Comment par Grippeminault fut proposé un Enygme.

Quand fusmes assis, Grippeminault au millieu de ses chatzfourrez nous dist, en parolle furieuse et enrouee: Or sa, or sa, or sa a boyre a boyre, a boyre sa, disoit Panurge entre les dents: Une bien jeune et toute blondelette Conceut un fils Egyptien sans pere, Puis l’enfanta sans douleur la doulcette Quoy que sortist comme fait vipere L’ayant rongé en moult grand vitupere, Tout l’un des flancz par son impatience: Depuis passa monts et vaulx sans fiance Par l’aer volant en terre cheminant, Tant qu’estonna l’amy de Sapience, Quil estima estre humain animant. Or sa, respons moy, me dist Grippeminault, a cest Enygme,

et nous resoulds presentement que c’est Or sa, or de par Dieu, respondis-je: Si j’avois Sphinx en ma maison, or de par Dieu, comme avoit Verres, un de voz precurseurs. Or de par Dieu, resouldre pourrois l’Enygme: or de par Dieu, mais certes je n’y estois mye, et suis, or de par Dieu, innocent du faict. Or sa, dist Grippeminault, par Stix, puis que autre chose ne veulx dire, or sa je te monstreray or sa, que meilleur te seroit estre tombé entre les pattes de Lucifer, or sa qu’entre noz griphes. Or sa, les voy tu bien: or sa malotru, nous allegues tu innocence? Or sa comme chose digne d’eschapper noz tortures: or sa les petits mouscherons et petits papillons y sont prins: or sa les gros taons les rompent, or sa, et passent a travers. Or sa semblablement nous ne cherchons les gros larrons et tyrans: or sa ils sont de trop dure digestion, or sa ils nous affoleroyent, or sa, vous aultres gentils innocens, or sa le grand diable, or sa vous chantera messe. Or sa, frere Jehan des enlumineures, impatient de ce qu’avoit dict Grippeminault, Luy dist, o monsieur le diable engipponné, comment veulx tu qu’il responde d’un cas qu’il ignore, ne te contente tu de verité? Or sa, dist Grippeminault, encores n’estoit de mon regne advenu: or sa qui en personne sans premier estre interrogé, parlast, Or sa qui nous a deslié ce fol enraigé icy? Tu as menty, disoit frere Jehan, sans les levres mouvoir. Or sa, quand seras en reng de respondre, or sa tu auras prou a faire, Or sa marault, tu as menty, disoit frere Jehan en silence: pense tu estre en la forest Academicque avecques les ocieux veneurs et inquisiteurs de verité. Or sa, nous avons bien icy autre chose a faire. Or sa icy on respond, je dy, or sa categoricquement de ce qu’on ignore. Or sa on confesse avoir faict, or sa ce qu’on ne feit oncques: or sa on proteste scavoir ce que jamais on n’apprint. Or sa, on faict prendre patience en enrageant. Or sa, on plume l’oye sans la faire crier: or sa tu parles sans procuration, or sa que je te voy bien: or sa tes fortes fiebvres quartaines, or sa, qui te puissent espouser. Or sa diable. Diable, s’escria frere Jehan, archidiable, panthodiable, tu veulx doncques marier les moynes, ho, ho, hau, je te prens pour heretique.