Comment les victeurs Gargantuistes feurent recompensez apres la bataille. Chapitre. lj.

Ceste concion faicte par Gargantua, feurent livrez les sediteux par luy requis: exceptez Spadassin, Merdaille et Menuail : lesquelz

estoient fuyz six heures davant la bataille L'un jusques au col de laignel, d'une traicte, l'aultre jusques au val de vyreval de vyrevyre, l'aultre jusques a Logroine sans derriere soy reguarder, ny prandre alaine par chemin et deux fouaciers, lesquelz perirent en la journee. Aultre mal ne leurs feist Gargantua : sinon qu'il les ordonna pour tirer les presses a son imprimerie: laquelle il avoit nouvellement instituee. Puis ceulx qui la estoient mors il feist honorablement inhumer en la vallee des Noirettes, et au camp de Bruslevieille. Les navres il feist panser et traicter en son grand Nosocome. Apres advisa es dommaiges faictz en la ville et habitans: et les feist rembourcer de tous leurs interest a leur confession et serment. Et y feist bastir un fort chasteau: y commettant gens et guet pour a l'advenir mieulx soy defendre contre les soubdaines esmeutes.

Au departir remercia gratieusement tous les soubdars de ses legions: qui

avoient este a ceste defaicte, et les renvoya hyverner en leurs stations et guarnisons. Exceptez aulcuns de la legion Decumane, lesquelz il avoit veu en la journee faire quelques prouesses: et les capitaines des bandes lesquelz il amena avecques soy devers Grandgousier.

A la veue et venue d'iceulx le bon homme feut tant joyeux, que possible ne seroit le descripre. Adonc leurs feist un festin le plus magnificque, le plus abundant et plus delitieux, que feust veu depuis le temps du roy Assuere. A l'issue de table il distribua a chascun d'iceulx tout le parement de son buffet qui estoit au poys de dishuyt cent mille quatorze bezans d'or: en grand vases d'antique, grands pontz, grans bassins, grands tasses, couppes, potetz, candelabres, calathes, nacelles, violiers, drageouoirs, et aultre telle vaisselle toute d'or massif, oultre la pierrerie, esmail et ouvraige, qui par estime de tous excedoit en pris la matiere d'iceulx. Plus, leurs feist con

ter, de ses coffres a chascun douze cens mille escutz contens. Et d'abundant a chascun d'iceulx donna a perpetuite (excepte s'ilz mouroient sans hoirs) ses chasteaulx, et terres voizines selon que plus leurs estoient commodes. A Ponocrates donna la Rocheclermaud, a Gymnaste le Couldray, a Eudemon, Montpensier. Le Rivau, a Tolmere, a Ithybole, Montsoreau, a Acamas Cande, Varenes, a Chironacte, Gravot, a Sebaste, Quinquenays, a Alexandre, Ligre a Sophrone et ainsi de ses aultres places.