Comment Pantagruel raconte une estrange histoire des perplexitez du jugement humain. Chapitre XLIIII.

Comme feut (dist Pantagruel) la controverse debatue davant Cn. Dolabella proconsul en Asie. Le cas est tel. Une femme en Smyrne de son premier mary eut un enfant nommé Abecé. Le mary defunct, apres certain temps elle se remaria: et de son second mary eut un filz nomme Effege. Advint (comme vous sçavez que rare est l’affection des peratres, vitrices, noverces, et meratres envers les enfans des defuncts premiers peres et meres) que cestuy mary et son filz occultement, en trahison, de guet a pens, tuerent Abecé. La femme entendent la trahison et meschanceté ne voulut le forfaict

Page 136
rester impuny: et les feist mourir tous deux, vengeante la mort de son filz premier. Elle feut par la justice apprehendée et menée davant Cn. Dolabella. En sa praesence elle confessa le cas, sans rien dissimuler, seulement alleguoit que de droict et par raison elle les avoit occis. C’estoit l’estat du procés. Il trouva l’affaire tant ambigu, qu’il ne sçavoit en quelle partie incliner. Le crime de la femme estoit grand, laquelle avoit occis ses mary second et enfant. Mais la cause du meurtre luy sembloit tant naturelle, et comme fondée en droict des peuples, veu qu’ilz avoient tué son filz premier, eulx ensemble, en trahison, de guet a pens, non par luy oultragez ne injuriez, seulement par avarice de occuper le total heritage: que pour la decision il envoya es Areopagites en Athenes, entendre quel seroit sur ce leur advis et jugement. Les Areopagites feirent response, que cent ans apres personellement on leurs envoiast les parties contendentes, affin de respondre a certains interroguatoires, qui n’estoient on procés verbal contenuz. C’estoit a dire, que tant grande leurs sembloit la perplexité
Page [136v]
et obscurité de la matiere, qu’ilz ne sçavoient qu’en dire ne juger. Qui eust decidé le cas au sort des dez, il n’eust erré, advint ce que pourroit. Si contre la femme, elle meritoit punition, veu qu’elle avoit faict la vengence de soy, laquelle apartenoit a Justice: Si pour la femme, elle sembloit avoir eu cause de douleur atroce. Mais en Bridoye la continuation de tant d’années me estonne.

Je ne sçaurois (respondit Epistemon) a vostre demande categoricquement respondre. Force est que le confesse. Conjecturallement je refererois cestuy heur de jugement en l’aspect benevole des cieulx, et faveur des Intelligences motrices. Les quelles en contemplation de la simplicité et affection syncere du juge Bridoye : qui soy deffiant de son sçavoir et capacité: congnoissant les antinomies et contrarietez des loix, des edictz, des coustumes et ordonnances: entendent la fraulde du Calumniateur infernal, lequel souvent se transfigure en messagier de lumiere, par ses ministres les pervers advocatz, Conseilliers, Procureurs, et aultres telz suppoz, tourne le noir en blanc, faict phantasticquement

Page 137
sembler a l’une et l’aultre partie, quelle a bon droict, comme vous sçavez qu’il n’est si maulvaise cause, qui ne trouve son advocat, sans cela jamais ne seroit procés on monde: se recommenderoit humblement a Dieu le juste juge: invocqueroit a son ayde la grace celeste: se deporteroit en l’esprit sacrosainct, du hazard et perplexité de sentence definitive: et par ce sort exploreroit son decret et bon plaisir, que nous appellons Arrest: remueroient et tourneroient les dez pour tomber en chanse de celluy qui muny de juste complaincte requeroit son bon droict estre par Justice maintenu. Comme disent les Talmudistes, en sort n’estre mal aulcun contenu: seulement par sort estre en anxieté et doubte des humains manifestée la volunté divine.

Je ne vouldrois penser ne dire, aussi certes ne croy je, tant anomale estre l’iniquité, et corruptele tant evidente de ceulx qui de droict respondent en icelluy parlement Myrelinguois en Myrelingues, que pirement ne seroit un procés decidé par ject des dez, advint ce que pourroit, qu’il est passant par leurs mains pleines de sang

Page [137v]
et de perverse affection. Attendu mesmement, que tout leur directoire en judicature usuale a esté baillé par un Tribunian home mescreant, infidele, barbare, tant maling, tant pervers, tant avare et inique, qu’il vendoit les loix, les edictz, les rescriptz, les constitutions et ordonnances en purs deniers, a la partie plus offrante. Et ainsi leurs a taillé leurs morseaulx par ces petitz boutz et eschantillons des loix qu’ilz ont en usaige: la reste supprimant et abolissant qui faisoit pour la loy totale: de paour que la loy entiere restante et les livres des antiques Jurisconsultes veuz sus l’exposition des douze tables, et edictz des Praeteurs, feust du monde apertement sa meschanceté congneue. Pourtant seroit ce souvent meilleur (c’est a dire moins de mal en adviendroit) es parties controverses, marcher sus chausses trapes, que de son droict soy deporter en leurs responses et jugemens: Comme soubhaitoit Caton de son temps, et conseilloit que la court judiciaire feust de chausses trappes pavée.

Real    Hypothetical    Fictional    Mythical   
Region, area    Town, village    Building    Water (lakes, rivers, etc.)    mountains, islands, ...    Other