Comment le moyne feist dormir Gargantua, et de ses heures et breviaire. Chapitre. xxxxj.

Le souper acheve consulterent sus l'affaire instant et feut conclud que environ la minuict ilz sortiroient a l'escarmouche pour scavoir quel guet et diligence faisoient leurs ennemys. En cependent qu'il se reposeroient quelque peu pour estre plus frais. Mais Gargantua

ne povoit dormir en quelque facon qu'il se mist. Dont luy dist le moyne. Je ne dors jamais bien a mon aise, si non quand je suis au sermon, ou quand je prie dieu. Je vous supplye commencons vous et moy les sept pseaulmes pour veoir si tantost ne serez endormy.

L'invention pleut tresbien a Gargantua

Et commenceant le premier pseaulme sus le poinct de Beati quorum, s'endormirent et l'un et l'aultre. Mais le moyne faillit oncques a s'esveiller avant la minuict, tant il estoit habitue a l'heure des matines claustralles. Luy esveille tous les aultres esveilla, chantant a pleine voix la chanson. Ho regnault reveille toy veille, O Regnault reveille toy. Quand tous furent esveillez, il dict. Messieurs l'on dict, que matines commencent par tousser et souper, par boyre. Faisons au rebours commencons maintenant noz matines, par boyre, et de soir a l'entree de souper nous tousserons a qui mieulx mieulx. Dont dist

Gargantua. Boyre si tost apres le dormir? Ce n'est vescu en diete de medicine. Il se fault premier escurer l'estomach des superfluitez et excremens.

C'est dist le moyne bien mediciné.

Cent diables me saultent au corps s'il n'y a plus de vieulx hyvrognes, qu'il n'y a de vieulx medicins. J'ay compose avecques mon appetit en telle paction, que tousjours il se couche avecques moy et a cela je donne bon ordre le jour durant aussy avecques moy il se lieve. Rendez tant que vouldrez voz cures, je m'en voys apres mon tyrouer. Quel tyrouer (dist Gargantua) entendez vous? Mon breviaire, dist le Moyne. Car tout ainsi que les faulconniers davant que paistre leurs oyseaux les font tyrer quelque pied de poulle, pour leurs purger le cerveau des phlegmes, et pour les mettre en appetit, ainsi prenant ce joyeux petit breviaire au matin, je m'escure tout le poulmon, et voy me la prest a boyre.

A quel usaige (dist Gargantua) dictez

vous ces belles heures. A l'usaige (dist le moyne) de Fecan a troys pseaulmes et troys lecons, ou rien du tout qui ne veult. Jamais je ne me assubjectis a heures, les heures sont faictez pour l'homme, et non l'homme pour les heures. Pour tant je foys des miennes a guise d'estrivieres, je les acourcis ou allonge quand bon me semble. Brevis oratio penetrat celos, longua potatio evacuat cyphos.

Ou est escript cela? Par ma foy (dist Ponocrates) je ne scay mon petit couillaust, mais tu vaulx trop. En cela (dist le Moyne) je vous ressemble. Mais Venite apotemus. L'on apresta carbonnades a force et belles souppes de primes, et beut le moyne a son plaisir.

Aulcuns luy tindrent compaignie, les aultres s'en deporterent. Apres chascun commenca soy armer et accoustrer. Et armerent le moyne contre son vouloir, car il ne vouloit aultres armes que son froc davant son estomach, et le baston de la croix en son poing. Toutesfoys

a leur plaisir feut arme de pied en cap, et monte sus un bon coursier du royaulme, et un gros braquemart au couste. Ensemble Gargantua, Ponocrates, Gymnaste, Eudemon, et vingt et cinq des plus adventureux de la maison de Grandgousier, tous armez a l'advantaige la lance au poing montez comme sainct George : chascun ayant un Harquebouzier en crope.