomme la caboche) ilz feussent suffocquez et estainctz de ces vapeurs abhominables.O quel parfum, O quel vaporament, pour embrener touretz de néz a jeunes gualoyses. Apres en tactonnant et fleuretant aprocherent de la matiere fecale et des humeurs corrumpues. Finablement trouverent une montjoye d'ordure, lors les pionniers frapperent sus pour la desrocher et les aultres avecques leurs pasles en emplirent les corbeilles: et quand tout fut bien nettoyé, chascun se retira en sa pomme.Ce faict Pantagruel se parforce de rendre sa gorge, et facillement les mist dehors, et ne mon stroyent en sa gorge en plus q'un pet en la vostre, et la sortirent hors de leur pillules joyeusement.Il me souvenoit quand les Gregeoys sortirent du cheval en Troye. Et par ce moyen fut guery et reduict a sa premiere convalescence. Et de ces pillules darin en avez une a Orleans sus le clochier de l'esglise de saincte Croix.