¶Comment le theologien emporta son drap, et comment il eut proces contre les Sorbonistes. Chapi. xix.

Le theologien n’eut poinct si toust acheve, que Ponocrates et Eudemon s’esclafferent de rire tant profondement,

que en riant cuyderent rendre l’ame a dieu, ny plus ny moins que Crassus voyant un asne couillart qui mangeoyt des chardons: et comme Philemon voyant un asne qui mangeoyt des figues qu’on avoyt apreste pour le disner, mourut de force de rire. Ensemble eulx commencza de rire maistre Janotus / a qui mieulx/ mieulx, tant que les larmes leurs venoyent es yeulx: par la vehemente concution de la substance du cerveau: a laquelle feurent exprimees ces humiditez lachrymales, et transcoullees par les nerfz optiques, Ces rys du tout sedez, consulta Gargantua avecques ses gens sur ce qu’estoyt de faire. La feut Ponocrates d’advis, qu’on feist reboyre ce bel orateur. Et veu qu’il leurs avoit donne de passe temps, et plus faict rire que n’eust Songecreux, qu’on luy baillast les dix pans de saulcice mentionnez en la joyeuse harangue, avecques une paire de chausses troys cens de gros boys de moulle/ vingt et cinq muiz de vin/ un lict a triple couche de plume anserine/ et une escuelle bien capable et profonde, lesquelles disoit estre a sa vieillesse necessaires. Le tout feut faict ainsi que avoit este delibere. Excepte que Gargantua doubtant qu’on ne trouva a l’heure chausses commodes pour ses jambes: luy feist livrer sept aulnes de drap noir/ et troys de blanchet pour la doubleure. Le boys feut porte par les guaingnedeniers, les maistres es ars porterent les saulcices et escuelle, Maistre Janot voulut porter le drap, Un desdictz maistres nomme maistre Jousse Bandouille luy remonstroit que ce n’estoit honeste ny decent l’estat theologal, et qu’il le baillast a quelq ’un d’entre eulx. Ha (dist Janotus) Baudet Baudet, tu ne concluds poinct in modo et figura, Voy la de quoy servent les suppositions, et parva logicalia. Pannus pro quo supponit? Confuse (dist Bandouille) et distributive. Je ne te demande pas (dist Janotus) Baudet, quomodo supponit, mais pro quo. C’est Baudet pro tibiis meis. Et pour ce le porteray je egomet, sicut suppositum portat adpositum. Ainsi l’emporta en tapinoys, comme feist Patelin son drap. Le bon feut quand le tousseux glorieusement en plein acte de Sorbone requist ses chausses et saulcices, Car peremptoirement luy feurent denieez, par autant qu’il les avoit eu de Gargantua selon les informations sur ce faictes. Il leurs remonstra que ce avoit este de gratis/ et de sa liberalite, par laquelle ilz n’estoient mie absoubz de leurs promesses. Ce nonobstant luy feut respondu qu’il se contentast de raison, et que aultre bribe n’en auroit. Raison? (dist Janotus). Nous n’en usons poinct ceans. Traistres malheureux vous ne valez rien. La terre ne porte poinct gens plus meschans que vous estes. Je le scay bien: ne clochez pas davant les boyteux. J’ay exerce la meschancete avecques vous. Par la rate dieu, je advertiray le Roy des enormes abus que sont forgez ceans, et par vos mains et meneez. Et que je soye ladre, s’il ne vous faict tous vifz brusler comme bougres traistres/ heretiques/ et seducteurs ennemys de dieu et de vertus. A ces motz prindrent articles contre luy. Luy de l’aultre coste les feist adjourner. Somme, le proces feut retenu par la court, et y est encores. Les magistres sur ce poinct feirent veu de ne soy descroter: maistre Janot avecques ses adherens feist veu de ne se mouscher, jusques a ce qu’en feust dict par arrest deffinitif. Par ces veuz sont jusques a present demourez et croteux et morveux, car la court n’a encores bien grabele toutes les pieces. L’arrest sera donne es prochaines Calendes grecques. C’est a dire: jamays. Comme vous scavez qu’ilz font plus que nature, et contre leurs articles propres. Les articles de Paris, chantent que dieu seul peult fayre choses infinies. Nature, rien ne faict immortel: car elle mect fin et periode a toutes choses par elle produictes. Car omnia orta cadunt etc. Mays ces avalleurs de frimars font les proces davant eulx pendens, et infiniz/ et immortelz. Ce que faisans ont donne lieu, et verifie le dict de Chilon Lacedemonien con sacre en Delphes, disant misere estre com paigne de proces: et gens playdoiens miserables. Car plus tost ont fin de leur vie, que de leur droict pretendu.