Page [107v]

Comment Rondibilis medicin donne remede a Coquage. Chapitre XXXIII.

On temps (dist Rondibilis) que Juppiter feist l’estat de sa maison Olympicque, et le calendrier de tous ses Dieux et Déesses: ayant estably a un chascun, jour et saison de sa feste: assigné lieu pour les oracles et voyages: ordonné de leurs sacrifices: Feist il poinct (demanda Panurge) comme Tinteville evesque d’ Auxerre ? Le noble Pontife aymoit le bon vin, comme faict tout home de bien. pourtant avoit il en soing et cure speciale le bourgeon pere ayeul de Bacchus. Or est que plusieurs années il veid lamentablement le bourgeon perdu par les gelées, bruines, frimatz, verglatz. froidures, gresles et calamitez advenues par les festes des George, Marc, Vital, Eutrope, Philippe, saincte Croix, l’Ascension, et aultres, qui sont on temps que le Soleil passe

Page 108
soubs le signe de Taurus. Et entra en ceste opinion, que les sainctz susdictz estoient saincts gresleurs, geleurs, et guasteurs du bourgeon. Pourtant vouloit il leurs festes translater en hyver, entre Noël et l’Epiphanie: les licentiant en tout honneur et reverence, de gresler lors, et geler tant qu’ilz vouldroient. La gelée lors en rien ne seroit dommageable, ains evidentement profitable au bourgeon. En leurs lieux mettre les festes des sainct Christophle, sainct Jan decollaz, saincte Magdalene, saincte Anne, sainct Dominicque, sainct Laurens, voire la Myoust colloquer en May. Es quelles tant s’en fault qu’on soit en dangier de gelée, que lors mestier on monde n’est, qui tant soit de requeste: comme est des faiseurs de friscades, composeurs de joncades, agenseurs de feueillades, et refraischisseurs de vin.

Juppiter (dist Rondibilis) oublia le paouvre Diable Coqüage, lequel pour lors ne feut praesent: il estoit a Paris on Palais sollicitant quelque paillard procés pour quelqu’un de ses tenanciers et vassaulx. Ne sçay quants jours apres, Coqüage entendit la forbe qu’on luy avoit faict:

Page [108v]
desista de sa sollicitation par nouvelle sollicitude de n’estre forclus de l’estat: et comparut en persone davant le grand Juppiter, alleguant ses merites praecedens, et les bons et agreables services que aultres foys luy avoit faict, et instantement requerant qu’il ne le laissast sans feste, sans sacrifices, sans honneur. Juppiter se excusoit remonstrant, que tous ses benefices estoient distribuez, et que son estat estoit clous. Feut toutesfoys tant importuné par messer Coqüage, que en fin le mit en l’estat et catalogue, et luy ordonna en terre honneur, sacrifices et feste. Sa feste feut, pource que lieu vuide et vacant n’estoit en tout le calendrier, en concurrence et au jour de la Déesse Jalousie : sa domination, sus les gens mariez, notamment ceulx qui auroient belles femmes: ses sacrifices, soubson, defiance, malengroin, guet, recherche, et espies des mariz sus leurs femmes. Avecques commendement riguoureux a un chascun marié, de le reverer et honorer, celebrer sa feste a double: et luy faire les sacrifices susdictz. Sus peine et intermination, que a ceulx ne seroit messer Coqüage en faveur,
Page 109
ayde, ne secours, qui ne l’honoreroient comme est dict: jamais ne tiendroit de eulx compte: jamais n’entreroit en leurs maisons: jamais ne hanteroit leurs compaignies: quelques invocations qu’ilz luy feissent: ains les laisseroit eternellement pourrir seulz avecques leurs femmes sans corrival aulcun: et les refuyroit sempiternellement comme gens Haereticques et sacrileges. Ainsi qu’est l’usance des aultres Dieux, envers ceulx qui deuement ne les honorent: de Bacchus, envers les vignerons: de Ceres, envers les laboureux: de Pomona, envers les fruictiers: de Neptune, envers les nautonniers: de Vulcan, envers les forgerons: et ainsi des aultres. Adjoincte feut promesse au contraire infallible, qu’a ceulx, qui (comme est dict) chommeroient sa feste, cesseroient de toute negociation, mettroient leurs affaires propres en non chaloir pour espier leurs femmes, les reserrer et mal traicter par Jalousie, ainsi que porte l’ordonnance de ses sacrifices, il seroit continuellement favorables: les aymeroit, les frequenteroit, seroit jour et nuyct en leurs maisons: jamais ne seroient destituez de sa praesence?
Page [109v]
J’ay dict.

Ha, ha, ha, (dist Carpalim en riant). Voyla un remede encores plus naïf que l’anneau de Hans Carüel. Le Diable m’emport, si je ne le croy. Le naturel des femmes est tel. Comme la fouldre ne brise et ne brusle, sinon les matieres dures, solides, resistentes: elle ne se arreste es choses molles, vuides, et cedentes: elle bruslera l’espée d’assier, sans endommaiger le fourreau de velours: elle consumera les os des corps sans entommer la chair qui les couvre: ainsi ne bendent les femmes jamais la contention, subtilité, et contradiction de leurs espritz, si non envers ce que congnoistront leurs estre prohibé et defendu. Certes (dist Hippothadée) aulcuns de nos docteurs disent, que la premiere femme du monde, que les Hebrieux nomment Eve, a poine eust jamais entré en tentation de manger le fruict de tout sçavoir, s’il ne luy eust esté defendu. Qu’ainsi soit, consyderez comment le Tentateur cauteleux luy remembra on premier mot la defense sus ce faicte, comme voulent inferer: il t’est defendu, tu en doibs doncques manger: ou tu ne serois pas femme.

Real    Hypothetical    Fictional    Mythical   
Region, area    Town, village    Building    Water (lakes, rivers, etc.)    mountains, islands, ...    Other