¶L’estude et diete de Gargantua, scelon la discipline de ses precepteurs Sorbonagres. Chap. xx.

Les premiers jours ainsi passez, et les cloches remises en leur lieu: les citoiens de Paris par recongnoissance de ceste honnestete se offrirent d’entretenir et nourrir sa jument tant qu’il luy plairoit. Ce que Gargantua print bien a gre. Et l’envoyerent vivre en la forest de Biere. Ce faict voulut de tout son sens estudier a la discretion de Ponocrates : Mais icelluy pour le commencement ordonna, qu’il feroyt a sa maniere acoustumee: affin d’entendre par quel moien en sy long temps ses antiques precepteurs l’avoient rendu tant fat/ niays/ et ignorant. Il dispensoyt doncques son temps en telle faczon, que ordinairement il s’esveiloit entre huyct et neuf heures, feust il jour ou non, ainsi l’avoient ordonne ses regens theologiques, alleguans ce que dict David. Vanum est vobis ante lucem surgere. Puis se guambayoit/ penadoyt / et paillardoit par my le lict quelque temps, pour mieulx esbaudir ses esperitz animaulx, et se habiloit selon la saison, mays voulentiers portoyt il une grande et longue robbe de grosse frize fourree de renards: apres se peignoyt du peigne de Almain, c’estoyt des quatre doigtz et le poulce Car ses precepteurs disoient, que soy aultre

ment peigner, laver, et nettoyer, estoit perdre temps en ce monde. Puis fiantoit, pissoyt, rendoyt sa gorge, rottoyt, esternuoit, et se morvoyt en archidiacre/ et desjeunoyt pour abatre la rouzee et maulvays aer: belles tripes frites, belles carbonnades, beaux jambons, belles cabirotades, et force soupes de prime. Ponocrates luy remonstroit, que tant soubdain ne debvoit repaistre au partir du lict, sans avoir premierement faict quelque exercice. Gargantua respondit Quoy? N’ay je pas faict bel exercice? Je me suis vaultre six ou sept tours par my le lict, davant que me lever. Est ce pas assez? Le pape Alexandre ainsi faisoit par le conseil de son medicin Juif: et vesquit jusques a la mort, en despit des envieux: mes premiers maistres me y ont acoustume, disans que le desjeuner faisoit bonne memoire, pourtant y beuvoient les premiers. Je m’en trouve fort bien, et n’en disne que mieulx. Et me disoit maistre Tubal (qui feut premier de sa licence a Paris) que ce n’est pas tout l’adventaige de courir bien toust, mais bien de partir de bonne heure: aussi n’est ce la sante totale de nostre humanite, boyre a tas, a tas, a tas comme canes: mais ouy bien de boyre matin: unde versus. Lever matin, n’est pas bon heur, Boire matin est le meilleur Apres avoir bien a poinct desjeune, alloit a l’ecclise, et luy portoit on dedans un grand penier un gros breviaire empantoufle, pesant tant en gresse que en fremoirs et parchemin poy plus poy moins unze quintaulx. La oyoit vingt et six ou trente messes, et ce pendent venoit son diseur d’heures en place, empaletocque comme une duppe, et tresbien antidote son alaine a force syropt vignolat. Avecques icelluy marmonnoit toutes ces kyrielles: et tant curieusement les espluschoit, qu’il n’en tomboit un seul grain en terre. Au partir de l’eglise, on luy amenoit sur une traine a beufz un faratz de patenostres de sainct Claude sainct Claudesainct Claude, aussi grosses chascune, qu’est le moulle d’un bonnet: et se pourmenant par les cloistres, galeries, ou jardin en disoit plus que seize hermites. Puis estudioyt quelque meschante demye heure, les yeulx assis dessus son livre, mais (comme dict le Co micque) son ame estoit en la cuysine. Pissant doncq plein official, se asseoyt a table. Et par ce qu’il estoit naturellement phlegmaticque, commencoit son repas, par quelques douzaines de jambons, de langues de beuf fumees/ de bou targues, d’andouilles, et telz aultres avant coureurs de vin. Ce pendent quatre de ses gens, luy gettoient en la bouche l’un apres l’aultre continuement de la moustarde a pleines palerees puis beuvoit un horrificque traict de vin blanc, pour luy soulaiger les roignons. Apres mangoit selon la saison viandes a son appetit, et lors cessoit de manger quand le ventre luy tiroit. A boire n’avoit poinct de fin, ny de canon. Car il disoit