Comment Panurge expose l’Enygme de Grippeminault.

Grippeminault semblant n’entendre ce propos s’addresse a Panurge, disant: Or

sa, or sa, or sa. Et toy goguelu n’y veulx-tu riens dire? respondit Panurge. Or de par le diable, je voy clairement que la peste est icy pour le moins, or de par le diable la veu que innocence n’y est en seureté, et que le diable y chante messe. Or de par le diable la je vous prie que pour tous je la paye, et nous laissez aller, il ne pleut plus. Or de par le diable la aller, dist Grippeminault, Or sa, encores ne advint depuis trois cens ans que personne eschappast de ceans sans y laisser du poil, or sa ou la peau pour le plus souvent. Or sa, car quoy, or sa, ce seroit a dire que par devant nous icy serois injustement traicté Or sa, malheureux es tu bien, or sa mais encores plus le seras. Or sa que veult il dire? Or sa c’est Midas, or de par le diable la, respondit Panurge, un cosson noir, nay d’une febve blanche. Or de par le diable la, la par le trou qu’il avoit faict la rongeant. Or de par le diable la, lequel aucunesfois volle, aucunesfois chemine en terre Or de par le diable la, dont fut estimé de Pithagoras, premier amateur de sapience, ce est en Grec philosophie. Or de par le diable la, avoir d’ailleurs par metempsichosie ame humaine receu. Or de par le Diable la, si vous autres estiez hommes, or de par le diable la, apres vostre mort selon son opinion, voz ames entreroyent en corps de cossons. Or de par le diable la, car en ceste vie vous rongez et mangez tout en l’autre, vous rongeriez comme viperes les costes propres de voz meres. Or de par le diable la: Cordieu, dist frere Jehan, de bien bon coeur je souhaitte que le trou de mon cul devienne febve, et autour soit de ces cossons rongé. Panurge ces motz achevez, jecta au meillieu du parquet une grosse bourse de cuir pleine d’escuz au soleil: au son de la bourse commencerent tous les chatz fourrez jouer des griphes, comme s’ils fussent viollons desmanchez, et tous s’escrierent a haute voix disans, ce sont les espices. Le proces fut bien bon, bien friant, et bien espicé. Cest or, dist Panurge, je dis escus au soleil. La court, dist Grippeminault, l’entend. Or bien, or bien, or bien, allez enfans, or bien, passez oultre: or bien, nous ne sommes tant diables que nous sommes noirs. Or bien, or bien, or bien, yssans du guichet feusmes conduicts jusques au port par certains griffons de montaignes: avant rentrer en noz navires feusmes par iceulx advertiz que n’eussions a chemin prendre sans premierement avoir faict presens seigneuriaux, tant a la dame Grippeminaudiere, qu’a toutes les chattes fourrees: autrement auroyent commission nous ramener au guischet. Bien respondit frere Jehan, Nous icy a l’escart, visiterons le fond de noz deniers, et donnerons a tous consentement, mais, dirent les griphons, n’oubliez le vin des pauvres diables: des pauvres diables, dist frere Jehan, Jamais n’est en oubly le vin, il nous est memorial en tout temos, et en toute saison.