Comment nous passasmes le guischet habité par Grippeminault, archiduc des chatz fourrez.

Ayant autresfois eu procuration la laissasmes et passasmes condemnation, qui

Page [36]
est une Isle toute deserte passames aussi le guichet auquel lieu Pantagruel ne voulut descendre et feit tresbien, car nous y fusmes faicts prisonniers et arrestez de fait par grippeminault archiduc des Chatz fourrez par ce que quelcun de nostre bande avoit bastu un chicanoux passant procuration: les chatz fourrez sont bestes moult horribles et espouventables, ils mengent les petits enfans et paissent sur des pierres de marbre, advisez beuveurs s’ils ne doivent bien estre camus, ils ont le poil hors de la peau non hors sortant mais au dedans caché et portent pour leur Simbolle et divise tous et chacun d’eux une gibbebesiere ouverte, mais non tous en une maniere, car aucuns la portent attachee au col en escharpe, autre sur le cul, autres sur la bedaine, autres sur le costé et le tout par raison et misteres ont aussi les griphes tant longues, fortes et asserees que rien ne leur eschappe depuis qu’une fois l’ont mise entre leurs serres et se couvrent les testes aucuns de bonnets a quatre goutieres ou brayettes, autres de bonnetz a tresves de cul, autres de mortiers, autres de caparassons mortiffiez entrans en leur tapinaudiere nous dist un gueux de l’ostiere auquel avions donné un demy Teston, gens de bien Dieu vous doinct bien
Page [37]
tost de leans a sauveté sortir, considerez bien le mynois de ces villains arczboutans pilleurs de justice grippeminaudiere et nottez que si vivez encore six Olympiades et l’aage de deux chiens vous verrez ces chatz fourrez Seigneurs de toute l' europe et possesseurs pacificques de tout le bien et dommaine qui est en icelle si en leurs hoirs soubdain ne deperissoit le bien et revenu par eux injustement acquis, tenez le d’un gueux de bien, Parmy eux regne la sexte essence par laquelle ils grippent tout, devorent tout, et conchient tout, Ils pendent, bruslent, escartellent, decapitent, meurdrissent, emprisonnent, mynent, et ruynent tout sans discretion de bien ou de mal: par parmy eulx vice, est vertu appellee. Meschanceté, est bonté surnommee : trahiston a nom de feaulté : larrecin, est dicte liberalité : pillerie est leur devise, et par eulx faicte est trouvee bonne de tous humains. Exceptez moy, les heretiques : et le tout font avecques souveraine et irrefragable authorité. Pour le signe de mon prognosticq, Advisez que ceans sont les mangeries au dessus des rastelliers. De ce quelque jour vous souvienne, et si jamais pestes au monde, famines, guerres, horraiges, cataglismes, conflagrations, ou autre malheur advient, ne l’attribuez ne le referez
Page [38]
aux conjonctions des planettes maleficques, aux abus de la court Rommaine, aux tyrannies des roys et princes terriens, a l’imposture des caphars, hereticques, faulx prophetes, a la malignité des usuriers, faulx monnoyeurs rongneurs de testons, a l’ignorance, imprudence, des medecins, chirurgiens, apoticaires, a la perversité des femmes adulteres, venefiques, infanticides, attribuez le tout a l’enorme, indicible, incroyable, et inestimable meschanceté, laquelle est continuellement forgee et exercee en l’officine des chats fourrez: et ne est du monde congnue non plus que la caballe des Juifs. Pour autant n’est elle corrigee, detestee et reprimee comme seroit de raison. Mais si elle est quelque jour mise en evidence et manifestee au peuple. Il n’est et ne fut Orateur tant eloquent qui par son art le retint, ny loy tant rigoreuse et draconique, qui par crainte de peine le gardast, ne magistrat tant puissant qui par force l’empeschast de les faire tous vifs dedans leurs raboulieres felonnement brusler leurs enfans propres chatz fourrillons et autres parens les auroient en horreur et abomination. C’est pourquoy comme Annibal eut de son pere Amilcar soubz solennelle et religieuse admonition commandement de persecuter les Romains, tant qu’il
Page [39]
vivroit aussi ay-je de feu mon pere injonction icy hors demourer, attendant que la dedans tombe la fouldre du Ciel et en cendre les reduise comme autres Titanes, prophanes et theomaches, puis que les humains ou tant sont es coups endurciz, que le mal par iceux advenu et a advenir ne sentent, ne prevoyent, ou le sentans n’osent, ne peuvent les exterminer. Cela dist Panurge, ha non par Dieu, je n’y vois pas, Ce Noble gueux m’a plus fort estonné que si du Ciel en Automne eust tonné retournans trouvasmes la porte fermee et nous fut dict que la facillement on entroit comme en Averne, a yssir estoit la dificulté et ne sortirions hors en maniere que ce fust sans bulletin et descharge de l’assistance, Pour ceste seule raison qu’on ne s’en va poinct de foire comme de marché et qu’avions les pieds pouldreux, le pis fut quant entrasmes le guischet, Car nous fusmes presentez pour avoir nostre bulletin et descharge devant un monstre le plus hideux que jamais fut descript on le nommoit Grippeminault, Je ne le vous le saurois mieux comparer qu’a Chimere a Sphinx a Cerberus, ou bien au simulachre D’ oziris ainsi que le figuroient les Egyptiens par trois Testes ensemble joinctes, Sçavoir est, d’un Lyon rugiant, d’un chien flattant et
Page [40]
d’un loup beslant entortillees d’un dragon, soy mordant la queue et des rayons scintillans, a l’entour les mains avoit plaines de sang les griphes comme d’une harpie, le museau a bec de corbin, les dens d’un sanglier quatrannier, les yeulx d’une gueule d’enfer tout couvert de mortiers entrelassez, de pillons, seullement apparoissoient les griffes, le siege d’iceluy et de tous ses collateraulx chatz garenniers, estoit d’un long rastelier tout neuf, au dessus duquel par forme de revers installees estoient mangeoires fort amples et belles selon l’advertissement du gueux a l’endroit du siege estoit l’image d’une vieille femme tenant en main dextre un fourreau de faucille, en senestre une balance, et portoit besicles au nez les couppes de la balance estoient deux vieilles gibbessieres veloutees, l’une pleine de billon et pendante, l’autre vuide et loing enlevee, au dessus du tresbuchet: et suis d’oppinion que c’estoit le pourtraict de justice grippeminaudiere bien abhorrent l’institution des antiques Thebains qui erigeoient les statues de leurs dicastes, et Juges apres leur mort en or, en argent, en marbre selon leurs merites, toutes sans mains, quant fusmes devant luy presentez je ne sçay quelles sortes de gens tous vestus de gibbessieres et de sayes a grans lambeaux
Page [41]
d’escriptures, nous feirent sus une sellette asseoir. Panurge disoit gallefrotiers mes amis je ne suys que trop bien ainsi, aussi bien elle est trop basse pour homme qu’a chausses neufves et court pourpoinct, asseez vous dirent ils et que plus on ne le vous die, la terre presentement s’ouvrira pour tous vifz vous engloutir si faillez a bien respondre.

Real    Hypothetical    Fictional    Mythical   
Region, area    Town, village    Building    Water (lakes, rivers, etc.)    mountains, islands, ...    Other