Comment Gargantua feist bastir pour le moyne l' abbaye de Theleme. Chapitre. lij.

Restoit seulement le moyne a pourvoir. Lequel Gargantua vouloit faire abbe de Seuille : mais il le refusa. Il luy voulut donner l' abbaye de Bourgueilabbaye de BourgueilBourgueil ou de sainct Florent, laquelle mieulx

luy duiroit, ou toutes deux, s'il les prenoit a gre. Mais le moyne luy fist responce peremptoire, que de moyne il ne vouloit charge ny gouvernement, Car comment (disoit il) pourroy je gouverner aultruy, qui moymesmes gouverner ne scaurois? Si vous semblez que je vous aye faict, et que puisse a l'advenir faire service agreable, oultroyez moy de fonder une abbaye a mon devis. La demande pleut a Gargantua et offrit tout son pays de Theleme jouste la riviere de Loyre, a deux lieues de la grande forest du port Huaultforest du port Huaultport Huault Et requist a Gargantua qu'il instituast sa religion au contraire de toutes aultres. Premierement doncques (dist Gargantua) il n'y fauldra ja bastir murailles au circuit: car toutes aultres abbayes sont fierement murees. Voyre, dist le moyne. Et non sans cause ou mur y a et davant et derriere, y a force murmur, envie, et conspiration mutue. Davantaige veu que en certains convents de ce monde est en usance: que si femme aulcune y entre (j'entends des preudes et publicques) on nettoye la place par laquelle elles ont passe, feut ordonne que si religieux ou religieuse y entroit par cas fortuit, on nettoiroit curieusement tous les lieulx par lesquelz auroient passe. Et par ce que es religions de ce monde tout compasse, limite, et reigle par heures, feut decreté que la ne seroit horrologe ny quadrant aulcun. Mais selon les occasions et oportunitez seroient toutes les oeuvres dispensees. Car (disoit Gargantua) la plus vraye perte du temps qu'il sceust estoit de compter les heures. Quel bien en vient il? et la plus grande resverie du monde estoit soy gouverner au son d'une cloche, et non au dicte de bon sens et entendement. Item par ce qu'en icelluy temps on ne mettoit en religion des femmes, si non celles que estoient borgnes, boyteuses, bossues, laydes, defaictes, folles, insensees, maleficies, et tarees: ny les hommes si non catarrez, mal nez, niays et empesche de maison.

A propos (dist le moyne) une femme qui n'est ny belle ny bonne, a quoy vault toille? A mettre en religion, dist Gargantua. Voyre, dist le moyne, et a faire des chemises? Feut ordonne que la ne seroient repceues si non les belles, bien formees, et bien naturees: et les beaulx bien formez, et bien naturez. Item par ce que es conventz des femmes ne entroient les hommes si non a l'emblee et clandestinement: feut decrete que ja ne seroient la les femmes au cas que n'y feussent les hommes? ny les hommes en cas que n'y feussent les femmes. Item par ce que tant hommes que tant femmes une foys repceuez en religion apres l'an de probation estoient forcez et astrinctz y de meurer perpetuellement leur vie durante feust estably que tant hommes que femmes la repceuz, sortiroient quand bon leurs sembleroit franchement et entierement. Item par ce que ordinairement les religieux faisoient troys veuz: scavoir

est de chastete, pauvrete, et obedience: fut constitue, que la honorablement on peult estre marie, que chascun feut riche, et vesquist en liberte: Au reguard de l'eage legitime, les femmes y estoient repceues depuis dix jusques a quinze ans: les hommes depuis douze jusques a dix et huict.