Comment feust bastie et dotee l'abbaye des Thelemites. Chapitre. liij.

Pour le bastiment, et assortiment de l'abbaye Gargantua feist livrer de content vingt et sept cent mille huyt cent trente et un mouton a la grand laine, et par chascun an jusques a ce que le tout feust parfaict assigna sus la recepte de la Dive seze cent soixante et neuf mille escuz au soleil et autant a l'estoille poussiniere: Pour la fondation et entretenement d'icelle donna a perpetuite vingt troys cent soixante neuf mille cinq cens quatorze nobles,

a la rose de rente fonciere indemnez, amortyz, et solvables par chascun an a la porte de l'abbaye Et de ce leurs passa belles lettres.Le bastiment feut en figures exagone en telle facon que a chascun angle estoit bastie une grosse tour ronde: a la capacite de soixante pas en diametre. Et estoient toutes pareilles en grosseur et protraict. La riviere de Loyre decoulloit sus l'aspect de Septentrion. Au pied d'icelle estoit une des tours assise, nommee Artice. Et tirant vers L'orient estoit une aultre nommee Calaer. L'aultre ensuivant Anatole. L'aultre apres Mesembrine, l'aultre apres hesperie. La derniere, Cryere. Entre chascune tour estoit espace de troys cent douze pas. Le tout basty a six estages, comprenent les caves soubz terre pour un. Le second estoit voulte a la forme d'une anse de panier. Le reste estoit embrunche de guy de Flandres a forme de culz de lampes, Le dessus couvert D'ardoize fine: avec l'endousseure de plomb a figures de petitz manequins et animaulx bien assortiz et dorez avec les goutieres que yssoient hors la muraille entre les croyzees, pinctes en figure diagonale de or et azur, jusques en terre, ou finissoient en grands eschenaulx qui tous conduisoient en la riviere par dessoubz le logis. Ledict bastiment estoit cent foys plus magnificque que n'est Bonivet, ne Chambourg, ne Chantilly. Car en ycelluy estoient neuf mille troys cens trente et deux chambres: chascune guarnie de arriere chambre, cabinet, guarderobbe, chapelle, et yssue en un grande salle. Entre chascune tour au mylieu dudict corps de logis estoit une viz brizee dedans icelluy mesmes corps. De laquelle les marches estoient part de porphyre, part de pierre Numidicque, part de marbre serpentin: longues de xxij. piedz: l'es pesseur estoit de troys doigtz, l'assiete par nombre de douze entre chascun repous. En chascun repous estoient deux beaulx arceaux d'antique, par lesquelz estoit repceu la clarte: et par iceulx on entroit en un cabinet faict a clere voys de largeur de ladicte viz: et montoit jusques au dessus la couverture, et la finoit en pavillon. Par icelle viz on entroit de chascun couste en une grande salle, et des salles es chambres. Depuis la tour Artice jusques a Cryere estoient les belles grandes librairies en Grec, Latin, Hebrieu, Francoys, Tuscan, et Hespaignol: disparties par les divers estaignes selon iceulx langaiges. Au mylieu estoit une merveilleuse viz, de laquelle l'entree estoit par le dehors du logis en un arceau large de six toizes. Icelle estoit faicte en telle symmetrie et capacite, que six hommes d'armes la lance sus la cuisse povoient de fronc ensemble monter jusques au dessus de tout le bastiment. Depuis la tour Anatole jusques a Mesembrine estoient belles grandes galleries toutes pinctes des antiques prouesses histoires et descriptions de la terre. Au milieu estoit une pareille mon tee et porte comme avons dict du couste de la riviere. Sus icelle porte estoit escript en grosses lettres antiques ce que s'ensuit.