que les metes et bournes de boyre estoient quand la personne beuvant, le liege de ses pantofles enfloit en hault d’un demy pied. Puis tout lourdement grignotant d’un transon de graces, se lavoit les mains de vin frais, s’escuroit les dens avec un pied de porc, et devisoit joyeusement avec ses gens. puis le verd estendu l’on desployoit force chartes, force dez, et renfort de tabliers. La jouoyt au flux, au cent, a la prime, a la vole, a la pille, a la triumphe: a la picardie, a l’espinay, a trente et un, a la condemnade, a la carte virade, au maucontent, au cocu, a qui a si parle, a pille: nade: jocque: fore, a mariage, au gay, a l’opinion, a qui faict l’ung faict l’aultre, a la sequence, aux luettes, au tarau, a qui gaigne perd, au beline, a la ronfle, au glic, aux honneurs a la mourre, aux eschetz, au renard, aux marrelles, aux vasches, a la blanche, a la chance, a troys dez, aux talles, a la nicnocque. A lourche, a la renette, au barignin, au trictrac, a toutes tables, aux tables rabatues, au reniguebleu. au force, aux dames: a la babou, a primus secundus, au pied du cousteau, aux clefz, au franc du carreau, a pair ou sou, a croix ou pille, aux pingres, a la bille, a la vergette, au palet, au j’en suis, a foucquet, aux quilles, au rampeau, a la boulle plate, au pallet, a la courte boulle, a la griesche, a la recoquillette, au cassepot, au montalent, a la pyrouete, aux jonchees, au court baston, au pyrevollet, a clinemussete, au picquet, a la seguette, au chastelet, a la rengee, a la foussete, au ronflart, a la trompe, au moyne, au tenebry, a l’esbahy, a la soulle, a la navette, a fessart, au ballay, a sainct Cosme je te viens adorer, au chesne forchu, au chevau fondu, a la queue au loup, a pet en gueulle, a guillemin baille my ma lance, a la brandelle, au trezeau, a la mousche, a la migne migne beuf, au propous, a neuf mains, au chapifou, aux ponts cheuz, a colin bride, a la grolle, au cocquantin, a collin maillard, a myrelimoufle, a mouschart, au crapault, a la crosse, au piston, au bille boucquet, au roynes, aux mestiers, a teste a teste bechevel, a laver la coiffe ma dame, au belusteau, a semer l’avoyne, a briffault, au molinet, a defendo, a la virevouste, a la baculle, au laboureur, a la cheveche, aux escoublettes enraigees, a la beste morte a montemonte l’eschelette, au pourceau mory, a cul salle, au pigeonnet, au tiers, a la bourree, au sault du buysson, a croyzer, a la cutte cache, a la maille bourse en cul au nic de la bondree, au passavant, a la figue, aux petarrades, a pillemoustarde, aux allouettes, aux chinquenaudes. Apres avoir bien joue et belute temps, il convenoit boire quelque peu, c’estoient unze peguadz pour homme. et soubdain apres bancqueter c’estoit sus un beau banc, ou en beau plein lict s’estendre et dormir deux ou troys heures sans mal penser, ny mal dire. Luy esveille secouoyt un peu les aureilles: ce pendent estoit aporte vin frais, la beuvoit mieulx que jamais. Ponocrates luy remonstroit, que c’estoit maulvaise diete, ainsi boyre apres dormir. C’est (respondit Gargantua) la vraye vie des peres. Car de ma nature je dors salle: et le dormir m’a valu autant de jambon. Puis commenceoit estudier quelque peu, et patenostres en avant, pour lesquelles mieulx en forme expedier, montoit sus une vieille mulle, laquelle avoit servy neuf Roys, ainsi marmonant de la bouche et dodelinant de la teste alloit veoir prendre quelque connil aux filletz. Au retour se transportoit en la cuysine pour scavoir quel roust estoit en broche. Et souppoit tresbien par ma conscience: et volentiers convioit quelques beuveurs de ses voisins, avec lesquelz beuvant d’autant, comptoient des vieulx jusques es nouveaulx. Entre autres avoit pour domesticques les seigneurs du Fou. de Gourville et de Marigny. Apres souper venoient en place les beaux evangiles de boys, c’est a dire force tabliers, ou le beau flux, un, deux, troys: ou a toutes restes pour abregier, ou bien alloient veoir les garses d’entour: et petitz bancquetz par my: collations et arrierecollations. Puis dormoit sans desbrider jusques au lendemain huict heures.