Comment les seigneurs de Baisecul et Hume vesne plaidoient devant Pantagruel sans advocatz, Chap. xj.

Donc commenca Baisecul en la maniere que s'ensuyt. Monsieur il est vray que une bonne femme de ma maison portoit vendre des oeufz au marchez, Couvrez vous Baisecul, dist Pantagruel. Grand mercy monsieur, dist le seigneur de Baisecul. Mais a propos, passoit entre les deux tropicques six blans vers le zenith et maille par autant que les mons Rhiphees

avoyent eu celle annee grande sterilité de happelourdes, moyennant une sedition de ballivernes meue entre les Barragouyns et les Accoursiers pour la rebellion des Souyces qui s'estoyent assemblez jusques au nombre de bon bies, pour aller a l'aguillanneuf, le premier trou de l'an, que l'on livre la souppe aux boeufz, et la clef du charbon aux filles, pour donner l'avoine aux chiens. Toute la nuict l'on ne feist la main sur le pot, que despescher bulles a pied et bulles a cheval pour retenir les bateaulx, car les cousturiers vouloyent faire des retaillons desrobez une sarbataine pour couvrir la mer Oceane, qui pour lors estoit grosse d'une potee de chous selon l'opinion des boteleurs de foin: mais les physiciens disoyent que a son urine ilz ne congnoissoyent signe evident au pas d'ostarde de manger bezagues a la moustarde, si non que messieurs de la court feissent par bemol commandement a la verolle, de non plus allebouter apres les maignans, car les marroufles avoient ja bon commencement a danser l'estrindore au diapason un pied au feu et la teste au mylieu comme disoit le bon Ragot. Ha messieurs Dieu modere tout a son plaisir, et contre fortune la diverse un chartier rompit nazardes son fouet, ce fut au retour de la Bicocque, a lors qu'on passa licentie maistre Antitus des crossonniers en toute lourderie: comme disent les canonistes. Beati lourdes quoniam ipsi trebuchaverunt. Mais ce que faict la quaresme si hault, par sainct Fiacre de Bryesainct Fiacre de BryeBrye, ce n'est pour aultre chose que la Penthecoste ne vient foys qu'elle ne me couste: mais hay avant peu de pluye abat grand vent, entendu que le sergeant me mist si hault le blanc a la butte, que le greffier ne s'en leschat orbiculairement ses doigtz empenez de jardz, et nous voyons manifestement que chascun s'en prent au nez, sinon qu'on regardast en perspective oculairement vers la cheminee a l'endroit ou pend l'enseigne du vin a quarente sangles, qui sont necessaire a vingt bas de quinquenelle: a tout le moins qui ne vouldroit lascher l'oyseau devant talemouses que le descouvrir, car la memoire souvent se pert quand on se chausse au rebours: sa dieu gard de mal Thibault mitaine. Alors dist Pantagruel. Tout beau mon amy, tout beau, parlez a traict et sans cholere. J'entends le cas, poursuyvez.Or monsieur dist Baisecul, ladicte bonne femme disant ses gaudez et audinos, ne peut se couvrir d'un revers fault montant par la vertuz guoy des privileges de l'université, sinon par bien soy bassiner anglicquement le couvrant d'un sept de quarreaulx et luy tirant un estoc vollant, au plus pres du lieu ou l'on vent les vieux drapeaulx, dont usent les paintres de Flandres, quand ilz veullent bien a droict ferrer les cigalles, et mesbahys bien fort comment le monde ne pont veu qu'il faict si beau couver.Icy voulut interpeller et dire quelque chose le seigneur de Humevesne, dont luy dist Pantagruel. Et ventre sainct Antoine t'appertient il de parler sans commandement? Je sue icy de haan, pour entendre la procedure de vostre different, et tu me viens encores tabuster? paix, de par le diable paix, tu parleras ton sou, quand cestuy cy aura achevé. Poursuyvez, dist il a Baisecul, et ne vous hastez point.

Voyant doncques, dist Baisecul, que la Pragmatique sanction n'en faisoit nulle mention, et que le pape donnoit liberté a un chascun de peter a son aise, si les blanchetz n'estoyent rayez, quelque pauvreté que feust au monde, pourveu qu'on ne se signast de ribaudaille, l'arcanciel fraischement esmoulu a Milan pour esclourre les alouettes, consentit que la bonne femme escullast les isciaticques par le protest des petitz poissons couillatrys qui estoyent pour lors necessaires a entendre la construction des vieilles bottes pourtant Jan le veau son

cousin gervays remué d'une busche de moulle, luy conseilla qu'elle ne se mist poinct en ce hazard de seconder la buee brimballatoyre sans premier aluner le papier: a tant pille, nade, jocque, fore, car non de ponte vadit qui cum sapientia cadit, attendu que messieurs des comptes ne convenoyent en la sommation des fleutes d'allemant, dont on avoit basty les lunettes des princes imprimee nouvellement a Anvers. Et voyla messieurs que faict maulvais raport. Et en croy partie adverse in sacer verbo dotis, car voulant obtemperer au plaisir du roy je me estois armé de pied en cap d'une carrelure de ventre pour aller veoir comment mes vendangeurs avoyent dechicqueté leurs haulx bonnetz, pour mieulx jouer des manequins et le temps estoit quelque peu dangereux de la foire, dont plusieurs francz archiers avoyent este refusez a la monstre, nonobstant que les cheminees feussent assez haultes selon la proportion du javart et des malandres l'ami baudichon. Et par ce moyen fut grande annee de quaquerolles en tout le pays de Artoys qui ne feust petit amandement pour messieurs les porteurs de cousteretz, quand on mangeoit sans desguainer cocques cigrues a ventre deboutonne. Et a la mienne volunte que chascun eust aussi belle voix, l'on en jourroit beaucoup mieulx a la paulme, et ces petites finesses qu'on faict a etymologizer les pattins, descendroyent plus aisement en Seine pour tousjours servir au pont aux meusniers, comme jadis feut decrete par le Roy de Canarre, et l'arrest en est au greffe de ceans. Pour ce monsieur je requiers que par vostre seigneurie soit dict et declaire sur le cas ce que de raison avecques despens, dommaiges et interestz.

Lors dist Pantagruel Mon amy voulez vous plus rien dire? Respondit Baisecul, non monsieur: car je ay dict tout le tu autem, et n'en ay en rien varié sur mon honneur. Vous doncques (dist Pantagruel)

monsieur de Humevesne, dictes ce que vouldrez et abreviez, sans rien toutesfoys laisser de ce que servira au propos.